ಎಂಗೇಜ್‍ಮೆಂಟ್ ಆದ ತಕ್ಷಣ ಮದುವೆ ಆಗಬೇಕು ಅಂತೇನಿಲ್ಲ: ರಶ್ಮಿಕಾ ಮಂದಣ್ಣ

*ಹರೀಶ್ ಬಸವರಾಜ್

ಸದ್ಯಕ್ಕೆ ಸ್ಯಾಂಡಲ್‌ವುಡ್‌ ನ ಕ್ಯೂಟ್‌ ಜೋಡಿ ಎಂದೇ ಕರೆಯಲ್ಪಡುವ ರಕ್ಷಿತ್‌ ಶೆಟ್ಟಿ ಮತ್ತು ರಶ್ಮಿಕಾ ಮಂದಣ್ಣ ಅವರಿಗೆ ಸಂಬಂಧಪಟ್ಟ ವಿಶೇಷ ಸಂದರ್ಶನ ಇಲ್ಲಿದೆ.

*ತೆಲುಗಿನಲ್ಲಿ ನಟಿಸಿದ ಮೊದಲ ಚಿತ್ರ ಛಲೋ ದೊಡ್ಡ ಮಟ್ಟದಲ್ಲಿ ಸಕ್ಸಸ್‌ ಆಗಿದೆಯಲ್ಲ?

ಹೌದು. ಆ ಚಿತ್ರದ ಕಥೆ ಹಾಗಿತ್ತು. ಹಾಗಾಗಿ ದೊಡ್ಡ ಮಟ್ಟದಲ್ಲಿ ಸಿನಿಮಾ ಯಶಸ್ವಿಯಾಗಿದೆ. ನನ್ನ ಆರಂಭ ಕನ್ನಡದಲ್ಲಿ ಉತ್ತಮವಾಗಿ ಆದಂತೆಯೇ ತೆಲುಗಿನಲ್ಲೂ
ಆಗಿರುವುದು ಸಂತೋಷ ತಂದಿದೆ. ಇನ್ನೇನು ರಿಲೀಸ್‌ ಆಗಲಿರುವ ಮುಂದಿನ ಚಿತ್ರದಲ್ಲಿಯೂ ಒಳ್ಳೆ ಪಾತ್ರ ಮಾಡಿದ್ದೇನೆ.

*ರಕ್ಷಿತ್‌ ಶೆಟ್ಟಿಯ ಹಾಗೂ ನೀವೂ ಕಥೆಗಳನ್ನು ಒಟ್ಟಿಗೆ ಚರ್ಚೆ ಮಾಡುತ್ತೀರಂತೆ? ನಿಜವಾ?

ಇಲ್ಲ. ನನ್ನ ಕಥೆಗಳನ್ನು ನಾನು ಕೇಳುತ್ತೇನೆ. ಅವರ ಕಥೆಗಳನ್ನು ಅವರು ಕೇಳುತ್ತಾರೆ.ಅಲ್ಲದೇ ರಕ್ಷಿತ್‌ ಶೆಟ್ಟಿಯವರು ಯಾವುದಾದರೂ ಕಥೆ ಮಾಡಿಕೊಂಡರೆ ನನಗೆ ಫಸ್ಟ್‌ ಹೇಳುತ್ತಾರೆ. ನಾನು ಒಂದಷ್ಟು ಐಡಿಯಾಗಳನ್ನು ಕೊಡುತ್ತೇನೆ. ಈಗಾಗಲೇ ಒಂದಷ್ಟು ಕಥೆಗಳನ್ನು ಹೇಳಿದ್ದಾರೆ.

* ಹಾಗಾದರೆ ಸದ್ಯದಲ್ಲೇ ಇಬ್ಬರೂ ಒಟ್ಟಿಗೆ ನಟಿಸುತ್ತೀರಾ?

ಆ ಪ್ಲ್ಯಾನ್‌ ಇದೆ. ಆದರೆ ಇಬ್ಬರೂ ಬೇರೆ ಬೇರೆ ಕಮಿಟ್‌ಮೆಂಟ್‌ಗಳಲ್ಲಿ ಬ್ಯುಸಿಯಾಗಿರುವ ಕಾರಣ ಸದ್ಯಕ್ಕೆ ಆಗಲ್ಲ. ಆದರೆ ಒಟ್ಟಿಗೆ ನಟಿಸುತ್ತೇವೆ. ನಾವಿಬ್ಬರೂ ನಟಿಸುತ್ತೇವೆ ಎಂದರೆ ಒಂದು ವಿಶೇಷ ಕಥೆಯ ಅಗತ್ಯ ಇದೆ. ಹಾಗಾಗಿ ಅದು ಈಗಲೇ ಸಾಧ್ಯವಿಲ್ಲ.

*ಪ್ರೇಮಿಗಳ ದಿನಕ್ಕೆ ರಕ್ಷಿತ್‌ಗೆ ಏನು ಗಿಫ್ಟ್‌ ಕೊಟ್ರಿ? ಅವರು ನಿಮಗೆ ಏನು ಕೊಟ್ರು?

