ಬಾಲಿವುಡ್ ನಟ ವಿಜು ಖೋಟೆ ಇನ್ನಿಲ್ಲ

1975ರಲ್ಲಿ ರಿಲೀಸ್ ಆದ ‘ಶೋಲೆ’ ಬಾಲಿವುಡ್‍ನಲ್ಲಿ ಸಾಕಷ್ಟು ಹೆಸರು ಮಾಡಿದ ಚಿತ್ರ. ಈ ಸಿನಿಮಾದ ಪ್ರತೀ ಪಾತ್ರಗಳು ಜನಮಾನಸದಲ್ಲಿ ವಿಶೇಷವಾದ ಸ್ಥಾನವನ್ನು ಪಡೆದಿವೆ. ಇದೇ ಶೋಲೆಯಲ್ಲಿ ‘ಕಾಲಿಯಾ’ ಪಾತ್ರ ಮಾಡಿದ್ದ ವಿಜು ಖೋಟೆ ಇಂದು ಇಹಲೋಕವನ್ನು ತ್ಯಜಿಸಿದ್ದಾರೆ.
ರೈಲು ನಿಲ್ದಾಣದಲ್ಲಿ ಶೋಲೆ, ಸ್ಥಳೀಯ ಇತಿಹಾಸ ಸಾರುವ ಬರಹ

1941ರ ಡಿಸೆಂಬರ್ 17ರಂದು ಜನಿಸಿದ ವಿಜು ಖೋಟೆಯವ್ರ ಸಂಪೂರ್ಣವಾದ ಹೆಸರು ವಿಠಲ್ ಬಾಪೂರಾವ್ ಖೋಟೆ. 1964ರಿಂದ ತಮ್ಮ ಸಿನಿಪಯಣವನ್ನು ಪ್ರಾರಂಭಿಸಿದ ವಿಜು, ಮುಂದೆ ಹಿಂದಿ ಮತ್ತು ಮರಾಠಿ ಚಿತ್ರರಂಗದಲ್ಲಿ ಸಕ್ರಿಯರಾಗಿ ತೊಡಗಿಕೊಂಡ್ರು. ಶೋಲೆ, ತಪಸ್ಯ, ದರಿಯಾ ದಿಲ್, ಚೀನಾ ಗೇಟ್, ಅಜಬ್ ಪ್ರೇಮ್‍ ಕೀ ಗಜಬ್ ಕಹಾನಿ, ಅಂದಾಝ್ ಅಪ್ನಾ ಅಪ್ನಾ ಸೇರಿದಂತೆ ಬರೋಬ್ಬರಿ 300 ಚಿತ್ರಗಳಲ್ಲಿ ನಟಿಸಿದ ಕೀರ್ತಿ ವಿಜು ಅವರಿಗೆ ಸಲ್ಲುತ್ತೆ.
ಶೋಲೆ ಬೆಟ್ಟ: ಮಾಸದ ಜನಪ್ರಿಯತೆ, ಮೋಹಬಿಡದ ಜನತೆ
ಈ ಎಲ್ಲಾ ಚಿತ್ರಗಳಲ್ಲಿ ವಿಜು ಖೋಟೆಯವ್ರಿಗೆ ಖ್ಯಾತಿಯನ್ನು ತಂದು ಕೊಟ್ಟಿದ್ದು 'ಶೋಲೆ'. ರಮೇಶ್ ಸಿಪ್ಪಿ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನಿಮಾ, 1975ರ ಬ್ಲಾಕ್‌ಬಸ್ಟರ್ ಹಿಟ್ ಆಗಿ ಫೇಮಸ್ ಆಯ್ತು. ಅಮಿತಾಭ್ ಬಚ್ಚನ್, ಧರ್ಮೇಂದ್ರ, ಸಂಜೀವ್ ಕುಮಾರ್, ಅಮ್ಜಾದ್ ಖಾನ್, ಹೇಮ ಮಾಲಿನಿ, ಜಯಾ ಭಾದುರಿ, ವಿಜು ಖೋಟೆ ನಟಿಸಿದ್ದ 'ಶೋಲೆ', ಕರ್ನಾಟಕದ ರಾಮನಗರ ಜಿಲ್ಲೆಯಲ್ಲಿ ಚಿತ್ರೀಕರಣಗೊಂಡಿದ್ದು ವಿಶೇಷ.

'ಶೋಲೆ'ಯಲ್ಲಿ ವಿಜು ಖೋಟೆಯವರಿಗೆ ಕೆಲವೇ ಡೈಲಾಗ್‌ಗಳಿದ್ವು. ಇದರಲ್ಲಿ ಹೆಚ್ಚು ಪ್ರಖ್ಯಾತಿಯಾಗಿದ್ದು "ಸರ್ದಾರ್ ಮೇನೆ ಆಪ್‌ಕಾ ನಮಕ್ ಖಾಯಾ ಹೈ" ಅನ್ನೋ ಲೈನ್. ಇದೊಂದೇ ಅಲ್ಲಾ 'ಅಂದಾಝ್ ಅಪ್ನಾ ಅಪ್ನಾ' ಸಿನಿಮಾದ "ಗಲ್ತಿ ಸೇ ಮಿಸ್ಟೇಕ್ ಹೋಗಯಾ" ಡೈಲಾಗ್ ಕೂಡ ಟ್ರೆಂಡ್ ಸೃಷ್ಟಿಸಿತ್ತು. ಹೀಗೆ ಚಿಕ್ಕ ಪಾತ್ರಗಳನ್ನೂ ಅಚ್ಚುಕಟ್ಟಾಗಿ ನಿರ್ವಹಿಸುತ್ತಿದ್ದ ವಿಜು, ಕೆಲ ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ರು.

ಅಂದ್ಹಾಗೇ ವಿಜು ಅವರಿಗೆ ಆಸ್ಪತ್ರೆಯಲ್ಲಿ ತಮ್ಮ ಅಂತಿಮ ದಿನಗಳನ್ನು ಕಳೆಯಲು ಇಷ್ಟವಿರಲಿಲ್ಲವಂತೆ. ಹೀಗಾಗಿ ಕೆಲ ದಿನಗಳ ಹಿಂದೆಯಷ್ಟೇ ವಿಜು ಅವರನ್ನು ಮನೆಗೆ ಕರೆದುಕೊಂಡು ಬರಲಾಯ್ತು. ಕೊನೆಗೂ ಸ್ವಗೃಹದಲ್ಲಿಯೇ ಇಂದು ಬೆಳಗ್ಗೆ 6.55ಕ್ಕೆ ಬಹು ಅಂಗಾಂಗ ವೈಫಲ್ಯದಿಂದ ಕೊನೆಯುಸಿರನ್ನು ಎಳೆದಿದ್ದಾರೆ ಬಾಲಿವುಡ್‌ನ ಈ ಕಲಾವಿದ.
ರಣಹದ್ದುಗಳನ್ನು ವೀಕ್ಷಿಸಲು ಅತ್ಯಂತ ಸೂಕ್ತ ತಾಣ ರಾಮದೇವರ ಬೆಟ್ಟ