ಚಂದನವನದ ಬೋಲ್ಡ್‌ ಬಿಕಿನಿ ಬೇಬ್ಸ್‌

ಬಿಕಿನಿ ಬೇಬ್ಸ್‌...ಇವರನ್ನು ಗಟ್ಟಿಗಿತ್ತಿಯರು ಎಂದು ಕರೆಯಲು ಯಾವುದೇ ಅಡ್ಡಿಯಿಲ್ಲ. ಯಾಕೆಂದರೆ ಕನ್ನಡದ ಚಿತ್ರಜಗತ್ತಿನಲ್ಲಿ ಈ ಬಾಲೆಯರು ಚಿತ್ರದ ಅಗತ್ಯಕ್ಕಾಗಿ ಮಡಿವಂತಿಕೆಯ ಚೌಕಟ್ಟು ಮೀರಿ ಬಿಕಿನಿ ಧರಿಸಿದ್ದಾರೆ. ಈ ಮೂಲಕ ತಮ್ಮ ವೃತ್ತಿಪರತೆಯನ್ನು ಮೆರೆದಿದ್ದಾರೆ. ಅಂತಾರಾಷ್ಟ್ರೀಯ ಬಿಕಿನಿ ಡೇ ಹಿನ್ನೆಲೆಯಲ್ಲಿ ಕನ್ನಡದ ಇಂಥ ಕೆಲ ಬೋಲ್ಡ್‌ ಬೆಡಗಿಯರ ವಿವರ ಇಲ್ಲಿದೆ.

ಹಿಂದಿ ಸಿನಿಮಾಗಿಂತ ಮೊದಲೇ ದಕ್ಷಿಣ ಭಾರತದಲ್ಲಿ ಬಿಕಿನಿ ಪ್ರಯೋಗಗಳಾಗಿದ್ದವು! ಕನ್ನಡ ಸಿನಿಮಾ ರಂಗದಲ್ಲಿ ಮೊದಲ ಬಾರಿಗೆ ಬಿಕಿನಿ ಧರಿಸಿ ದಿಟ್ಟೆಯೆನಿಸಿಕೊಂಡವರು ನಟಿ ಹರಿಣಿ. ಸುಮಾರು 50, 60 ರ ದಶಕದಲ್ಲಿ ಇವರ ಈ ನಡೆ ಹುಬ್ಬೇರುವಂತೆ ಮಾಡಿತ್ತು. ಆದರೆ ಅವರ ಈ ಬೋಲ್ಡ್‌ನೆಸ್‌ ಮುಂದೆ ಅನೇಕ ನಟಿಯರಿಗೆ ಸ್ಫೂರ್ತಿಯಾಯಿತು. ಇವರ ನಂತರ ನಟಿ ಜಯಂತಿ ತುಂಡುಡುಗೆ ತೊಟ್ಟು ಬೋಲ್ಡ್‌ ಆಗಿ ಗಮನ ಸೆಳೆದರು.

ಈ ಟ್ರೆಂಡ್‌ ಮುಂದೆ ಕನ್ನಡ ಚಿತ್ರರಂಗದಲ್ಲಿ ದೊಡ್ಡದಾಗಿ ಬೆಳೆಯಿತು. ಮುಂದೆ ನಟಿಯರಾದ ಮಾಲಾಶ್ರೀ, ಶಿವರಂಜಿನಿ ಬಿಕಿನಿ ಟ್ರೆಂಡ್‌ಗೆ ಮರುಚಾಲನೆ ನೀಡಿದರು. 90ರ ದಶಕದ ನಂತರ ಚಿತ್ರದ ಹಾಡು ಅಥವಾ ಯಾವುದಾದರೊಂದು ಸನ್ನಿವೇಶದಲ್ಲಿ ನಟಿಗೆ ಬಿಕಿನಿ ತೊಡಿಸುವುದು ಸಾಮಾನ್ಯವಾಯ್ತು. ಕೆಲ ನಟಿಯರ ದಿಟ್ಟ ನಿರ್ಧಾರದಿಂದ ಬಿಕಿನಿ ಕುರಿತ ಮಡಿವಂತಿಕೆ ದೂರವಾಯಿತು ಎನ್ನಬಹುದು.

