ಹಾಲಿವುಡ್‌ ನಿರ್ದೇಶಕ ಮೆಂಟರ್‌ ಅಗಿದ್ದು ಅದೃಷ್ಟ ಎಂದ ಭದ್ರಾವತಿ ಆಶಾ ಭಟ್‌

ಕನ್ನಡದ ಹುಡುಗಿ ಆಶಾ ಭಟ್‌ ಈಗ ಬಾಲಿವುಡ್‌ನಲ್ಲಿ ಬಿಝಿಯಾಗುತ್ತಿದ್ದಾರೆ. ಅವರ ನಟನೆಯ ಮೊದಲ ಹಿಂದಿ ಸಿನಿಮಾ ಜಂಗ್ಲಿ ಬಾಕ್ಸಾಫೀಸ್‌ನಲ್ಲಿ ಸದ್ದು, ಅವರ ಕಡೆ ಆಫರ್‌ಗಳು ಹರಿದುಬರಲು ಕಾರಣವಾಗಿದೆ. ಬಾಲಿವುಡ್‌ ಬಿಲ್ಲಿ ಎಂದೇ ಆಶಾ ಗುರುತಿಸಲ್ಪಟ್ಟಿದ್ದಾರೆ.

ಭದ್ರಾವತಿಯಿಂದ ಮಾಡೆಲಿಂಗ್‌ನತ್ತ ನಡೆದ ಆಶಾ ಮಾಜಿ ಮಿಸ್‌ ಸುಪ್ರಾನ್ಯಾಷನಲ್‌ ಆಗಿ ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದರು. ಇದಾದ ನಂತರ ಬಾಲಿವುಡ್‌ಗೂ ಕಾಲಿಟ್ಟಿದ್ದು ವಿಶೇಷ. 'ಭದ್ರಾವತಿ ನನ್ನ ಹಾರ್ಟ್‌. ಅಲ್ಲಿಗೆ ಹೋಗುವುದು ಅಪರೂಪ ಆಗಿದ್ದರೂ, ಹೋದಾಗ ಬಹಳ ಖುಷಿ ಕೊಡುತ್ತದೆ. ನನ್ನ ಮನೆ, ಅಪ್ಪ ಅಮ್ಮನನ್ನು ತುಂಬಾ ಮಿಸ್‌ ಮಾಡುತ್ತೇನೆ. ಪಾನಿಪೂರಿ ಸ್ಟಾಲ್‌ನೂ ಮಿಸ್‌ ಮಾಡುತ್ತೇನೆ. ಅಲ್ಲಿ ಸಿಗುವ ಮಸಾಲಾ ಪೂರಿ ತರ ಮುಂಬಯಿಯಲ್ಲಿ ಸಿಗುವುದಿಲ್ಲ' ಎಂದು ಊರನ್ನು ನೆನಪಿಸಿಕೊಂಡಿದ್ದಾರೆ.

ಬಾಲಿವುಡ್‌ನಲ್ಲಿ ಜಂಗ್ಲಿ ಚಿತ್ರದಲ್ಲಿ ವಿದ್ಯುತ್‌ ಜಮ್ವಾಲಾ ಎದುರು ನಾಯಕಿಯಾಗಿ ನಟಿಸಿದರು ಆಶಾ. ವಿಶೇಷ ಎಂದರೆ ಈ ಚಿತ್ರದ ನಿರ್ದೇಶಕ ಹಾಲಿವುಡ್‌ನಲ್ಲಿ ಹಲವು ಸಿನಿಮಾಗಳನ್ನು ಮಾಡಿರುವ ಚಕ್‌ ರಸೆಲ್‌. ಇವರು ಹಾಲಿವುಡ್‌ನ ಜನಪ್ರಿಯ ಚಿತ್ರಗಳಾದ ದಿ ಮಾಸ್ಕ್‌, ದಿ ಸ್ಕಾರ್ಪಿಯನ್‌ ಕಿಂಗ್‌ ಸಿನಿಮಾಗಳನ್ನು ಮಾಡಿದ್ದಾರೆ. ಈಗ ಆಶಾ ಆಡಿಷನ್‌ ಮೂಲಕ ಈ ಚಿತ್ರಕ್ಕೆ ಆಯ್ಕೆಯಾಗಿದ್ದರು. ಚಿತ್ರದಲ್ಲಿ ವೈಲ್ಡ್‌ ಲೈಫ್‌ ಜರ್ನಲಿಸ್ಟ್‌ ಆಗಿ ನಟಿಸಿದ್ದಾರೆ.

