*ಶರಣು ಹುಲ್ಲೂರು
ದಯಾಳ್‌ ಪದ್ಮನಾಭನ್‌ ನಿರ್ದೇಶನದ ಸತ್ಯ ಹರಿಶ್ಚಂದ್ರ ಸಿನಿಮಾದಲ್ಲಿ 'ಗಾಳಿಪಟ' ಚಿತ್ರ ಖ್ಯಾತಿಯ ಭಾವನಾ ರಾವ್‌ ಮಹತ್ವದ ಪಾತ್ರವೊಂದನ್ನು ನಿಭಾಯಿಸಿದ್ದಾರೆ. ಅದು ಕಥಾ ನಾಯಕನನ್ನು ಯುರೋಪ್‌ಗೆ ಹುಡುಕಿಕೊಂಡು ಹೋಗುವ ಪಾತ್ರವದು. ಯುರೋಪ್‌ನಲ್ಲಿರುವ ನಾಯಕನಿಗೂ ಮತ್ತು ಹಳ್ಳಿ ಹಿನ್ನೆಲೆ ಇರುವ ಹುಡುಗಿಗೂ ಆಗುವ ಪರಿಚಯವೇ ಸಿನಿಮಾದ ಇಂಟ್ರಸ್ಟಿಂಗ್‌ ಅಂಶವಂತೆ.
'ನನ್ನ ಮತ್ತು ಕಥಾ ನಾಯಕನ ಪರಿಚಯ ಆಗುವುದು ಫೇಸ್‌ಬುಕ್‌ನಲ್ಲಿ. ಪರಿಚಯ ಸ್ನೇಹಕ್ಕೆ ತಿರುಗುತ್ತದೆ. ಸ್ನೇಹವು ಪ್ರೀತಿಯಾಗಿ ಬದಲಾಗುತ್ತದೆ. ಈ ಪ್ರೀತಿಯೇ ನನ್ನನ್ನು ಯುರೋಪ್‌ಗೂ ಕರೆದುಕೊಂಡು ಹೋಗುತ್ತದೆ. ಯುರೋಪ್‌ಗೆ ಹೋದ ನಂತರ ಮತ್ತಷ್ಟು ತಿರುವುಗಳಿಗೆ ಈ ಪಾತ್ರ ಸಾಕ್ಷಿಯಾಗುತ್ತದೆ. ಹಾಗಾಗಿ ಪಾತ್ರದ ಮೂಲಕ ಹೊಸ ಹೊಸ ಆಲೋಚನೆಗಳನ್ನು ಕಂಡುಕೊಂಡೆ' ಅನ್ನುವುದು ಭಾವನಾ ಮಾತು.
ಹತ್ತು ಹಲವು ವಿಶೇಷತೆಗಳನ್ನು ಹೊತ್ತು ಈ ಸಿನಿಮಾ ಬರುತ್ತಿದೆ. ಮನುಷ್ಯ ಅದೆಷ್ಟೇ ಸುಳ್ಳುಗಾರನಾದರೂ ಅವನೊಳಗೊಬ್ಬ ಒಳ್ಳೆಯ ಇರುತ್ತಾನೆ. ಅದುವೇ ಸತ್ಯ ಹರಿಶ್ಚಂದ್ರ ಸಿನಿಮಾದ ಸ್ಟೋರಿ. ಕಥಾ ನಾಯಕ ಬಾಯಿ ಬಿಟ್ಟರೆ ಬರೀ ಸುಳ್ಳು ಹೇಳುತ್ತಾನೆ. ಈ ಸುಳ್ಳೇ ಕೊನೆಗೊಂದು ದಿನ ಅವನ ಪ್ರಾಣಕ್ಕೆ ಅಪಾಯ ತರುತ್ತದೆ. ಅದರಿಂದ ಅವನು ಹೇಗೆ ಪಾರಾಗುತ್ತಾನೆ ಅನ್ನುವುದನ್ನು ಸೊಗಸಾಗಿ ಚಿತ್ರಸಿದ್ದಾರಂತೆ ನಿರ್ದೇಶಕರು. ಈ ಸಿನಿಮಾದಲ್ಲಿ ಶರಣ್‌ ಅವರದ್ದು ಮಹಾನ್‌ ಸುಳ್ಳುಗಾರನ ಪಾತ್ರವಂತೆ. ಇಂಥದ್ದೊಂದು ಪಾತ್ರವನ್ನು ಸಮರ್ಥವಾಗಿ ನಿಭಾಯಿಸಿದ್ದಾರಂತೆ ಶರಣ್‌.
ಅಂದಹಾಗೆ, ಇದು ಸಿಂಗಾರ್‌ ವರ್ಸಸ್‌ ಕೌರ್‌ ಎಂಬ ಪಂಜಾಬಿ ಚಿತ್ರದ ರಿಮೇಕ್‌. ಶೂಟಿಂಗ್‌ಗಾಗಿಯೇ ಇಡೀ ತಂಡ ಪೊರ್ಚುಗಲ್‌ಗೆ ಪ್ರಯಾಣ ಬೆಳೆಸಿತ್ತು. ಪೋರ್ಚುಗಲ್‌ನ ಸುಂದರ ತಾಣದಲ್ಲಿ ಚಿತ್ರೀಕರಣವಾದ ಕನ್ನಡದ ಮೊದಲ ಸಿನಿಮಾ ಕೂಡ ಇದಾಗಿದೆ. ಕೆ. ಮಂಜು ಚಿತ್ರದ ನಿರ್ಮಾಪಕರು. ಈ ಸಿನಿಮಾಗೆ ಇಬ್ಬರು ನಾಯಕಿಯರು. ಭಾವನಾ ರಾವ್‌ ಜತೆ ಸಂಚಿತಾ ಪಡುಕೋಣೆ ಕೂಡ ಮತ್ತೊಂದು ಪಾತ್ರವನ್ನು ನಿರ್ವಹಿಸಿದ್ದಾರೆ. ಚಿಕ್ಕಣ್ಣ ಸೇರಿದಂತೆ ಅನುಭವಿ ಕಲಾವಿದರ ದಂಡೇ ಚಿತ್ರದಲ್ಲಿದೆ.
'ಸತ್ಯ ಹರಿಶ್ಚಂದ್ರ ಸೇರಿದಂತೆ ಸದ್ಯ ನಾನು ನಾಲ್ಕು ಸಿನಿಮಾಗಳಲ್ಲಿ ನಟಿಸಿದ್ದೇನೆ. ನಾಲ್ಕೂ ಕೂಡ ವಿಭಿನ್ನವಾಗಿದೆ. ಮುಗ್ಧ ಹುಡುಗಿಯೊಬ್ಬಳು ತನ್ನ ಹುಡುಗನನ್ನು ಹುಡುಕಿಕೊಂಡು ದೂರದ ದೇಶಕ್ಕೆ ಹೋಗುವುದರ ಹಿನ್ನೆಲೆಯೇ ಹೊಸ ರೀತಿಯದ್ದಾಗಿದೆ. ಸಿನಿಮಾ ತುಂಬಾ ಚೆನ್ನಾಗಿ ಮೂಡಿ ಬಂದಿದೆ.'
- ಭಾವನಾ ರಾವ್‌, ನಟಿ