ಲಕ್ಕಿ ಡಿಸೆಂಬರ್‌ಗಾಗಿ ಕಾದಿದೆ ಸ್ಯಾಂಡಲ್‌ವುಡ್‌

ಈ ವರ್ಷದ ಕೊನೆಯಲ್ಲಿ ಮತ್ತೆ ಸ್ಟಾರ್‌ವಾರ್‌ ನಡೆಯತ್ತಾ ಅಂಥದ್ದೊಂದು ಸೂಚನೆ ಸ್ಯಾಂಡಲ್‌ವುಡ್‌ನಲ್ಲಿ ಸಿಕ್ಕಿದೆ. ಯಶ್‌ ನಟನೆಯ ಕೆಜಿಎಫ್‌, ಪುನೀತ್‌ ರಾಜ್‌ಕುಮಾರ್‌ ನಟನೆಯ ನಟ ಸಾರ್ವಭೌಮ, ಉಪೇಂದ್ರ ನಟನೆಯ ಐ ಲವ್‌ ಯೂ, ದರ್ಶನ್‌ ಅವರ ಯಜಮಾನ ಹೀಗೆ ಸಾಲು ಸಾಲು ಸಿನಿಮಾಗಳು ಬಿಡುಗಡೆಗೆ ಸಿದ್ಧವಾಗಿವೆ. ಸ್ಯಾಂಡಲ್‌ವುಡ್‌ ಪಾಲಿಗೆ ಡಿಸೆಂಬರ್‌ ಲಕ್ಕಿ ತಿಂಗಳು ಆಗಿರುವುದರಿಂದ ಸ್ಟಾರ್‌ ಸಿನಿಮಾಗಳ ಮಧ್ಯೆಯೇ ಪೈಪೋಟಿ ಶುರುವಾಗಲಿದೆ. ಬಹುತೇಕ ಚಿತ್ರಗಳು ಭಾರೀ ಬಜೆಟ್‌ನಿಂದಲೇ ನಿರ್ಮಾಣ ಆಗಿದ್ದರಿಂದ ಕುತೂಹಲ ಕೂಡ ಮೂಡಿಸಿವೆ.

ಕೆಜಿಎಫ್‌ ಸಿನಿಮಾದಲ್ಲಿ ಯಶ್‌ ರಫ್‌ ಅಂಡ್‌ ಟಫ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಬರೋಬ್ಬರಿ ಎರಡು ವರ್ಷಗಳ ಕಾಲ ಈ ಸಿನಿಮಾಗಾಗಿ ಶೂಟಿಂಗ್‌ ಮಾಡಿದ್ದಾರೆ. ಹೀಗಾಗಿ ಕೆಜಿಎಫ್‌ ಈಗಾಗಲೇ ನಿರೀಕ್ಷೆ ಮೂಡಿಸಿದೆ. ಬ್ರಹ್ಮ ಸಿನಿಮಾದ ನಂತರ ನಿರ್ದೇಶಕ ಆರ್‌.ಚಂದ್ರು ಮತ್ತು ಉಪೇಂದ್ರ ಕಾಂಬಿನೇಷನ್‌ನ ಎರಡನೇ ಸಿನಿಮಾ 'ಐ ಲವ್‌ ಯೂ'. ಈ ಚಿತ್ರದಲ್ಲಿ ಉಪೇಂದ್ರ ಮೊದಲ ಬಾರಿಗೆ ವಿಭಿನ್ನ ಪಾತ್ರ ಮಾಡಿದ್ದಾರಂತೆ. ಅಲ್ಲದೇ, ಅವರ ಎ ಸಿನಿಮಾದ ವಿರುದ್ಧದ ಕಥೆ ಈ ಸಿನಿಮಾದಲ್ಲಿದೆಯಂತೆ. ಅಲ್ಲದೇ ಮೊನ್ನೆಯಷ್ಟೇ ರಿಲೀಸ್‌ ಆಗಿರುವ ಫಸ್ಟ್‌ಲುಕ್‌ ಕೂಡ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಈ ಎಲ್ಲ ಕಾರಣಗಳಿಂದಾಗಿ ಐ ಲವ್‌ ಯೂ ಚಿತ್ರ ಕೂಡ ಸಖತ್‌ ಪೈಪೋಟಿ ನೀಡಲಿದೆ ಎನ್ನಲಾಗುತ್ತಿದೆ.

ಪುನೀತ್‌ ರಾಜ್‌ಕುಮಾರ್‌ ಅಭಿನಯದ ನಟಸಾರ್ವಭೌಮ ಕೂಡ ತನ್ನದೇ ಆದ ಕಾರಣಗಳಿಂದಾಗಿ ಸದ್ದು ಮಾಡುತ್ತಿದೆ. ಕುರುಕ್ಷೇತ್ರ ಸಿನಿಮಾಗೂ ಮುನ್ನ ಯಜಮಾನ ಚಿತ್ರ ತೆರೆ ಕಾಣುತ್ತದೆ ಎಂದು ಹೇಳಲಾಗುತ್ತಿದೆ. ಹೀಗಾಗಿ ಪ್ರೇಕ್ಷಕರಿಗೆ ಹಬ್ಬದ ತಿಂಗಳು ಎಂದೇ ಡಿಸೆಂಬರ್‌ ಅನ್ನು ಬಣ್ಣಿಸಲಾಗುತ್ತಿದೆ.

ಸ್ಟಾರ್‌ ನಟರ ಚಿತ್ರಗಳು ತೆರೆಕಂಡರೆ ಥಿಯೇಟರ್‌ ಕೊರತೆ ಎದುರಾಗಲಿದೆ ಎಂಬ ಕಾರಣಕ್ಕಾಗಿ ಈಗಿನಿಂದಲೇ ವಾರಕ್ಕೆ ಐದಾರು ಚಿತ್ರಗಳನ್ನು ರಿಲೀಸ್‌ ಮಾಡಲಾಗುತ್ತಿದೆ. ನವೆಂಬರ್‌ ತಿಂಗಳಲ್ಲೇ ಇಪ್ಪತ್ತಕ್ಕೂ ಹೆಚ್ಚು ಚಿತ್ರಗಳು ರಿಲೀಸ್‌ ಆಗುತ್ತಿವೆ.