ಲಂಡನ್‌ಗೆ ಹಾರಲಿರುವ ಅನುಷ್ಕಾ-ಪ್ರಭಾಸ್‌: ಪ್ಲಾನ್ ಮಾಡಿದ ರಾಜಮೌಳಿ!

ದಕ್ಷಿಣ ಭಾರತದ ಸಿನಿಮಾ ಸ್ಟಾರ್‌ಗಳಲ್ಲಿ ಅತ್ಯಂತ ಹೆಚ್ಚು ಸದ್ದು ಮಾಡಿರುವ ಜೋಡಿಗಳಲ್ಲಿ ಅನುಷ್ಕಾ ಶೆಟ್ಟಿ ಮತ್ತು ಡಾರ್ಲಿಂಗ್ ಪ್ರಭಾಸ್ ಸಹ ಒಂದು ಎಂದು ಧಾರಾಳವಾಗಿ ಹೇಳಬಹುದು. ಸಿನಿಮಾ ನಟ-ನಟಿಯರಾಗಿ ಅವರಿಬ್ಬರೂ ಕೆಲವು ಸಿನಿಮಾಗಳಲ್ಲಿ ಒಟ್ಟಿಗೇ ಕಾಣಿಸಿಕೊಂಡಿದ್ದಾರೆ. ಆದರೆ, ಅವರಿಬ್ಬರೂ ಜತೆಯಾಗಿ ನಟಿಸಿದ್ದ ಸಿನಿಮಾಗಳಲ್ಲಿ ಅವರಿಬ್ಬರ ಕೆಮೆಸ್ಟ್ರಿ ಅದೆಷ್ಟು ಚೆನ್ನಾಗಿತ್ತು ಎಂದರೆ ಅವರಿಬ್ಬರೂ ರಿಯಲ್ ಆಗಿ ಜೋಡಿಯಾದರೆ ಚೆನ್ನಾಗಿರುತ್ತದೆ ಎಂದು ಸಿನಿಮಾ ಪ್ರೇಕ್ಷಕರು ಪ್ರಾರ್ಥಿಸತೊಡಗಿದ್ದಾರೆ. ಅಷ್ಟರಮಟ್ಟಿಗೆ ಅವರಿಬ್ಬರ ಸಿನಿಮಾ ಜೋಡಿ ಮೋಡಿ ಮಾಡಿದೆ.

ಅನುಷ್ಕಾ ಮತ್ತು ಪ್ರಭಾಸ್ ಇನ್ನೇನು ಮದುವೆ ಆಗಿಯೇಬಿಡುತ್ತಾರೆ ಎಂಬಷ್ಟರ ಮಟ್ಟಿಗೆ ಸೋಷಿಯಲ್ ಮೀಡಿಯಾಗಳಲ್ಲಿ ಸುದ್ದಿ ಹರಿದಾಡುತ್ತಿತ್ತು. ಆದರೆ, ಅವರಿಬ್ಬರೂ ಈ ಬಗ್ಗೆ,"ನಾವು ಲವ್ ಮಾಡುತ್ತಿಲ್ಲ, ಅಂದಮೇಲೆ ನಾವಿಬ್ಬರೂ ಮದುವೆಯಾಗುವ ಬಗ್ಗೆ ಯಾವತ್ತೂ ನಿರ್ಧರಿಸಿಲ್ಲ" ಎಂದು ಸ್ಪಷಟನೆ ಕೊಟ್ಟ ಮೇಲೆ ಈ ಸುದ್ದಿ ತಣ್ಣಗಾಗಿದೆ. ಆದರೂ ಆಗಾಗ ಅವರಿಬ್ಬರೂ ಮದುವೆಯಾಗುತ್ತಿದ್ದರೆ ಎಂಬ ಸುದ್ದಿ ಹಬ್ಬುತ್ತಲೇ ಇರುತ್ತದೆ. ಈ ಬಗ್ಗೆ ಇತ್ತೀಚೆಗೆ ಪ್ರಭಾಸ್- ಅನುಷ್ಕಾ ಜೋಡಿ ಕ್ಲಾರಿಟಿ ಕೊಡುವುದನ್ನು ನಿಲ್ಲಿಸಿಬಿಟ್ಟಿದೆ.

