ಗಂಡ ಮಿಸ್ಸಿಂಗ್ ಎಂದು ಅಲವತ್ತುಕೊಂಡ ಕನ್ನಡದ 'ದೃಶ್ಯ' ನಟಿ

ನಟ, ನಟಿಯರು ತಮ್ಮ ಸಿನಿಮಾ ಪ್ರಚಾರಕ್ಕಾಗಿ ವಿನೂತನ ಮಾರ್ಗಗಳ ಮೊರ ಹೋಗುತ್ತಿರುವುದಕ್ಕೆ ಇಲ್ಲಿದೆ ನೋಡಿ ಒಂದು ತಾಜಾ ನಿದರ್ಶನ. ಒಮ್ಮೊಮ್ಮೆ ಅವುಗಳಿಂದ ಪೇಚಾಟವೂ ತಪ್ಪಿದ್ದಲ್ಲ. ಇತ್ತೀಚೆಗೆ ಇಂತಹ ಅನುಭವ ಕನ್ನಡದ 'ದೃಶ್ಯ' ಚಿತ್ರದಲ್ಲಿ ಅಭಿನಯಿಸಿರುವ ಖ್ಯಾತ ಮಲಯಾಳಂ ನಟಿ ಆಶಾ ಶರತ್‌ಗೆ ಎದುರಾಗಿದೆ.

ಇವರು ಮಲಯಾಳಂನಲ್ಲಿ ನಟಿಸಿರುವ ಸಿನಿಮಾ 'ಎವಿಡೇ'. ಈ ಸಿನಿಮಾ ಪ್ರಚಾರಕ್ಕಾಗಿ ಇತ್ತೀಚೆಗೆ ಆಶಾ ತನ್ನ ಫೇಸ್‌ಬುಕ್‌ನಲ್ಲಿ ಒಂದು ವೀಡಿಯೊ ಪೊಸ್ಟ್ ಮಾಡಿದ್ದರು. ಇದರಲ್ಲಿ ಮಾತನಾಡುತ್ತಾ, "ನನ್ನ ಗಂಡ ಕಾಣೆಯಾಗಿದ್ದಾರೆ. ನಿಮಗೆ ಅವರು ಸುಳಿವು ಸಿಕ್ಕಿದರೆ ಕೇರಳದಲ್ಲಿನ ಕಟ್ಟಪ್ಪನ ಪೊಲೀಸ್ ಠಾಣೆಗೆ ದೂರು ನೀಡಿ" ಎಂದಿದ್ದಾರೆ.

ಮುಖಕ್ಕೆ ಮೇಕಪ್ ಇಲ್ಲದೆ ನೋವಿನಲ್ಲಿರುವಂತೆ ಅವರು ಈ ವೀಡಿಯೊ ಪೋಸ್ಟ್ ಮಾಡಿದ ಕಾರಣ ಬಹಳಷ್ಟು ಮಂದಿ ನಿಜ ಎಂದು ಭಾವಿಸಿದರು. ವಕೀಲರೊಬ್ಬರು ಪೊಲೀಸ್ ಠಾಣೆಗೆ ದೂರು ಸಹ ನೀಡಿದರು. ವಿಷಯ ಗಂಭೀರವಾದ ಕಾರಣ ಇದು ಸಿನಿಮಾಗಾಗಿ ಮಾಡಿದ ಪ್ರಚಾರ ತಂತ್ರದ ವೀಡಿಯೊ ಎಂದು ಅಸಲಿ ಸಂಗತಿಯನ್ನು ಬಾಯ್ಬಿಟ್ಟಿದ್ದಾರೆ ನಟಿ ಆಶಾ. ಹಾಗಾಗಿ ನೆಟ್ಟಿಗರು ಆಶಾ ಅವರ ಮೇಲೆ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಈ ಹಿಂದೆ ಇಂತಹದ್ದೇ ಘಟನೆ ನಟಿ ಶೋಭನಾ ಅವರಿಗೂ ಎದುರಾಗಿತ್ತು. ಅವರು ನಟಿಸಿರುವ 'ಇನ್ನಾಲೇ' ಎಂಬ ಸಿನಿಮಾ ಪ್ರಚಾರದಲ್ಲಿ ಪತ್ರಿಕೆಯೊಂದರಲ್ಲಿ ಜಾಹೀರಾತು ನೀಡಲಾಗಿತ್ತು. ಆ ಜಾಹೀರಾತಿನಲ್ಲಿ ಮಗುವೊಂದು ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದು ನೆನಪನ್ನು ಕಳೆದುಕೊಂಡಿದೆ. ಆಕೆ ಕಾಣೆಯಾಗಿದ್ದಾಳೆಂದು ಹೇಳಲಾಗಿತ್ತು. ಅಷ್ಟೇ ಅಲ್ಲದೆ ಆ ಮಗುವಿನ ಬಗ್ಗೆ ಗೊತ್ತಾದರೆ ಮಾಹಿತಿ ನೀಡಬೇಕೆಂದು ಫೋನ್ ನಂಬರ್ ಸಹ ನೀಡಿದ್ದರು. ಬಹಳಷ್ಟು ಮಂದಿ ಆ ನಂಬರ್‌ಗೆ ಫೋನ್ ಮಾಡಿ ಫೂಲ್ ಆಗಿದ್ದರು. ಕಡೆಗೆ ಇದೊಂದು ಪ್ರಚಾರ ಗಿಮ್ಮಿಕ್ ಎಂದು ಗೊತ್ತಾಗಿತ್ತು.