'ಹಾಲಿವುಡ್‌ ದಿಗ್ಗಜರಾದ ಜಿಮ್‌ ಕ್ಯಾರಿ, ಕ್ಯಾಮೆರಾನ್‌ ಡಿಯಾಜ್‌ ಮತ್ತು ಡ್ವಾಯ್ನೆ ಜಾನ್ಸನ್‌ ಮತ್ತಿತರ ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ರಸೆಲ್‌ ನನ್ನ ಮೆಂಟರ್‌ ಆಗಿದ್ದು ನನ್ನ ಅದೃಷ್ಟ. ನನ್ನ ಮೊದಲು ಗುರು ಅವರು. ಮೊದಲ ದಿನದಿಂದಲೇ ಅವರು ನನಗೆ ತಂದೆಯಂತೆ ನನ್ನನ್ನು ಪೋಷಿಸಿದರು. ಕಲಿಸಿದರು' ಎಂದಿದ್ದಾರೆ ನಟಿ ಆಶಾ ಭಟ್‌.

ಬಾಲಿವುಡ್‌ ಜರ್ನಿ ವಿಶ್ವದ ಉತ್ತಮ ಚಿತ್ರದೊಂದಿಗೆ ಶುರುವಾಗಿದ್ದು ಸಂತಸದ ಸಂಗತಿ ಎಂದಿದ್ದಾರೆ ಅವರು. 'ನನಗೆ ನಟನೆ ಗೊತ್ತಿರಲಿಲ್ಲ. ಕ್ಯಾಮೆರಾ ಮುಂದೆ ಹೇಗೆ ನಟಿಸುವುದು ಗೊತ್ತಿರಲಿಲ್ಲ. ಮೊದ ಮೊದಲು ಕಷ್ಟವಾಗುತ್ತಿತ್ತು. ಸೋಲುತ್ತಿದ್ದೆ. ಆದರೆ, ಮತ್ತೆ ಹೊಸ ಭರವಸೆಯೊಂದಿಗೆ ಪ್ರಾರಂಭಿಸುತ್ತಿದ್ದೆ. ಇಲ್ಲಿಯವರೆಗೆ ಕಾದಿದ್ದು ಸಾರ್ಥಕವಾಗಿದೆ.

ಆಶಾ ಭರತನಾಟ್ಯ ಕಲಾವಿದೆ ಕೂಡಾ. ಇತರ ನೃತ್ಯ ಪ್ರಕಾರಗಳನ್ನೂ ಮುಂಬೈನಲ್ಲಿ ಕಲಿಯುತ್ತಿದ್ದಾರೆ. ಶಾಲೆಯಲ್ಲಿ ಎನ್‌ಸಿಸಿ ಕೇಡೆಟ್‌ ಆಗಿದ್ದು ಸಹಾಯಕ್ಕೆ ಬಂತು ಎನ್ನುತ್ತಾರೆ ಅವರು. 'ಇದು ನನ್ನ ಜೀವನದ ಭಾಗ ಆಗಿತ್ತು. ಸಿನಿಮಾದಲ್ಲಿ ಸಹಾಯಕ್ಕೆ ಬಂತು. ನಟ ವಿದ್ಯುತ್‌ ಡೆಡಿಕೇಷನ್‌ ಮತ್ತು ಹಾರ್ಡ್‌ವರ್ಕ್‌ಗೆ ಉದಾಹರಣೆ. ಸಹ ನಟರಿಗೆ ಬಹಳ ಸ್ಫೂರ್ತಿ ನೀಡುತ್ತಾರೆ' ಎಂದು ಹೊಗಳಿದ್ದಾರೆ.