ಒಂದೇ ದಿನದಲ್ಲಿ 3 ಲಕ್ಷ ಗಡಿ ತಲುಪಿದ ಅವನೇ ಶ್ರೀಮನ್ನಾರಾಯಣ ಟೀಸರ್

ರಕ್ಷಿತ್ ಶೆಟ್ಟಿ ಅಭಿನಯದ ಮತ್ತೊಂದು ಮಹಾತ್ವಾಕಾಂಕ್ಷಿ ಚಿತ್ರ ’ಅವನೇ ಶ್ರೀಮನ್ನಾರಾಯಣ’. ಈ ಚಿತ್ರದ ಫಸ್ಟ್ ಲುಕ್ ರಕ್ಷಿತ್ ಹುಟ್ಟುಹಬ್ಬದ ದಿನ ಬಿಡುಗಡೆಯಾಗಿ ಅಭಿಮಾನಿಗಳಲ್ಲಿ ಸಿನಿಮಾ ಬಗ್ಗೆ ಸಖತ್ ಕ್ರೇಜ್ ಹುಟ್ಟಿಸಿದೆ. ಅದೇ ದಿನ ಬಿಡುಗಡೆಯಾದ ಚಿತ್ರದ ಟೀಸರ್ ಸಹ ಯೂಟ್ಯೂಬಲ್ಲಿ 3 ಲಕ್ಷ ಕ್ಲಿಕ್ಸ್‌ ಗಡಿ ತಲುಪಿದೆ.

ಈ ಟೀಸರ್‌ಗೆ 17 ಸಾವಿರ ಮಂದಿ ಥಂಬ್ಸ್ ಅಪ್ ಒತ್ತಿದ್ದರೆ, ಕೇವಲ 312 ಮಂದಿ ಥಂಬ್ಸ್ ಡೌನ್ ತೋರಿಸಿದ್ದಾರೆ. ಟೀಸರ್ ನೋಡಿ 900ಕ್ಕೂ ಹೆಚ್ಚು ಕಾಮೆಂಟ್‌ಗಳು ಹರಿದುಬಂದಿವೆ. "ಟೀಸರ್ ಕೂಲ್ ಆಗಿ ಭಿನ್ನವಾಗಿ ಮೂಡಿಬಂದಿದೆ. ಕೇರಳದಲ್ಲೂ ನಿಮ್ಮ ಸಿನಿಮಾ ಬಿಡುಗಡೆ ಮಾಡಿ. ಅಲ್ಲೂ ನಿಮ್ಮ ಅಭಿಮಾನಿಗಳು ಸಾಕಷ್ಟು ಸಂಖ್ಯೆಯಲ್ಲಿದ್ದೇವೆ" ಎಂಬ ಕಾಮೆಂಟ್ ಸಹ ಬಂದಿದೆ.

ಇನ್ನು ಈ ಟೀಸರ್‌ನಲ್ಲಿ ರಕ್ಷಿತ್ ಶೆಟ್ಟಿ ಮ್ಯಾನರಿಸಂ, ಕಾಸ್ಟ್ಯೂಮ್, ಹಿನ್ನೆಲೆ ಸಂಗೀತ ಪ್ರಮುಖವಾಗಿ ಗಮನಸೆಳೆಯುವ ಅಂಶಗಳು. ಸಿನಿಮಾ ಬಹುಶಃ ಡಿಸೆಂಬರ್‌ನಲ್ಲಿ ತೆರೆಗೆ ಬರುವ ಸಾಧ್ಯತೆಗಳಿವೆ.

ಪಾತ್ರವರ್ಗದಲ್ಲಿ ರಕ್ಶಿತ್ ಜತೆಗೆ ಶಾನ್ವಿ ಶ್ರೀವಾಸ್ತವ್, ಬಾಲಜಿ ಮನೋಹರ್, ಅಚ್ಯುತ ಕುಮಾರ್, ಪ್ರಮೋದ್ ಶೆಟ್ಟಿ, ಮಧುಸೂಧನ್ ರಾವ್ ಸೇರಿದಂತೆ ಮುಂತಾದವರಿದ್ದಾರೆ. ಎಚ್ ಕೆ ಪ್ರಕಾಶ್ ಮತ್ತು ಪುಷ್ಕರ ಮಲ್ಲಿಕಾರ್ಜುನಯ್ಯ ನಿರ್ಮಿಸುತ್ತಿರುವ ಸಿನಿಮಾ ಇದಾಗಿದೆ. ಸಚಿನ್ ನಿರ್ದೇಶನದ ಈ ಚಿತ್ರಕ್ಕೆ ಅಜನೀಶ್ ಲೋಕನಾಥ್ ಸಂಗೀತ, ಕರಮ್ ಚಾವ್ಲಾ ಫೋಟೋಗ್ರಫಿ ಇದೆ.