ಆದರೂ ಬಿಕಿನಿ ಧರಿಸಿದ ನಟಿಯರು ಯಾವಾಗಲೂ ಸುದ್ದಿಯ ಕೇಂದ್ರ ಬಿಂದುವಾಗುತ್ತಾರೆ. ಹಾಲಿವುಡ್‌ ಮತ್ತು ಬಾಲಿವುಡ್‌ನಲ್ಲಿ ತುಂಬಾ ಕಾಮನ್‌ ಆಗಿರುವ ಬಿಕಿನಿವೇರ್‌ ಪ್ರಾದೇಶಿಕ ಸಿನಿಮಾಗಳಲ್ಲಿ ಇನ್ನೂ ಕ್ಲಿಕ್‌ ಆಗಿಲ್ಲ. ಈಗಿನ ಪೀಳಿಗೆಯ ಕೆಲವು ಯುವ ನಟಿಯರು ಈ ಬಿಕಿನಿ ಟ್ರೆಂಡನ್ನು ಇನ್ನೂ ಜೀವಂತವಾಗಿಟ್ಟಿದ್ದಾರೆ.

ನಟಿ ರಾಗಿಣಿ ದ್ವಿವೇದಿ ತಮ್ಮ ಸಿನಿ ಬದುಕಿನ ಆರಂಭದ ದಿನಗಳಲ್ಲಿ ಬಿಕಿನಿ ಧರಿಸಿ ಫೋಟೊಶೂಟ್‌ ಮಾಡಿಸಿಕೊಂಡು ಗಮನ ಸೆಳೆದಿದ್ದರು. ಇದೇ ರೀತಿ ನಟಿ ಪ್ರಿಯಾಮಣಿಯೂ ತೆಲುಗು ಚಿತ್ರವೊಂದರಲ್ಲಿ ಸ್ಕಿನ್‌ ಕಲರ್‌ ಬಿಕಿನಿ ಧರಿನಿ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡಿದ್ದರು. ನಟಿ ಸಂಜನಾ ಗಲ್ರಾನಿಯೂ ಬಿಕಿನಿ ಬೇಬಿಯೇ. ದಶಕದ ಹಿಂದಿನ ಗಂಡ ಹೆಂಡತಿ ಸಿನಿಮಾದಲ್ಲಿ ಅವರು ಸೆಮಿ ಬಿಕಿನಿ ಧರಿಸಿ ಬೋಲ್ಡ್‌ ನಟಿ ಎಂದೆನಿಸಿಕೊಂಡಿದ್ದರು. ಇನ್ನು ಪಕ್ಕದ್ಮನೆ ಹುಡುಗಿ ಇಮೇಜ್‌ನ ಐಂದ್ರಿತಾ ರೇ 2012 ರ ಸಿಸಿಎಲ್‌ ಕ್ಯಾಲೆಂಡರ್‌ ಫೋಟೊಗಾಗಿ ಬಿಕಿನಿ ಧರಿಸಿ ಪೋಸ್‌ ಕೊಟ್ಟಿದ್ದರು. ಇಂದ್ರ ಸಿನಿಮಾದಲ್ಲಿ ದರ್ಶನ್‌ರೊಂದಿಗೆ ನಟಿಸಿದ್ದ ನಮಿತಾ ಕೂಡಾ ಬಿಳಿ ಸೆಮಿ ಬಿಕಿನಿ ಧರಿಸಿ ಬೋಲ್ಡ್‌ ನಡೆ ಇಟ್ಟಿದ್ದರು. ಮಳೆ ಹುಡುಗಿ ಪೂಜಾ ಗಾಂಧಿಯೂ ಸಿನಿಮಾವೊಂದರಲ್ಲಿ ನೀಲಿ ಮತ್ತು ಕಪ್ಪು ಮಿಶ್ರಿತ ಬಣ್ಣದ ಬಿಕಿನಿ ಕಮ್‌ ಸ್ವಿಮ್‌ ಸೂಟ್‌ ಧರಿಸಿದ್ದಾರೆ. ಇವರಂತೆ ನಟಿಯರಾದ ಶುಭಾ ಪೂಂಜ, ರಿಷಿಕಾ ಸಿಂಗ್‌, ನಿಧಿ ಸುಬ್ಬಯ್ಯ, ರಕ್ಷಿತಾ ಪ್ರೇಮ್‌ ಇವರೂ ಸಿನಿಮಾದಲ್ಲಿ ಬಿಕಿನಿ ಧರಿಸಿದ ಗಟ್ಟಿಗಿತ್ತಿಯರು.