​ಕನ್ನಡದಲ್ಲಿ 'ಕಲಿಸು ಗುರುವೇ' ಅಂತಿದ್ದಾರೆ ಜೂಹಿ

ಬಾಲಿವುಡ್‌ನ ಖ್ಯಾತ ನಟಿ ಜೂಹಿ ಚಾವ್ಲಾ ಕಳೆದ ವರ್ಷ 'ಪುಷ್ಪಕ ವಿಮಾನ' ಚಿತ್ರದಲ್ಲಿ ಅತಿಥಿಯಾಗಿ ಕಾಣಿಸಿಕೊಂಡಿದ್ದು ನಿಮಗೆಲ್ಲ ಗೊತ್ತೇ ಇದೆ. 'ಜಲ್ಸಾ...ಜಲ್ಸಾರೇ..' ಹಾಡಿಗೆ ಹೆಜ್ಜೆ ಹಾಕುವ ಮೂಲಕ ಕನ್ನಡ ಚಿತ್ರರಂಗಕ್ಕೆ ರೀ-ಎಂಟ್ರಿ ನೀಡಿದರು ಜೂಹಿ.

ಇದೀಗ ಸರದೇಶಪಾಂಡೆ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ 'ವೆರಿಗುಡ್‌' ಚಿತ್ರದಲ್ಲಿ ಜೂಹಿ ನಟಿಸುತ್ತಿದ್ದಾರೆ. ಸಂಗೀತ ಶಿಕ್ಷಕಿಯಾಗಿ ಕಾಣಿಸಿಕೊಂಡಿರುವ 'ಪ್ರೇಮಲೋಕ' ತಾರೆ, ಚಿತ್ರಕ್ಕಾಗಿ ಒಂದು ಹಾಡನ್ನೂ ಹಾಡಿರುವುದು ವಿಶೇಷ. 'ಕಲಿಸು ಗುರುವೇ ಕಲಿಸು' ಎಂಬ ಹಾಡಿನಲ್ಲಿ ಮಕ್ಕಳೊಂದಿಗೆ ನಟಿಸಿದ್ದಾರೆ ಜೂಹಿ.

ಇದೀಗ ಅದೇ ಹಾಡು ಜೂಹಿ ಕಂಠಸಿರಿಯಲ್ಲಿ ಮೂಡಿಬರುತ್ತಿರುವುದು ಚಿತ್ರಕ್ಕೆ ಪ್ಲಸ್‌ ಪಾಯಿಂಟ್‌ ಆಗೋದಂತೂ ಗ್ಯಾರಂಟಿ. ರಂಗಾಯಣದ ರಾಮನಾಥ್‌ ಈ ಹಾಡನ್ನು ಬರೆದಿದ್ದು, ದಿವಂಗತ ರಾಜು ಅನಂತಸ್ವಾಮಿ ಅವರು ರಾಗ ಸಂಯೋಜಿಸಿ ಹಲವು ವರ್ಷಗಳ ಹಿಂದೆಯೇ ಹಾಡಿದ್ದರು. ಸಂಗೀತ ನಿರ್ದೇಶಕ ವಿ. ಮನೋಹರ್‌ ಈ ಹಾಡಿಗೆ ಚಿತ್ರಕ್ಕೆ ತಕ್ಕಂತೆ ಹೊಸ ರೂಪ ನೀಡಿದ್ದಾರೆ ಎನ್ನಲಾಗಿದೆ.