ಕೊಳ್ಳೆಗಾಲದ ಕಾಡಿನಲ್ಲಿ ಭಯಪಟ್ಟಿದ್ದ ನಟಿ ಅಮಿತಾ

ರೂಪದರ್ಶಿ ಹಾಗೂ ನಟಿಯಾಗಿರುವ ಅಮಿತಾ ಕುನಾಲ್‌ ಮೊದಲ ಬಾರಿಗೆ ಕನ್ನಡ ಚಿತ್ರದಲ್ಲಿ ಪತ್ನಿಯಾಗಿ ಹಾಗೂ ಗರ್ಭಿಣಿ ಪಾತ್ರದಲ್ಲಿ ನಟಿಸಿದ್ದು, ಈ ಪಾತ್ರ ಮಾಡುವುದಕ್ಕೆ ಮೊದಲು ಹಿಂಜರಿದಿದ್ದಾಗಿ ತಿಳಿಸಿದ್ದಾರೆ. ಮಿಗಿಲಾಗಿ ಕೊಳ್ಳೆಗಾಲದ ಬಳಿ ಕಾಡಿನಲ್ಲಿ ಶೂಟಿಂಗ್‌ ಮಾಡಿದ ರೀತಿಯನ್ನು ಅವರಿಲ್ಲಿ ಹಂಚಿಕೊಂಡಿದ್ದಾರೆ.

'ಮೊದಲು ಈ ಪಾತ್ರ ಒಪ್ಪಿಕೊಳ್ಳಲು ಹಿಂಜರಿದಿದ್ದೆ. ಮುಂದೆ ನನಗೆ ಇದೇ ರೀತಿಯ ಪಾತ್ರಗಳು ಸಿಕ್ಕರೆ ಅನ್ನೋ ಭಯ ಇತ್ತು. ಆದರೆ, ಸಿನಿಮಾ ನೋಡಿದಾಗ ಕಾನ್ಸೆಪ್ಟ್‌ ಇಷ್ಟ ಆಯ್ತು. ಎಲ್ಲರಿಗೂ ಇಂಥ ಅವಕಾಶ ಸಿಗಲ್ಲ ಅಂತ ಒಪ್ಪಿಕೊಂಡೆ. 3 ತಿಂಗಳ ಗರ್ಭಿಣಿ ಮತ್ತು 9 ತಿಂಗಳ ಗರ್ಭಿಣಿಯಾಗಿ ಕಾಣಿಸಿಕೊಂಡಿದ್ದೇನೆ. ನನಗೆ ಅದರಲ್ಲಿ ನಟಿಸಿರುವ ನಾಯಕಿಯಂತೆಯೇ ನಟಿಸಲು ಇಷ್ಟವಿರಲಿಲ್ಲ. ಹಾಗೆ ನಟಿಸಿದರೆ ಅದು ನಟನೆಯಾಗೋಲ್ಲ. ಕಾಪಿ ಮಾಡಿದಂತೆ ಆಗುತ್ತೆ. ನನ್ನ ಇನ್‌ಪುಟ್‌ ಏನೂ ಇರೋಲ್ಲ ಎನ್ನಿಸಿತು. ಹಾಗಾಗಿ ಕಥೆಯನ್ನು ಅರ್ಥ ಮಾಡಿಕೊಳ್ಳಲು ಆ ಚಿತ್ರವನ್ನು ನೋಡಿದೆ. ಆದರೆ, ನಾನು ಆ ಪಾತ್ರವನ್ನು ಫೀಲ್‌ ಮಾಡಿ ಬೇರೆ ರೀತಿಯಲ್ಲೇ ನಟಿಸಿದ್ದೇನೆ' ಎಂದಿದ್ದಾರೆ ಅಮಿತಾ.

ಕೊಳ್ಳೆಗಾಲದ ಕಾಡಿನಲ್ಲಿ ಚಿತ್ರೀಕರಣ ಮಾಡಿದ್ದನ್ನು ಅಮಿತಾ ಮರೆಯೋಲ್ಲವಂತೆ. 'ಸುಮಾರು 5 ದಿನ ಸತತವಾಗಿ ಮಧ್ಯರಾತ್ರಿವರೆಗೆ ಶೂಟ್‌ ಮಾಡುತ್ತಿದ್ದೆವು. ದಟ್ಟವಾದ ಕಾಡು ಅದು. 2-3 ಗಂಟೆ ಮಾತ್ರ ನಿದ್ದೆ ಮಾಡುತ್ತಿದ್ದೆವು. ಇದು ಮರೆಯಲಾಗದ ಅನುಭವ. ಕೆಲವೊಮ್ಮೆ ತುಂಬಾ ಭಯಪಟ್ಟಿದ್ದೆ' ಎನ್ನುತ್ತಾರೆ ಅವರು.

'ಚಿತ್ರದಲ್ಲಿ ಜನರ ಮನಸ್ಸಿನ ಜತೆ ಆಟ ಆಡೋದನ್ನು ತೋರಿಸಿದ್ದಾರೆ. ಜನರ ಮೂಢನಂಬಿಕೆಯನ್ನು ಬಳಸಿಕೊಂಡು ನಾಯಕ ಹಣ ಮಾಡುವ ಕಥೆ ಚಿತ್ರದಲ್ಲಿದೆ. ಲಿಂಗ ಉದ್ಭ್ಭವ ಆಯ್ತು ಅಂತ ನಂಬಿಸಿ ಜನರಿಂದ ಹಣ ಸಂಗ್ರಹಿಸೋದು ಹೀಗೆ..' ಎಂದು ಸಿನಿಮಾದ ಸ್ವಾರಸ್ಯವನ್ನು ಹೇಳಿದ್ದಾರೆ ಅಮಿತಾ. ಚಿತ್ರವನ್ನು ಆರವ್‌ ಬಿ. ಧೀರೇಂದ್ರ ನಿರ್ದೇಶನ ಮಾಡಿದ್ದಾರೆ.

ಚಿತ್ರದಲ್ಲಿ ಒಳ್ಳೆಯ ಸಂದೇಶ ಇದೆ. ಇಂದು ನಮ್ಮ ಸಮಾಜದಲ್ಲಿ ಏನು ನಡೆಯುತ್ತಿದೆ. ಜನ ಹೇಗೆ ಮೋಸ ಹೋಗುತ್ತಿದ್ದಾರೆ ಅನ್ನೋದನ್ನು ಚಿತ್ರದಲ್ಲಿ ನೋಡಬಹುದು-ಅಮಿತಾ ಕುಲಾಲ್‌, ನಟಿ