ಬಾಲಿವುಡ್‌ಗೆ ಭದ್ರಾವತಿ ಹುಡುಗಿ

ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಿ ಗಮನ ಸೆಳೆದಿದ್ದ ಕನ್ನಡದ ಹುಡುಗಿ ಈಗ ಸಿನಿಮಾ ನಟಿ. ಹಿಂದಿಯ ಜಂಗ್ಲಿ ಎಂಬ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಆಡಿಷನ್‌ ಮೂಲಕ ಬಾಲಿವುಡ್‌ ಚಿತ್ರಕ್ಕೆ ಆಯ್ಕೆಯಾದ ಆಶಾ ಭಟ್‌ ಈಗ ಆಶಾವಾದಿಯಾಗಿದ್ದಾರೆ.

ಅಮೆರಿಕ ಮೂಲಕ ಚುಕ್‌ ರುಸೆಲ್‌ ನಿರ್ದೇಶನದ ಚಿತ್ರ ಇದು. ಹಾಗಾಗಿ ಉಜ್ವಲ ಭವಿಷ್ಯದತ್ತ ಕಣ್ಣು ನೆಟ್ಟಿದ್ದಾರೆ ಆಶಾ. ಡಾನ್ಸ್‌ ಕಲಿತಿರುವ ಆಶಾ ಮಾರ್ಷಲ್‌ ಆರ್ಟ್ಸ್ ಪರಿಣಿತೆ ಕೂಡಾ. ನಾಟಕಗಳಲ್ಲಿ ನಟಿಸುತ್ತಾ ಮಾಡೆಲಿಂಗ್‌ ಕ್ಷೇತ್ರಕ್ಕೆ ಕಾಲಿಟ್ಟ ಆಶಾ ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಿ ಗಮನ ಸೆಳೆದರು. ಈಗ ಬಾಲಿವುಡ್‌ನಲ್ಲಿ ಅವಕಾಶ ಪಡೆದು ಅಚ್ಚರಿ ಮೂಡಿಸಿದ್ದಾರೆ.

'ನನ್ನ ಅಪ್ಪ ಅಮ್ಮ, ತಂಗಿ ಎಲ್ಲರ ಜತೆ ಕೂತು ನನ್ನ ಸಿನಿ ಬದುಕಿನ ಬಗ್ಗೆ ಯೋಚಿಸಿದೆ. ಸಿನಿಮಾರಂಗದಲ್ಲಿ ಯಾಕೆ ಪ್ರಯತ್ನಿಸಬಾರದು ಎನ್ನಿಸಿತು. ಬಾಲಿವುಡ್‌ ಚಿತ್ರಕ್ಕೆ ಕಾಲ್‌ ಮಾಡಿದ್ದರು. ನಾನು ಆಡಿಷನ್‌ಗೆ ಹೋದೆ. ಆಯ್ಕೆ ಆದೆ'ಎಂದಿದ್ದಾರೆ ಆಶಾ.

2014ರಲ್ಲಿ ಮಿಸ್‌ ಸುಪ್ರಾನ್ಯಾಷನಲ್‌ ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದರು ಆಶಾ. ಎಲೆಕ್ಟ್ರಾನಿಕ್ಸ್‌ನಲ್ಲಿ ಎಂಜಿನಿಯರ್‌ ಪದವೀಧರೆ. ಟೈಮ್ಸ್‌ ಆಫ್‌ ಇಂಡಿಯಾ ಸಂಸ್ಥೆ ಏರ್ಪಡಿಸಿದ್ದ ಸೌಂದರ್ಯ ಸ್ಪರ್ಧೆಯಲ್ಲಿ ಮೊದಲು ಅವರು ಭಾಗವಹಿಸಿದ್ದರು. ಪ್ರತಿಷ್ಠಿತ ಕಂಪನಿಗಳ ಜಾಹಿರಾತಿಗೆ ಮಾಡೆಲ್‌ ಆಗಿ ಕಾಣಿಸಿಕೊಂಡಿದ್ದಾರೆ.