ಅಣ್ಣಾವ್ರು ಲೆಜೆಂಡ್‌ ಎಂದ ಅನುಷ್ಕಾ

ಬಾಹುಬಲಿ ಖ್ಯಾತಿಯ ಅನುಷ್ಕಾ ಶೆಟ್ಟಿ ದಕ್ಷಿಣ ಭಾರತದ ಜನಪ್ರಿಯ ನಟಿ. ಬುಧವಾರ ರಾಜ್‌ ಹುಟ್ಟುಹಬ್ಬದಂದು ಸಾಮಾಜಿಕ ಜಾಲತಾಣದಲ್ಲಿ ಅವರನ್ನು ಸ್ಮರಿಸಿಕೊಂಡಿದ್ದಾರೆ ಅನುಷ್ಕಾ. ಯಾಕೆಂದರೆ, ಇವರು ಕನ್ನಡದ ಹುಡುಗಿ.

ರಾಜ್ಯಾದ್ಯಂತ ರಾಜ್‌ಕುಮಾರ್‌ ಹುಟ್ಟುಹಬ್ಬದಂದು ಎಲ್ಲರೂ ಸ್ಮರಿಸುವಾಗ ಅನುಷ್ಕಾ ಶೆಟ್ಟಿ ರಾಜ್‌ರಿಗೆ ನಮನ ಸಲ್ಲಿಸುವುದನ್ನು ಮರೆಯಲಿಲ್ಲ. ಕರಾವಳಿಯ ಈ ಬೆಡಗಿ ಫೇಸ್‌ಬುಕ್‌ನಲ್ಲಿ ರಾಜ್‌ ಕುಮಾರ್‌ ಫೋಟೋ ಹಾಕಿ 'ಡಾ. ರಾಜ್‌ಕುಮಾರ್‌ ಸರ್‌ 90ನೇ ಹುಟ್ಟುಹಬ್ಬದಂದು ಸ್ಮರಿಸುತ್ತಿದ್ದೇನೆ..ಅವರು ಲೆಜೆಂಡ್‌' ಎಂದು ಬರೆದುಕೊಂಡಿದ್ದಾರೆ.

ಅನುಷ್ಕಾ ತಮಿಳು ತೆಲುಗು ಚಿತ್ರಗಳಲ್ಲಿ ಬಿಝಿಯಾಗಿದ್ದರೂ ಕನ್ನಡ ಸಿನಿ ಪ್ರಿಯರಿಗೆ ಅಚ್ಚುಮೆಚ್ಚು. ಬಾಹುಬಲಿ ಮೂಲಕ ಕನ್ನಡಿಗರಿಗೆ ಇನ್ನಷ್ಟು ಹತ್ತಿರವಾದ ಅನುಷ್ಕಾ ರಾಜ್‌ರನ್ನು ಸ್ಮರಿಸಿರುವುದು ಅಭಿಮಾನಿಗಳಿಗೆ ಸಂತಸ ತಂದಿದೆ.