ಬಜಾರ್‌ನಲ್ಲಿ ಚಿತ್ರದ ಟ್ರೇಲರ್‌ ಔಟ್‌

ಬಜಾರ್‌ ಚಿತ್ರದಲ್ಲಿ ಲವ್‌ ಸ್ಟೋರಿ ಜತೆ ನಾಯಕ ಧನ್‌ವೀರ್‌ ಮತ್ತು ಪಾರಿವಾಳಗಳ ನಡುವಿನ ಸ್ನೇಹವನ್ನು ತೋರಿಸಲಾಗಿದೆ. ಚಿತ್ರ ಜ.11ರಂದು ರಿಲೀಸ್‌ ಆಗಲಿದ್ದು, ಟ್ರೇಲರ್‌ ನಿನ್ನೆ ರಿಲೀಸ್‌ ಆಗಿದೆ.

==

ಧನ್‌ವೀರ್‌ ಮತ್ತು ಅದಿತಿ ಪ್ರಭುದೇವ್‌ ನಟನೆಯ ಬಜಾರ್‌ ಲವ್‌ ಅಂಡ್‌ ಆ್ಯಕ್ಷನ್‌ ಚಿತ್ರ. ಮೊದಲ ಬಾರಿಗೆ ಧನ್‌ವೀರ್‌ ನಾಯಕ ನಟನಾಗಿ ನಟಿಸುತ್ತಿದ್ದಾರೆ. ಸಿಂಪಲ್‌ ಆಗಿ ಒಂದು ಲವ್‌ ಸ್ಟೋರಿ ಮಾಡಿದ್ದ ಸುನಿ ಮೊದಲ ಬಾರಿಗೆ ಆ್ಯಕ್ಷನ್‌ ಸಿನಿಮಾ ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಟ್ರೇಲರ್‌ ನಿನ್ನೆ ರಿಲೀಸ್‌ ಆಗಿದ್ದು, ಎಲ್ಲರ ಗಮನ ಸೆಳೆದಿದೆ. ಈ ಹಿಂದೆ ರಿಲೀಸ್‌ ಮಾಡಿದ್ದ ಟೀಸರ್‌ 5 ಲಕ್ಷಕ್ಕೂ ಹೆಚ್ಚು ಹಿಟ್‌ ಗಳಿಸಿದೆ.

ಧನ್‌ವೀರ್‌ ಸಿನಿಮಾದಲ್ಲಿ ಚಾಲೆಂಜಿಂಗ್‌ ಆ್ಯಕ್ಷನ್‌ ದೃಶ್ಯಗಳಲ್ಲಿ ನಟಿಸಿದ್ದಾರೆ. ಚಿತ್ರದಲ್ಲಿ ಪಾರಿವಾಳಗಳು ಪ್ರಮುಖ ಪಾತ್ರ ವಹಿಸಿವೆ. ಪಾರಿವಾಳಗಳಿಗೆ ತರಬೇತಿ ನೀಡುವ ಹುಡುಗನಾಗಿ ಧನ್‌ವೀರ್‌ ನಟಿಸಿದ್ದಾರೆ.

'ಕಲ್ಕಿ ಅನ್ನೋ ಹುಡುಗನ ಪಾತ್ರದಲ್ಲಿ ನಟಿಸಿದ್ದೇನೆ. ಚಿತ್ರದ ಎಲ್ಲಾ ದೃಶ್ಯಗಳಲ್ಲಿ ಪಾರಿವಾಳ ನನ್ನ ಜತೆ ಇರುತ್ತೆ. ನಾನು ಊಟ ಮಾಡದಿದ್ರೆ ಪಾರಿವಾಳಗಳು ಊಟ ಮಾಡೋಲ್ಲ. ಅವು ಊಟ ಮಾಡದಿದ್ರೆ ನಾನು ಊಟ ಮಾಡೋಲ್ಲ. ಹೀಗೆ ನಮ್ಮ ನಡುವೆ ಬಾಂಡಿಂಗ್‌ ಬೆಳೆದಿರುತ್ತೆ. ನಾನು ಶೂಟಿಂಗ್‌ನಲ್ಲಿ ಅವುಗಳ ಜತೆ ಸ್ನೇಹ ಬೆಳೆಸಿಕೊಂಡೆ' ಎಂದಿದ್ದಾರೆ ಧನ್‌ವೀರ್‌.

ಮೊದಲ ಬಾರಿಗೆ ಪಾರಿವಾಳಗಳ ರೇಸ್‌ ಅನ್ನು ಪ್ರೇಕ್ಷಕ ತೆರೆಯ ಮೇಲೆ ನೋಡಲಿದ್ದಾರೆ. ನಾಯಕಿ ಪಾತ್ರದಲ್ಲಿ ನಟಿಸಿರುವ ಅದಿತಿ ಪ್ರಭುದೇವ ಸಿನಿಮಾ ಬಗ್ಗೆ ಫುಲ್‌ ಥ್ರಿಲ್‌ ಆಗಿದ್ದಾರೆ. 'ಇಂಥದ್ದೊಂದು ಪಾತ್ರ ಸಿಕ್ಕಿದ್ದು ಖುಷಿ ಕೊಟ್ಟಿದೆ. ಸಿನಿಮಾದಲ್ಲಿ ನನ್ನ ಪಾತ್ರ ನೋಡಿದವರು ಮರೆಯೋಲ್ಲ ಎಂಬ ನಂಬಿಕೆ ನನಗಿದೆ. ಅಷ್ಟು ಚೆನ್ನಾಗಿ ಮೂಡಿ ಬಂದಿದೆ' ಎಂದಿದ್ದಾರೆ ಅವರು. ಧೈರ್ಯಂ ಚಿತ್ರದಲ್ಲಿ ಅವರು ಈ ಮೊದಲು ನಟಿಸಿದ್ದರು. ಚಿತ್ರದ ಹಾಡುಗಳಿಗೆ ರವಿ ಬಸ್ರೂರ್‌ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಏಕೋ ಏನೋ ಹಾಡಿನಲ್ಲಿ ಧನ್‌ವೀರ್‌ ಮತ್ತು ಅದಿತಿ ಹಾಟ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಹಾಡುಗಳು ಈಗಾಗಲೇ ಆನ್‌ಲೈನ್‌ನಲ್ಲಿ ಗಮನ ಸೆಳೆದಿವೆ.