ನಾನು ಅಂದು ಹೈದಾರಾಬಾದ್‌ನಲ್ಲಿ ಶೂಟಿಂಗ್‌ನಲ್ಲಿದ್ದೆ. ಹಾಗಾಗಿ ನಾನು ಏನು ಕೊಡಲು ಸಾಧ್ಯವಾಗಲಿಲ್ಲ. ಅದರೆ ಅವರು ಶೂಟಿಂಗ್‌ ಸ್ಪಾಟ್‌ಗೆ ಸರ್‌ಪ್ರೈಸ್‌ ಆಗಿ ಗುಲಾಬಿ ಹೂವು ಕಳಿಸಿ ವಿಷ್‌ ಮಾಡಿದ್ದರು. ನಾನು ಬೆಂಗಳೂರಿಗೆ ಬಂದ ತಕ್ಷಣ ಏನಾದರೂ ಕೊಡುತ್ತೇನೆ.

*ಒಂದಷ್ಟು ಸಿನಿಮಾಗಳನ್ನು ನೀವು ರಿಜೆಕ್ಟ್ ಮಾಡಿದ್ರಿ ಅಂತ ಸುದ್ದಿ ಇದೆ..

ಹಾಗೇನಿಲ್ಲ. ನನಗೆ ಪರ್ಫಾಮೆನ್ಸ್‌ ಮಾಡಲು ಅವಕಾಶ ಇದ್ದರೆ ಮಾತ್ರ ಅಂಥ ಪಾತ್ರಗಳನ್ನು ಒಪ್ಪಿಕೊಳ್ಳುತ್ತೇನೆ. ಸುಮ್ಮನೆ ಹೀಗೆ ಬಂದು ಹಾಗೇ ಹೋಗುವ ಪಾತ್ರಗಳನ್ನು ಒಪ್ಪಿಕೊಳ್ಳುವುದಿಲ್ಲ. ಈಗ ‘ಛಲೋ’ ಚಿತ್ರದಲ್ಲಿಯೂ ನನ್ನ ಪಾತ್ರದ ಬಗ್ಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಈಗ ಒಪ್ಪಿಕೊಂಡಿರುವ ಎರಡು ಚಿತ್ರಗಳಲ್ಲಿಯೂ ಉತ್ತಮ ಪಾತ್ರಗಳು ಸಿಕ್ಕಿವೆ. ಸಾಕಷ್ಟು ಕಥೆಗಳು ಕೇಳಿದ್ದೇನೆ, ಕೆಲವು ಇಷ್ಟ ಆಗಿಲ್ಲ, ಅದಕ್ಕೆ ನಿರಾಕರಿಸಿದ್ದೇನೆ. ಉತ್ತಮ ಕಲಾವಿದೆಯಾಗಿ ನಿಲ್ಲಬೇಕು ಎಂಬುದು ನನ್ನಾಸೆ. ಆ ನಿಟ್ಟಿನಲ್ಲಿ ಒಳ್ಳೊಳ್ಳೆ ಸ್ಕ್ರಿಪ್ಟ್‌ಗಳ ಆಯ್ಕೆಯಲ್ಲಿದ್ದೇನೆ.

*ಮದುವೆ ಯಾವಾಗ?

ನಾವು ಎಂಗೇಜ್‌ ಮಾಡಿಕೊಂಡಿದ್ದೇವೆ ಅಂದ ಮಾತ್ರಕ್ಕೆ ತಕ್ಷಣ ಮದುವೆಯಾಗಬೇಕು ಅಂತಲ್ಲ. ಬಹಳಷ್ಟು ಜನ ನನ್ನನ್ನು ಕೇಳಿದ್ರು ಇಷ್ಟು ಚಿಕ್ಕ ವಯಸ್ಸಿಗೆ ಮದುವೆ ಯಾಕೆ ಅಂತಾ. ಎಲ್ಲರಿಗೂ ಹೇಳಿದ್ದೇನೆ ನಾನು ಎಂಗೇಜ್‌ಮೆಂಟ್‌ ಮಾಡಿಕೊಂಡಿದ್ದೇನೆ ಅಷ್ಟೇ. ಕರಿಯರ್‌ ಚೆನ್ನಾಗಿ ಹೋಗುತ್ತಿದೆ. ತಡವಾಗಿ ಮದುವೆಯಾಗುತ್ತೇನೆ ಅಂತ ಹೇಳುತ್ತಿದ್ದೇನೆ. 


'ನಾನು ರಕ್ಷಿತ್‌ ಇಬ್ಬರೂ ಒಂದು ರೀತಿ ಕ್ಲೋಸ್‌ ಫ್ರೆಂಡ್ಸ್‌ ರೀತಿ ಇರುತ್ತೇವೆ. ಶೂಟಿಂಗ್‌ ಸಮಯದಲ್ಲಿ ಆದ ಘಟನೆಗಳು, ಅವರ ಫೀಲಿಂಗ್ಸ್‌ಗಳನ್ನು ನನ್ನ ಬಳಿ ಶೇರ್‌ ಮಾಡುತ್ತಾರೆ. ನಾನು ಏನೇ ಇದ್ದರೂ ಅವರ ಬಳಿ ಹಂಚಿಕೊಳ್ಳುತ್ತೇನೆ.'

-ರಶ್ಮಿಕಾ ಮಂದಣ್ಣ, ನಟಿ