ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿರುವ ಬಾಲಿವುಡ್ ಸಿನಿಮಾ ಕಳಂಕ್!

ಬಾಲಿವುಡ್ ಬಹು ನಿರೀಕ್ಷೆಯ 'ಕಳಂಕ್' ಸಿನಿಮಾ ರಿಲೀಸ್ ಆಗಿ ಕೇವಲ ಎರಡು ದಿನಗಳು ಕಳೆದಿವೆ. ಈ ಎರಡು ದಿನಗಳಲ್ಲಿ 'ಕಳಂಕ್' ಬಾಕ್ಸ್ ಆಫೀಸ್ ನಲ್ಲಿ ಸಖತ್ ಧೂಳ್ ಎಬ್ಬಿಸಿದೆ. ಏಪ್ರಿಲ್ 16ರಂದು ಬಿಡುಗಡೆ ಕಂಡಿರುವ 'ಕಳಂಕ್' ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಟ್ರೈಲರ್ ಮತ್ತು ಹಾಡುಗಳ ಮೂಲಕವೇ ಚಿತ್ರಾಭಿಮಾನಿಗಳ ಕುತೂಹಲ ಹೆಚ್ಚಿಸಿತ್ತು ಕಳಂಕ್. ಬಿಡುಗಡೆ ಬಳಿಕ ಕೂಡ ಈ ಸಿನಿಮಾ ಸಿನಿಪ್ರೇಕ್ಷಕರಿಗೆ ನಿರಾಸೆ ಮೂಡಿಸಿಲ್ಲ.

ಹೌದು, 'ಕಳಂಕ್' ರಿಲೀಸ್ ಆದ ಎರಡು ದಿನಗಳಲ್ಲೇ 31 ಕೋಟಿ ಕಲೆಕ್ಷನ್ ಮಾಡಿದೆ. ಮೊದಲ ದಿನ ಬರೋಬ್ಬರಿ 21 ಕೋಟಿ ರೂ. ಬಾಚಿಕೊಂಡು ದಾಖಲೆ ನಿರ್ಮಿಸಿದೆ. ಆದರೆ ಎರಡನೇ ದಿನದ ಕಲೆಕ್ಷನ್ ಕಮ್ಮಿಯಾಗಿದ್ದು ಕೇವಲ 10 ಕೋಟಿ ಮಾತ್ರ ಗಳಿಕೆ ಮಾಡಿದೆ. ಒಟ್ಟು 31 ಕೋಟಿ ಗಳಿಸುವ ಮೂಲಕ ಈ ವರ್ಷದ ಮೊದಲ ದಿನದ ಗಳಿಕೆಯಲ್ಲಿ ಅತೀ ಹೆಚ್ಚು ಕಲೆಕ್ಷನ್ ಮಾಡಿದ ಸಿನಿಮಾ ಆಗಿ ಕಳಂಕ್ ಹೊರಹೊಮ್ಮಿದೆ. ಈ ಚಿತ್ರವು ವೀಕೆಂಡ್‌ನಲ್ಲಿ ಸುಮಾರು 85 ಕೋಟಿ ಕಲೆಕ್ಷನ್ ಮಾಡುವ ನಿರೀಕ್ಷೆಯಲ್ಲಿದೆ ಚಿತ್ರತಂಡ.

ಕಳಂಕ್ ಸಿನಿಮಾವನ್ನು ಕರಣ್ ಜೋಹರ್ ನಿರ್ಮಾಣ ಮಾಡಿದ್ದಾರೆ. ಐತಿಹಾಸಿಕ ಕಥೆಯಾಗಿರುವ 'ಕಳಂಕ್' ಚಿತ್ರದಲ್ಲಿ ಬಾಲಿವುಡ್ ದೊಡ್ಡ ಸ್ಟಾರ್ ನಟನಟಿಯರ ದಂಡೇ ಇದೆ. ಮಾಧುರಿ ದೀಕ್ಷಿತ್, ಸಂಜಯ್ ದತ್, ಆಲಿಯಾ ಭಟ್, ವರುಣ್ ಧವನ್, ಸಿದ್ಧಾರ್ತ್ ಮಲ್ಹೋತ್ರ ಸೇರಿದಂತೆ ದೊಡ್ಡ ಭಾರೀ ತಾರಾಬಳಗವೆ ಈ ಚಿತ್ರದಲ್ಲಿದೆ. ಪ್ರತಿಯೊಬ್ಬರ ಪಾತ್ರವು ವಿಭಿನ್ನವಾಗಿದ್ದು ಸಿನಿಪ್ರಿಯರ ಮನ ಮುಟ್ಟುವಲ್ಲಿ ಈ ಚಿತ್ರವು ಯಶಸ್ವಿಯಾಗಿದೆ.

ಅಚ್ಚರಿ ಹಾಗೂ ವಿಶೇಷ ಎಂಬಂತೆ, ಮಾಧುರಿ ದೀಕ್ಷಿತ್ ಮತ್ತು ಸಂಜಯ್ ದತ್ 25 ವರ್ಷಗಳ ಬಳಿಕ 'ಕಳಂಕ್' ಚಿತ್ರದ ಮೂಲಕ ಮತ್ತೆ ತೆರೆಯಲ್ಲಿ ಒಂದೇ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಬಹಳಷ್ಟು ವಿಶೇಷತೆಗಳಿಂದ ಕೂಡಿರುವ 'ಕಳಂಕ್' ಮುಂದಿನ ಮೂರು ದಿನಗಳಲ್ಲಿ ಇನ್ನೂ ಹೆಚ್ಚು ಕಲೆಕ್ಷನ್ ಮಾಡುವ ನಿರೀಕ್ಷೆಯಲ್ಲಿದೆ. ಒಟ್ಟಿನಲ್ಲಿ, ಬಿಡುಗಡೆಯಾದ ಎರಡು ದಿನಗಳ, ರೂ. 31 ಕೊಟಿ ಕಲೆಕ್ಷನ್ 'ಗುಡ್ ಕಲೆಕ್ಷನ್' ಎನ್ನಬಹುದು.