*ಶರಣು ಹುಲ್ಲೂರು
ಮೂರು ದಶಕಗಳ ಹಿಂದೆ 'ಬೆಂಕಿಯಲ್ಲಿ ಅರಳಿದ ಹೂವು' ಸಿನಿಮಾದಲ್ಲಿ ಒಟ್ಟಾಗಿ ನಟಿಸಿದ್ದ ಸುಹಾಸಿನಿ ಮತ್ತು ವಿಜಯಲಕ್ಷ್ಮಿ ಸಿಂಗ್‌, ಈಗ ಒಂದೇ ಸಿನಿಮಾದಲ್ಲಿ ಮತ್ತೆ ಕೆಲಸ ಮಾಡುತ್ತಿದ್ದಾರೆ. ಅಂದು ಒಟ್ಟಾಗಿ ಬಣ್ಣ ಹಚ್ಚಿದ್ದವರು ಈಗ ಹೊಸ ಸಿನಿಮಾದಲ್ಲಿ ಸುಹಾಸಿನಿ ನಟಿಸುತ್ತಿದ್ದರೆ ವಿಜಯಲಕ್ಷ್ಮಿ ಸಿಂಗ್‌ ಆ್ಯಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಯಾನ ಹೆಸರಿನಲ್ಲಿ ಸಿನಿಮಾ ಮೂಡಿ ಬರುತ್ತಿದೆ. ಈ ಚಿತ್ರದ ಮತ್ತೊಂದು ವಿಶೇಷತೆ ಅಂದರೆ, ಬಹುಕಾಲದ ನಂತರ ಅನಂತ್‌ ನಾಗ್‌ ಜತೆ ಸುಹಾಸಿನಿ ತೆರೆ ಹಂಚಿಕೊಳ್ಳುತ್ತಿದ್ದಾರೆ.
'ಒಂದು ಕಾಲದ ಹಾಟ್‌ ಫೇವರಿಟ್‌ ಜೋಡಿ ಅನಂತ್‌ ನಾಗ್‌ ಮತ್ತು ಸುಹಾಸಿನಿ. ಈ ಜೋಡಿಯ ಜತೆ ಕೆಲಸ ಮಾಡಬೇಕು ಅನ್ನುವುದು ನನ್ನ ಕನಸಾಗಿತ್ತು. ಹಾಗಾಗಿ ಯಾನ ಚಿತ್ರದ ಕಥೆ ಬರೆಯುತ್ತಲೇ ಆ ಪಾತ್ರಕ್ಕೆ ಸುಹಾಸಿನಿಯವರೇ ಬೇಕು ಅಂತ ಅನಿಸಿತ್ತು. ಅಲ್ಲದೇ ಸುಹಾಸಿನಿ ಅವರು ನನ್ನ ಸಿನಿಮಾದಲ್ಲಿ ನಟಿಸಬೇಕು ಅನ್ನುವುದು ದಶಕಗಳ ಕನಸಾಗಿತ್ತು. ಈಗ ಅದು ನನಸಾಗಿದೆ' ಅಂತಾರೆ ನಿರ್ದೇಶಕಿ.
1982ರ ಕಾಲದಿಂದಲೂ ಸುಹಾಸಿನಿ ಮತ್ತು ವಿಜಯಲಕ್ಷ್ಮಿ ಸಿಂಗ್‌ ಇಬ್ಬರೂ ಸ್ನೇಹಿತೆಯರು. ಬೆಂಕಿಯಲ್ಲಿ ಅರಳಿದ ಹೂವು ಚಿತ್ರದಲ್ಲಿ ಒಟ್ಟಾಗಿ ನಟಿಸಿದ್ದರಿಂದ ಸ್ನೇಹ ಗಾಢವಾಗಿತ್ತು. ಹಾಗಾಗಿ ಒಟ್ಟಿಗೆ ಸಿಕ್ಕಾಗೆಲ್ಲ, 'ನನ್ನನ್ನು ಹಾಕಿಕೊಂಡು ಯಾವಾಗ ಸಿನಿಮಾ ಮಾಡ್ತೀಯಾ' ಅಂತ ಸುಹಾಸಿನಿ ಕೇಳುತ್ತಿದ್ದರಂತೆ. ಈಗ ಯಾನದ ಮೂಲಕ ಕಾಲ ಕೂಡಿ ಬಂದಿದೆ' ಅನ್ನುವುದು ನಿರ್ದೇಶಕಿ ವಿಜಯಲಕ್ಷ್ಮಿ ಸಿಂಗ್‌ ಮಾತು.
ಹೊಸ ನೀರು ಚಿತ್ರದಲ್ಲಿ ಅನಂತ್‌ ಮತ್ತು ಸುಹಾಸಿನಿ ಈ ಜೋಡಿ ಪ್ರೇಕ್ಷ ಕರಿಗೆ ಮೋಡಿ ಮಾಡಿತ್ತು. ಆನಂತರ ಇಬ್ಬರೂ ಎಂಟು ಸಿನಿಮಾಗಳಲ್ಲಿ ಒಟ್ಟಾಗಿ ನಟಿಸಿದ್ದಾರೆ. ಯಾನ ಇವರ ಒಂಭತ್ತನೇ ಚಿತ್ರವಂತೆ. ಈಗಾಗಲೇ ಸಿನಿಮಾದ ಶೂಟಿಂಗ್‌ ಶುರುವಾಗಿದೆ. ನಿರ್ದೇಶಕಿಯರ ಮೂವರು ಮಕ್ಕಳು ಸಿನಿಮಾದ ಮೂಲಕ ಸಿನಿಮಾ ರಂಗಕ್ಕೆ ಪ್ರವೇಶ ಮಾಡಿದ್ದಾರೆ.