'ಅರ್ಜುನ್‌ ರೆಡ್ಡಿ'ಯಿಂದ 'ಚಮಕ್‌' ಆಡಿಯೋ ಬಿಡುಗಡೆ?

ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಹಾಗೂ 'ಕಿರಿಕ್‌ ಪಾರ್ಟಿ' ಚೆಲುವೆ ರಶ್ಮಿಕಾ ಮಂದಣ್ಣ ಒಟ್ಟಾಗಿ ಕಾಣಿಸಿಕೊಳ್ಳುತ್ತಿರುವ ಚಿತ್ರ 'ಚಮಕ್‌'. ಈಗಾಗಲೇ ಫಸ್ಟ್‌ ನೈಟ್‌ ಟೀಸರ್‌ ಮೂಲಕ ಎಲ್ಲರಿಗೂ 'ಚಮಕ್‌' ಕೊಟ್ಟಿರುವ ಚಿತ್ರ ತಂಡ, ಡಿಸೆಂಬರ್‌ 4ರಂದು ಚಿತ್ರದ ಆಡಿಯೋವನ್ನು ಬಿಡುಗಡೆ ಮಾಡಲಿದೆ.

ಆಡಿಯೋ ಬಿಡುಗಡೆಗೆ ಸಂಬಂಧಿಸಿದಂತೆ ವಿಶೇಷ ಟೀಸರ್‌ವೊಂದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿರುವ 'ಚಮಕ್‌' ಚಿತ್ರ ತಂಡ, ಕನ್ನಡ ಸಿನಿ ರಸಿಕರಲ್ಲಿ ಸಾಕಷ್ಟು ಕುತೂಹಲ ಮೂಡುವಂತೆ ಮಾಡಿದೆ. ಅಂದಹಾಗೆ 'ಚಮಕ್‌' ಆಡಿಯೋ ಬಿಡುಗಡೆಗೆ ವಿಶೇಷ ಅತಿಥಿಯೊಬ್ಬರು ಬರುತ್ತಿದ್ದಾರೆ. ಆಡಿಯೋ ಟೀಸರ್‌ ಮೂಲಕ ಆ ವಿಶೇಷ ಅತಿಥಿ ಯಾರೆಂದು ಊಹಿಸುವಂತೆ ಕೇಳಿಕೊಂಡಿದೆ ಚಿತ್ರ ತಂಡ.



ಮೂಲಗಳ ಪ್ರಕಾರ ಸೋಮವಾರ ನಡೆಯಲಿರುವ 'ಚಮಕ್‌' ಆಡಿಯೋ ಬಿಡುಗಡೆ ಸಮಾರಂಭಕ್ಕೆ ಟಾಲಿವುಡ್‌ನ ಯಂಗ್‌ ಸ್ಟಾರ್‌ ವಿಜಯ್‌ ದೇವರಕೊಂಡ ಆಗಮಿಸಲಿದ್ದಾರಂತೆ. 'ಪೆಳ್ಳಿಚೂಪುಲು' ಹಾಗೂ 'ಅರ್ಜುನ್‌ ರೆಡ್ಡಿ' ಚಿತ್ರಗಳ ಮೂಲಕ ಟಾಲಿವುಡ್‌ನಲ್ಲಿ ಹೊಸ ಅಲೆಯನ್ನು ಸೃಷ್ಟಿಸಿರುವ ವಿಜಯ್‌, ಚಮಕ್‌ ಆಡಿಯೋವನ್ನು ಬಿಡುಗಡೆ ಮಾಡಲಿದ್ದಾರೆಂದು ಹೇಳಲಾಗುತ್ತಿದೆ. ವಿಜಯ್‌ ಅಭಿನಯದ ಮುಂದಿನ ತೆಲುಗು ಚಿತ್ರದಲ್ಲಿ ರಶ್ಮಿಕಾ ಮಂದಣ್ಣ ನಾಯಕಿಯಾಗಿ ನಟಿಸುತ್ತಿರುವುದು ಮತ್ತೊಂದು ವಿಶೇಷ.