ರಕ್ತದಾನ ಮಾಡಿದ ಸಂಚಾರಿ ವಿಜಯ್‌ ಮತ್ತು ಹರಿಪ್ರಿಯಾ

ಗುರುವಾರ ವಿಶ್ವ ರಕ್ತದಾನದ ದಿನ. ಈ ಸಂದರ್ಭದಲ್ಲಿ ನಟಿ ಹರಿಪ್ರಿಯಾ ಮೊದಲ ಬಾರಿಗೆ ರಕ್ತದಾನ ಮಾಡಿದ್ದಾರೆ. ಅಲ್ಲದೆ ಸಂಚಾರಿ ವಿಜಯ್‌ ಕೂಡಾ ರಕ್ತದಾನ ಮಾಡಿದ್ದಾರೆ.

==

ನಟ ಸಂಚಾರಿ ವಿಜಯ್‌ ಮತ್ತು ನಟಿ ಹರಿಪ್ರಿಯಾ ಬೇರೆ ಬೇರೆ ಸಂದರ್ಭಗಳಲ್ಲಿ ರಕ್ತದಾನ ಮಾಡಿ ಇತರರಿಗೆ ಮಾದರಿಯಾಗಿದ್ದಾರೆ.

ಬೆಂಗಳೂರಿನ ಕೋರಮಂಗಲದಲ್ಲಿ ಸಿಆರ್‌ಪಿಎಫ್‌ ಕ್ವಾರ್ಟರ್ಸ್‌ನಲ್ಲಿ ನಡೆದ ರಕ್ತದಾನ ಶಿಬಿರದಲ್ಲಿ ನಟ ಸಂಚಾರಿ ವಿಜಯ್‌ ತಮ್ಮ ರಕ್ತವನ್ನು ದಾನ ಮಾಡಿದ್ದಾರೆ. 'ಈ ಹಿಂದೆಯೂ ಅನೇಕ ಬಾರಿ ರಕ್ತದಾನ ಮಾಡಿದ್ದೆ. ಆದರೆ ಇಂದು ನಡೆದ ಶಿಬಿರ ವಿಶೇಷ ಎನ್ನಿಸಿತು. ಯಾಕೆಂದರೆ, ಸಿಆರ್‌ಪಿಎಫ್‌ನ ಉನ್ನತ ಅಧಿಕಾರಿಗಳಾದ ಡಿಜಿಪಿ, ಐಜಿಪಿಗಳಿಂದ ಹಿಡಿದು ಸುಮಾರು 250 ಪೊಲೀಸ್‌ ಅಧಿಕಾರಿಗಳು ಒಟ್ಟಿಗೆ ರಕ್ತದಾನ ಮಾಡಿದರು. ಬಹಳ ಖುಷಿಯಾಯ್ತು' ಎಂದಿದ್ದಾರೆ ಸಂಚಾರಿ ವಿಜಯ್‌.

ನಟಿ ಹರಿಪ್ರಿಯಾ ಮೊದಲ ಬಾರಿಗೆ ರಕ್ತದಾನ ಮಾಡಿದ್ದಾರೆ. ಅದೂ ಟ್ವಿಟ್ಟರ್‌ನಲ್ಲಿ ಯಾರೋ ರಕ್ತದ ಅವಶ್ಯಕತೆ ಇದೆ ಎಂದು ಬರೆದುಕೊಂಡಿದ್ದನ್ನು ನೋಡಿ ತಕ್ಷಣ ಪ್ರತಿಕ್ರಿಯಿಸಿದ್ದಾರೆ. ಹರಿಪ್ರಿಯಾ ರಕ್ತದಾನ ಮಾಡಿರುವುದು ಇನ್ನಷ್ಟು ಜನರಿಗೆ ರಕ್ತದಾನಕ್ಕೆ ಪ್ರೇರೇಪಿಸಿದಂತಾಗಿದೆ.

'ಟ್ವೀಟ್ಟರ್‌ನಲ್ಲಿ ರಕ್ತ ಬೇಕಿದೆ ಅಂತ ಪೋಸ್ಟ್‌ ಮಾಡಿದ್ದನ್ನು ನೋಡಿ ಫಸ್ಟ್‌ ಟೈಮ್‌ ಬ್ಲಡ್‌ ಡೊನೇಟ್‌ ಮಾಡಲು ಹೋದೆ!! ಮೊದಲ ಬಾರಿಗೆ ಭಯ ಎನ್ನಿಸಿದರೂ ಏನಾದರಾಗಲಿ ರಕ್ತ ಕೊಡಲೇ ಬೇಕು ಎಂದು ನಿರ್ಧರಿಸಿದೆ. ಚಿಕ್ಕ ವಯಸ್ಸಿನ ತಾಯಿ ಆಕೆ. ಹೆರಿಗೆ ಸಂದರ್ಭದಲ್ಲಿ ಅತೀವ ರಕ್ತಸ್ರಾವದಿಂದ ಬಳಲಿದ್ದರು. ತುರ್ತಾಗಿ ರಕ್ತ ಬೇಕಿತ್ತು. ಎಷ್ಟೋಂದು ಕಷ್ಟ ಇದ್ದರೂ ಅವರು ಕೊನೆಗೂ ಅವಳಿ ಜವಳಿ ಮಕ್ಕಳಿಗೆ ಜನ್ಮ ನೀಡಿದರು. ಅವರಿಗೆ ಸಹಾಯ ಮಾಡಿದ್ದಕ್ಕೆ ನನಗೆ ತುಂಬಾ ಖುಷಿಯಾಯ್ತು. ಅದನ್ನು ಪದಗಳಲ್ಲಿ ಹೇಳಲು ಸಾಧ್ಯವಿಲ್ಲ. ಪ್ರತಿಯೊಬ್ಬರೂ ರಕ್ತದಾನ ಮಾಡಲು ನಾನು ಎಂಕರೇಜ್‌ ಮಾಡಬೇಕೆಂದಿದ್ದೇನೆ. ಇದು ಇನ್ನೊಂದು ಜೀವವನ್ನು ಉಳಿಸುತ್ತದೆ' ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.