ಗ್ರಾಮಾಯಣಕ್ಕೆ ಕನ್ನಡದ ಅಮೃತಾ ಅಯ್ಯರ್ ನಾಯಕಿ

ವಿನಯ್‌ ರಾಜ್‌ಕುಮಾರ್‌ ನಟನೆಯ ಗ್ರಾಮಾಯಣ ಸಿನಿಮಾಗೆ ನಾಯಕಿಯಾಗಿ ಅಮೃತಾ ಐಯ್ಯರ್‌ ಆಯ್ಕೆಯಾಗಿದ್ದಾರೆ. ಮೂಲತಃ ಬೆಂಗಳೂರಿನವರಾದ ಅಮೃತಾ ಅಯ್ಯರ್‌ ಈಗಾಗಲೇ ತಮಿಳಿನಲ್ಲಿ ನಾಲ್ಕು ಚಿತ್ರಗಳಲ್ಲಿ ನಟಿಸಿದ್ದಾರೆ.

ವಿನಯ್‌ ರಾಜ್‌ಕುಮಾರ್‌ ಮತ್ತು ಅಮೃತಾ ಇಬ್ಬರು ಬೆಂಗಳೂರಿನ ಒಂದೇ ಕಾಲೇಜಿನಲ್ಲಿ ಅಭ್ಯಾಸ ಮಾಡಿದ್ದಾರೆ. ಅಮೃತಾ ಅದ್ಭುತವಾಗಿ ಕನ್ನಡ ಮಾತನಾಡುತ್ತಾರೆ ಎನ್ನುವ ಕಾರಣಕ್ಕೆ ಅವರನ್ನು ನಾಯಕಿಯನ್ನಾಗಿ ಆಯ್ಕೆ ಮಾಡಿದ್ದಾರಂತೆ ನಿರ್ದೇಶಕರು.

ದೇವನೂರು ಚಂದ್ರ ನಿರ್ದೇಶನದ ಚಿತ್ರ ಗ್ರಾಮಾಯಣ. ಈ ಚಿತ್ರದ ಟೀಸರ್‌ ಶೂಟಿಂಗ್‌ ಅನ್ನು ಗಾಜನೂರಿನಲ್ಲಿ ಮಾಡಲಾಗುತ್ತಿದೆ. ವಿನಯ್‌ಗೆ ಜೋಡಿಯಾಗಿ ನಟಿಸುತ್ತಿರುವ ಅಮೃತಾ ಅಯ್ಯರ್‌ಗೆ ಇದು ಮೊದಲ ಕನ್ನಡ ಚಿತ್ರ ಆಗಲಿದೆ.

ಅಮೃತಾ ಅಯ್ಯರ್‌ ಈಗಾಗಲೇ ತಮಿಳು ಚಿತ್ರದಲ್ಲಿ ನಟಿಸಿದ್ದಾರೆ. ಕಾಲಿ ಮತ್ತು ಪದೈವೀರನ್‌ ಚಿತ್ರಗಳು ರಿಲೀಸ್‌ ಆಗಿದ್ದು, ಇನ್ನೊಂದು ತಮಿಳು ಚಿತ್ರದಲ್ಲಿ ಈಗ ನಟಿಸುತ್ತಿದ್ದಾರೆ.

ಗ್ರಾಮಾಯಣ ಚಿತ್ರದ ಶೂಟಿಂಗ್‌ಗಾಗಿ ರಾಘವೇಂದ್ರ ರಾಜ್‌ಕುಮಾರ್‌ ಮತ್ತು ಕುಟುಂಬ ಗಾಜನೂರಿಗೆ ತೆರಳಿದೆ. ರಾಜ್‌ಕುಮಾರ್‌ ಹುಟ್ಟೂರು ಗಾಜನೂರು. ಈಗಲೂ ಅಲ್ಲಿ ಅವರ ಮನೆ ಮತ್ತು ಜಮೀನು ಈಗಲೂ ಇದೆ. ಕುಟುಂಬದವರು ಆಗಾಗ್ಗೆ ಅಲ್ಲಿಗೆ ಹೋಗಿಬರುತ್ತಿರುತ್ತಾರೆ. ಮೊದಲ ಬಾರಿಗೆ ರಾಘವೇಂದ್ರ ರಾಜ್‌ಕುಮಾರ್‌ ಗಾಜನೂರಿನಲ್ಲಿ ಚಿತ್ರೀಕರಣ ಮಾಡಲು ನಿರ್ಧರಿಸಿದ್ದಾರೆ.