ರಾಜಮೌಳಿ 'ಆರ್‌ಆರ್‌ಆರ್' ಚಿತ್ರದ ಎರಡನೇ ನಾಯಕಿ ಯಾರು ಗೊತ್ತೇ?

ಬಾಹುಬಲಿ ಖ್ಯಾತಿಯ ಟಾಲಿವುಡ್ ಖ್ಯಾತ ನಿರ್ದೇಶಕ ರಾಜಮೌಳಿ ನಿರ್ದೇಶನದ ಮುಂಬರುವ 'ಆರ್ ಆರ್ ಆರ್' ಸಿನಿಮಾದ ಚಿತ್ರೀಕರಣ ಈಗಾಗಲೆ ಪ್ರಾರಂಭವಾಗಿದೆ. ಟಾಲಿವುಡ್ ಸ್ಟಾರ್ ನಟರಾದ ರಾಮ್ ಚರಣ್ ಮತ್ತು ಜ್ಯೂ ಎನ್‌ಟಿಆರ್ ನಾಯಕರಾಗಿ ಕಾಣಿಸಿಕೊಳ್ಳುತ್ತಿರುವ ಈ ಸಿನಿಮಾಕ್ಕೆ ಬಾಲಿವುಡ್ ಬೆಡಗಿ ಆಲಿಯಾ ಭಟ್ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಈ ಚಿತ್ರವು ಶೂಟಿಂಗ್ ಹಂತದಲ್ಲೇ ಟಾಲಿವುಡ್ ಮಾತ್ರವಲ್ಲದೇ ಇಡೀ ದೇಶದಾದ್ಯಂತ ಸದ್ದು ಮಾಡುತ್ತಿದೆ.

ರಾಜಮೌಳಿ ಸಿನಿಮಾ ಅನೌನ್ಸ್ ಮಾಡುತ್ತಿದಂತೆ ಚಿತ್ರದ ಬಗ್ಗೆ ಸಾಕಷ್ಟು ಚರ್ಚೆಗಳು ಪ್ರಾರಂಭವಾಗಿತ್ತು. ಚಿತ್ರ ಅನೌನ್ಸ್ ಆದಾಗಲೇ ನಾಯಕರು ಯಾರು ಎಂಬುದು ಗೊತ್ತಾಗಿತ್ತು. ಆದರೆ ಚಿತ್ರದ ಕಥೆ, ನಾಯಕಿ ವಿಚಾರವಾಗಿ ಸಿನಿಪ್ರಿಯರು ಭಾರಿ ತಲೆಕೆಡಿಸಿಕೊಂಡಿದ್ದರು. ಆದರೆ, ಇತ್ತೀಚಿಗಷ್ಟೆ ಚಿತ್ರದ ಬಗ್ಗೆ ಒಂದಿಷ್ಟು ಮಾಹಿತಿ ಹೊರಹಾಕುವ ಮೂಲಕ ಎಲ್ಲಾ ಕುತೂಹಲಕ್ಕೆ ತೆರೆ ಎಳೆದಿತ್ತು ಚಿತ್ರತಂಡ.

ಆದರೆ, ಇದೀಗ ಚಿತ್ರದ ಎರಡನೇ ನಾಯಕಿ ವಿಚಾರ ಭಾರಿ ಚರ್ಚೆಯಾಗುತ್ತಿದೆ. 'ಆರ್ ಆರ್ ಆರ್' ಸಿನಿಮಾದ ಎರಡನೇ ನಾಯಕಿ ಪಟ್ಟಕ್ಕೆ ಬಾಲಿವುಡ್ ಬೆಡಗಿಯರಾದ ಶ್ರದ್ಧಾ ಕಪೂರ್ ಮತ್ತು ಪರಿಣೀತಿ ಚೋಪ್ರ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದೆ ಎನ್ನಲಾಗುತ್ತಿದೆ. ಈ ಮೊದಲು ನಾಯಕಿಯರ ಹೆಸರಲ್ಲಿ ಶ್ರದ್ಧಾ ಮತ್ತು ಪರಣೀತಿ ಹೆಸರು ಕೇಳಿ ಬಂದಿತ್ತು. ಆದರೆ, ಈಗಾಗಲೇ ಮೊದಲ ನಾಯಕಿಯಾಗಿ ಆಲಿಯಾ ಬಂದಿರುವುದರಿಂದ ಎರಡನೇ ನಾಯಕಿಯಾಗಿ ಈ ಇಬ್ಬರಲ್ಲಿ ಒಬ್ಬರು ಮಾತ್ರ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ. ಹೀಗಾಗಿ, ಈ ಸಂಗತಿಯೀಗ ಭಾರೀ ಚರ್ಚೆಗೆ ಕಾರಣವಾಗಿದೆ.

ಈಗಾಗಲೇ ಚಿತ್ರದ ಮೊದಲ ನಾಯಕಿಯಾಗಿ ಬಾಲಿವುಡ್ ನಟಿ ಅಲಿಯಾ ಭಟ್ ಆಯ್ಕೆಯಾಗಿದ್ದು, ಶೂಟಿಂಗ್‌ನಲ್ಲಿ ಕೂಡ ಅವರು ಭಾಗಿಯಾಗಿದ್ದಾರೆ. ಮತ್ತೋರ್ವ ನಾಯಕಿ ಸ್ಥಾನವನ್ನು ಬಾಲಿವುಡ್ ನಟಿಗೆ ನೀಡಲು ಮುಂದಾಗಿದ್ದಾರೆ ರಾಜಮೌಳಿ. ವಿಶೇಷ ಎಂಬಂತೆ, ಎರಡನೇ ನಾಯಕಿಗೋಸ್ಕರ ಸ್ಕ್ರಿಪ್ಟ್ ನಲ್ಲಿ ಸ್ವಲ್ಪ ಬದಲಾವಣೆ ಕೂಡ ಮಾಡಿಕೊಳ್ಳುತ್ತಿದ್ದಾರಂತೆ ನಿರ್ದೇಶಕ ಎಸ್‌ಎಸ್ ರಾಜಮೌಳಿ. ಒಟ್ಟಿನಲ್ಲಿ, ಸದಾ ಒಂದಲ್ಲೊಂದು ವಿಚಾರದ ಮೂಲಕ ಸದ್ದು ಸುದ್ದಿ ಮಾಡುತ್ತಿರುವ 'ಆರ್ ಆರ್ ಆರ್' ನಲ್ಲಿ ಇನ್ನೂ ಏನೇನು ಅಚ್ಚರಿಗಳು ಕಾದಿವೆಯೋ ಏನೋ!