ಅನುಕ್ತ ಸಿನಿಮಾ ಸೈಕಲಾಜಿಕಲ್‌ ಥ್ರಿಲ್ಲರ್‌ ಎಂದ ನಿರ್ದೇಶಕ

- ಶರಣು ಹುಲ್ಲೂರು

ಅನುಕ್ತ ಸಿನಿಮಾದಲ್ಲಿ ಮೊದಲ ಬಾರಿಗೆ ವಿಶೇಷ ಕಥೆಯನ್ನು ಹೇಳಲು ಹೊರಟಿದ್ದೇವೆ. ಕಥೆಯೇ ಚಿತ್ರವನ್ನು ನೋಡಿಸಿಕೊಂಡು ಹೋಗುತ್ತದೆ ಎಂದು ನಿರ್ದೇಶಕ ಅಶ್ವತ್ಥ್‌ ಸಾಮ್ಯುಯಲ್‌ ತಿಳಿಸಿದ್ದಾರೆ.

'ಇದೊಂದು ಸೈಕಲಾಜಿಕಲ್‌ ಥ್ರಿಲ್ಲರ್‌ ಮಾದರಿಯ ಸಿನಿಮಾ. ನೂರಾರು ವರ್ಷದ ಹಳೆಯ ಮನೆಯಲ್ಲಿ ಚಿತ್ರದ ಶೂಟಿಂಗ್‌ ಮಾಡಿದ್ದೇವೆ. ಅನುಭವಿ ಕಲಾವಿದರ ತಂಡವೇ ಇಲ್ಲಿದೆ. ಹಾಗಾಗಿ ಪ್ರೇಕ್ಷಕರಿಗೆ ಈ ಸಿನಿಮಾ ಥ್ರಿಲ್‌ ನೀಡುತ್ತದೆ' ಎಂದು ಅವರು ತಿಳಿಸಿದ್ದಾರೆ.

ಈ ಸಿನಿಮಾದ ಮತ್ತೊಂದು ವಿಶೇಷವೆಂದರೆ ಸಂಗೀತ. ನೊಬಿನ್‌ ಪಾಲ್‌ ಈ ಚಿತ್ರಕ್ಕೆ ಭಾರತೀಯ ಸಂಗೀತ ವಾದ್ಯಗಳನ್ನೇ ಬಳಸಿದ್ದಾರೆ. ಅಪರೂಪದ ವಾದ್ಯಗಳ ಸಂಗೀತವನ್ನು ಈ ಚಿತ್ರದಲ್ಲಿ ಕೇಳಬಹುದು. 'ಎಲ್ಲ ವರ್ಗದ ನೋಡುಗರಿಗೂ ಈ ಸಿನಿಮಾ ಇಷ್ಟವಾಗಲಿದೆ. ವಿಶೇಷವಾಗಿ ಯುವಕರಿಗೆ ಕನೆಕ್ಟ್ ಆಗುವಂಥ ಕೆಲವು ವಿಷಯಗಳು ಇಲ್ಲಿವೆ. ಪ್ರೇಕ್ಷಕರಿಗೆ ಇಷ್ಟವಾಗುವಂಥ ಸಂಗತಿಗಳನ್ನು ಈ ಚಿತ್ರದಲ್ಲಿ ಹೇಳಿದ್ದೇನೆ. ಹಾಗಾಗಿ ಇದೊಂದು ಹೊಸ ಬಗೆಯ ಸಿನಿಮಾ ಎಂದು ಹೇಳಿಕೊಳ್ಳಲು ಹೆಮ್ಮೆ ಅನಿಸುತ್ತದೆ' ಎಂದು ಅವರು ಹೇಳಿದ್ದಾರೆ.

ಹಲವು ವರ್ಷಗಳ ನಂತರ ಬಹುಭಾಷಾ ನಟ ಸಂಪತ್‌ ಮತ್ತು ಅನು ಪ್ರಭಾಕರ್‌ ನಟಿಸಿದ್ದಾರೆ. ಕಾರ್ತಿಕ್‌ ಅತ್ತಾವರ್‌ ಮುಖ್ಯ ಭೂಮಿಕೆಯಲ್ಲಿದ್ದು, ಸಂಗೀತಾ ಭಟ್‌ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. 'ಚಿತ್ರಕಥೆ ಹೇಳಿದ ರೀತಿಯೇ ವಿಭಿನ್ನವಾಗಿದ್ದು, ಅದಕ್ಕೆ ತಕ್ಕಂತೆ ಕಲಾವಿದರನ್ನು ಆಯ್ಕೆ ಮಾಡಿದ್ದೇನೆ. ಒಂದು ಸಂಸ್ಕೃತಿಯ ಜತೆ ಮಿಳಿತವಾದ ಸಿನಿಮಾ ಇದಾಗಿದೆ' ಎಂದು ಅವರು ಹೇಳಿಕೊಂಡಿದ್ದಾರೆ.

ದೆಯಿ ಪ್ರೊಡಕ್ಷನ್ಸ್‌ ಲಾಂಛನದಲ್ಲಿ ಈ ಸಿನಿಮಾ ನಿರ್ಮಾಣವಾಗಿದ್ದು, ಹರೀಶ್‌ ಬಂಗೇರ ನಿರ್ಮಾಪಕರು. 'ನಿರ್ದೇಶಕರು ಕಥೆ ಹೇಳಿದಾಗ ತುಂಬಾ ಇಷ್ಟವಾಯಿತು. ಕಥೆಗಾಗಿಯೇ ಹಳೆ ಮನೆಯನ್ನು ಹುಡುಕಿದೆವು. ಸಿನಿಮಾಟೋಗ್ರಫಿ ತುಂಬಾ ಚೆನ್ನಾಗಿದೆ. ಎಲ್ಲರಿಗೂ ಈ ಸಿನಿಮಾ ತಲುಪಲಿದೆ ಎಂಬ ನಂಬಿಕೆ ನಮ್ಮದು' ಎನ್ನುತ್ತಾರೆ ಹರೀಶ್‌ ಬಂಗೇರ.

ಇದು ಸಸ್ಪೆನ್ಸ್‌ ಮತ್ತು ಥ್ರಿಲ್ಲರ್‌ ಮಾದರಿಯ ಸಿನಿಮಾವಾಗಿದ್ದರೂ ಎಲ್ಲಿಯೂ ನೋಡುಗರಿಗೆ ಭಯ ಉಂಟು ಮಾಡುವುದಿಲ್ಲ. ರಕ್ತಪಾತವಿಲ್ಲ. ಮೇಕಿಂಗ್‌ನಿಂದಾಗಿಯೇ ನೋಡಿಸಿಕೊಂಡು ಹೋಗುವ ಸಿನಿಮಾ ಇದು ಎಂದು ಅವರು ಹೇಳಿದ್ದಾರೆ.