ಬಿಗ್‌ ಬಿ ಬಾಲಿವುಡ್‌ ಕಂಡ ಅತ್ಯುತ್ತಮ ನಟ ಬಿಗ್‌ಬಿ ಅಮಿತಾಭ್‌ ಬಚ್ಚನ್‌ ಅವರಿಗೆ ಇಂದು 75ನೇ ಹುಟ್ಟುಹಬ್ಬದ ಸಂಭ್ರಮ. ದೇಶ ವಿದೇಶಗಳಲ್ಲೂ ಪ್ರಸಿದ್ಧರಾಗಿರುವ ಅವರಿಗೆ ಈಗಾಗಲೇ ಶುಭಾಶಯಗಳ ಮಹಾಪೂರ ಹರಿದುಬರುತ್ತಿದೆ.
ಕನ್ನಡದ ಅಮೃತಧಾರೆ ಚಿತ್ರದಲ್ಲಿ ಅತಿಥಿ ಪಾತ್ರ ಮಾಡಿದ್ದ ಅಮಿತಾಭ್‌ ಅವರಿಗೆ ಸ್ಯಾಂಡಲ್‌ವುಡ್‌ನಿಂದಲೂ ಶುಭಾಶಯಗಳು ಸಂದಿವೆ. ರಮ್ಯಾಮತ್ತು ಧ್ಯಾನ್‌ ನಟಿಸಿದ್ದ ಈ ಚಿತ್ರದಲ್ಲಿ ಬಿಗ್‌ ಬಿ ಕಾಣಿಸಿಕೊಂಡು ಕನ್ನಡ ಪ್ರೇಕ್ಷಕರಿಗೆ ಅಚ್ಚರಿ ಮೂಡಿಸಿದ್ದರು.
ಈ ಸಂದರ್ಭದಲ್ಲಿ ಲವಲವಿಕೆ ಜತೆ ಮಾತನಾಡಿದ ನಾಗತಿಹಳ್ಳಿ ಚಂದ್ರಶೇಖರ್‌, 'ಅಮಿತಾಭ್‌ ಎಲ್ಲಾ ನಟರಂತೆ ಅಲ್ಲ. ನಟರಾಗಲು ಫಿಸಿಕಲ್‌ ಅಪಿಯರೆನ್ಸ್‌ ಚೆನ್ನಾಗಿರೋದೇ ಮುಖ್ಯ ಎಂದು ಭಾವಿಸುವವರು ಬಹಳ ಮಂದಿ ಇದ್ದಾರೆ. ಆದರೆ, ಅವರು ಅದಕ್ಕಿಂತಲೂ ಮನಸ್ಥಿತಿ ಮುಖ್ಯ ಎಂದು ಭಾವಿಸಿದವರು. ಹಾಗಾಗಿಯೇ ಈ ವಯಸ್ಸಿನಲ್ಲೂ ಅವರು ಬೇಡಿಕೆಯ ನಟ ಎನಿಸಿಕೊಂಡಿರೋದು.
ತಮ್ಮ ವಯಸ್ಸಿನಗೆ ತಕ್ಕಂಥ ಪಾತ್ರಗಳನ್ನು ಆಯ್ದುಕೊಂಡು ಅದಕ್ಕೆ ಜೀವ ತುಂಬುತ್ತಿದ್ದಾರೆ. ದೇಹಕ್ಕೆ ವಯಸ್ಸಾದಂತೆ ಮನಸ್ಸಿಗೆ ಎಂದೂ ವಯಸ್ಸಾಗೋಲ್ಲ. ನಿಜವಾದ ಕಲಾವಿದನಿಗೆ ಪಾತ್ರವನ್ನು ಗ್ರಹಿಸುವ ಸಾಮರ್ಥ್ಯ ಇರಬೇಕು. ಅಮಿತಾಭ್‌ ಅದರಲ್ಲಿ ಪರಿಣಿತರು. ಅವರ ತಂದೆ ಕವಿಯಾಗಿದ್ದವರು. ಅಮಿತಾಭ್‌ ಸ್ವತಃ ಸಾಹಿತ್ಯಾಭಿರುಚಿ ಇರುವವರು. ಹಾಗಾಗಿ ಅವರು ಪಾತ್ರ ಮತ್ತು ಡೈಲಾಗ್‌ಗಳ ಅರ್ಥವನ್ನು ಅಮೂಲಾಗ್ರವಾಗಿ ಗ್ರಹಿಸಿ ಅಭಿನಯಿಸಬಲ್ಲವರಾಗಿದ್ದಾರೆ. ಅಪ್ರತಿಮ ನಟರೆನಿಸಿಕೊಂಡಿದ್ದಾರೆ' ಎಂದಿದ್ದಾರೆ.