ಬಾಹುಬಲಿ ಚಿತ್ರದ ಮೂಲಕ ಈ ಜೋಡಿ ಪ್ರೇಕ್ಷಕರಿಗೆ ಮಾಡಿದ ಮೋಡಿ ಅಷ್ಟಿಷ್ಟಲ್ಲ. ಪ್ರಭಾಸ್ ನಾಯಕತ್ವದ ಎಲ್ಲಾ ಚಿತ್ರಗಳಲ್ಲಿ ಅನುಷ್ಟಾ ಇರುತ್ತಾರೆ ಎಂಬಷ್ಟರ ಮಟ್ಟಿಗೆ ಟಾಲಿವುಡ್ ಸೇರಿದಂತೆ ಇಡೀ ಇಂಡಿಯಾ ಸಿನಿಪ್ರೇಕ್ಷಕರು ನಿರೀಕ್ಷೆ ಮಾಡತೊಡಗಿದರು. ಆದರೆ ಅವರಿಬ್ಬರೂ ಬಾಹುಬಲಿ ಚಿತ್ರಗಳ ಬಳಿಕ ಬೇರೆ ಬೇರೆ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಆದರೂ ಅನುಷ್ಕಾ-ಪ್ರಭಾಸ್ ಜೋಡಿಯ ಸ್ನೇಹ, ಪ್ರೀತಿ-ಮದುವೆ ಬಗ್ಗೆ ಅವರ ಅಭಿಮಾನಿಗಳು ಸೇರಿದಂತೆ ಹಲವರಿಗೆ ಇನ್ನೂ ನಿರೀಕ್ಷೆಯಿದೆ. ಇದೀಗ ಪ್ರಭಾಸ್-ಶ್ರದ್ಧಾ ಕಪೂರ್ ಜೋಡಿಯ ಬಾಲಿವುಡ್‌ನ 'ಸಾಹೋ' ಸಿನಿಮಾ ರಿಲೀಸ್‌ಗೆ ರೆಡಿಯಾಗಿದೆ. ಈ ಸಮಯದಲ್ಲಿ ಇನ್ನೊಂದು ಸುದ್ದಿ ಭಾರೀ ವೈರಲ್ ಆಗಿದೆ.

"ಅನುಷ್ಕಾ ಮತ್ತು ಪ್ರಭಾಸ್ ಸದ್ಯದಲ್ಲೇ ಲಂಡನ್‌ಗೆ ಜೊತೆಯಾಗಿ ಹೋಗಲಿದ್ದಾರೆ. ನಿರ್ದೇಶಕ ರಾಜಮೌಳಿ ಅವರಿಬ್ಬರನ್ನೂ ಲಂಡನ್ ಗೆ ಕಳುಹಿಸುವ ಪ್ಲಾನ್ ಮಾಡಿದ್ದಾರಂತೆ. ಈ ಸುದ್ದಿಯೀಗ ಟಾಲಿವುಡ್ ಅಂಗಳದಲ್ಲಿ ಭಾರೀ ಚರ್ಚೆಯಾಗುತ್ತಿದೆ. ಆದರೆ, ಅನುಷ್ಕಾ ಮತ್ತು ಪ್ರಭಾಸ್ ಒಟ್ಟಿಗೇ ಲಂಡನ್‌ಗೆ ಹೋಗುತ್ತಿರುವುದು 'ಬಾಹುಬಲಿ' ಸಿನಿಮಾ ಕಾರಣಕ್ಕೆ ಎನ್ನಲಾಗಿದೆ.

ಹೌದು, ಲಂಡನ್‌ನಲ್ಲಿರುವ 'ರಾಯಲ್ ಆಲ್ಬರ್ಟ್ ಹಾಲ್'ನಲ್ಲಿ 'ಬಾಹುಬಲಿ-2' ಸಿನಿಮಾ ಪ್ರದರ್ಶನವಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ನಟ ಪ್ರಭಾಸ್, ಅನುಷ್ಕಾ ಶೆಟ್ಟಿ ಮತ್ತು ರಾಣಾ ದಗ್ಗುಬಾಟಿ ಲಂಡನ್‌ಗೆ ಭೇಟಿ ನೀಡಲಿದ್ದಾರೆ. ಅವರೆಲ್ಲರ ಜತೆ ನಿರ್ದೇಶಕ ರಾಜಮೌಳಿ, ಸಂಗೀತ ನಿರ್ದೇಶಕ ಎಂಎಂ ಕೀರವಾಣಿ ಸಹ ಲಂಡನ್‌ಗೆ ಪ್ರಯಾಣ ಬೆಳಸಲಿದ್ದಾರೆ ಎಂಬ ಮಾಹಿತಿ ಬಹಿರಂಗವಾಗಿದೆ. ಬರುವ ಅಕ್ಟೋಬರ್ ತಿಂಗಳಲ್ಲಿ ಬಾಹುಬಲಿ ಸಿನಿಮಾ ಪ್ರದರ್ಶನವಾಗಲಿದೆ. ಬಹುದಿನಗಳ ನಂತರ ಅನುಷ್ಕಾ ಮತ್ತು ಪ್ರಭಾಸ್ ಒಟ್ಟಿಗೇ ವೇದಿಕೆ ಹಂಚಿಕೊಳ್ಳಲಿದ್ದು, ಅಭಿಮಾನಿಗಳಿಗೆ ಆ ಕ್ಷಣ ಹಬ್ಬವಾಗಲಿದೆ.