'ಮದಗಜ'ದ ಜತೆ ಅನುಪಮಾ ಪರಮೇಶ್ವರನ್ ರೊಮ್ಯಾನ್ಸ್

ಶ್ರೀಮುರಳಿ ನಟನೆಯ ಮದಗಜ ಚಿತ್ರಕ್ಕೆ ನಾಯಕಿಯಾಗಿ ಮಲೆಯಾಳಂ ನಟಿ ಅನುಪಮಾ ಪರಮೇಶ್ವರನ್‌ ಆಯ್ಕೆಯಾಗುವ ನಿರೀಕ್ಷೆ ಇದೆ. ನಿರ್ದೇಶಕ ಮಹೇಶ್‌ ಕುಮಾರ್‌ ಈಗಾಗಲೇ ಅನುಪಮಾ ಜತೆ ಮಾತುಕತೆ ನಡೆಸಿದ್ದಾರೆ. ಅಯೋಗ್ಯ ಚಿತ್ರದ ನಂತರ ಮಹೇಶ್ ಕೈಗೆತ್ತಿಕೊಂಡಿದ್ದಾರೆ ಸಿನಿಮಾ ಇದು.

ಅನುಪಮಾ ಡೇಟ್ಸ್‌ ನೋಡಿಕೊಂಡು ಶೂಟಿಂಗ್‌ಗೆ ಪ್ಲ್ಯಾನ್‌ ಮಾಡುವುದಾಗಿ ಅವರು ಹೇಳಿದ್ದು, ಬಹುತೇಕ ಮುಂದಿನ ತಿಂಗಳು ಸಿನಿಮಾ ಸೆಟ್ಟೇರುವ ಸಾಧ್ಯತೆ ಇದೆ. ಇದಕ್ಕೂ ಮೊದಲು ಅನುಪಮಾ ಅವರು ನಟಸಾರ್ವಭೌಮ ಚಿತ್ರದಲ್ಲಿ ಪುನೀತ್‌ ಜತೆ ನಟಿಸಿದ್ದರು. ಮಹೇಶ್‌ ಕುಮಾರ್‌ ಕೂಡ ಅಯೋಗ್ಯ ಚಿತ್ರವನ್ನು ನಿರ್ದೇಶಿಸಿದ್ದರು. ಮದಗಜಕ್ಕೆ ಮಾಸ್ತಿ ಸಂಭಾಷಣೆ ಬರೆಯುತ್ತಿದ್ದಾರೆ.

ಹತ್ತು ಹಲವು ವಿಶೇಷಗಳನ್ನು ಹೊತ್ತು ಈ ಸಿನಿಮಾ ತಯಾರಾಗಲಿದೆಯಂತೆ. ಈ ಚಿತ್ರಕ್ಕಾಗಿ ನಾಯಕ ಶ್ರೀಮುರಳಿ ಭರ್ಜರಿಯಾಗಿ ತಯಾರಿ ನಡೆಸಿದ್ದಾರೆ. ಲುಕ್‌ ಕೂಡ ಬದಲಾಯಿಸಿಕೊಳ್ಳಲಿದ್ದಾರೆ. ಐದು ಸಾವಿರಕ್ಕೂ ಹೆಚ್ಚು ಜ್ಯೂನಿಯರ್‌ ಕಲಾವಿದರು ಮತ್ತು ಆನೆಗಳನ್ನೂ ಬಳಸಿಕೊಳ್ಳಲಾಗುತ್ತದೆಯಂತೆ.

ಜನವರಿ 26ರಂದು ಮದಗಜ ಚಿತ್ರದ ಮೋಷನ್ ಟೀಸರ್ ರಿಲೀಸ್ ಆಗಿತ್ತು. ಕಂಪ್ಯೂಟರ್‌ ಗ್ರಾಫಿಕ್ಸ್‌ ಮೂಲಕ ಜಾತ್ರೆ ದೃಶ್ಯಗಳನ್ನು ಸೃಷ್ಟಿ ಮಾಡಲಾಗಿದ್ದು ಇದು ವೈರಲ್ ಆಗಿತ್ತು. ಮುಖ್ಯವಾಗಿ ಈ ಸಿನಿಮಾಗೆ ಮಾಸ್ತಿ ಸಂಭಾಷಣೆ ಬರೆದಿದ್ದು ಸಿನಿಮಾ ಬಗೆಗಿನ ನಿರೀಕ್ಷೆಗಳು ದುಪ್ಪಟ್ಟಾಗಿವೆ.