ಸಾವಿರಾರು ಗಿಡಗಳನ್ನು ನೆಡಲು ಮುಂದಾದ ದರ್ಶನ್‌

ದರ್ಶನ್‌ ಮೈಸೂರಿನಲ್ಲಿ ಫಾರ್ಮ್‌ಹೌಸ್‌ ಮಾಡಿದ್ದು, ಇಲ್ಲಿ ಅನೇಕ ಪ್ರಾಣಿ ಪಕ್ಷಿಗಳನ್ನು ಸಾಕಿದ್ದಾರೆ. ನಿರಂತರವಾಗಿ ಅಲ್ಲಿಗೆ ಹೋಗಿ ತಾವೇ ಖುದ್ದಾಗಿ ಅವುಗಳನ್ನು ನೋಡಿಕೊಳ್ಳುತ್ತಾರೆ. ಇವರ ಪರಿಸರ ಕಾಳಜಿ ನೋಡಿ ಅರಣ್ಯ ಇಲಾಖೆ ಬ್ರಾಂಡ್‌ ಅಂಬಾಸಡರ್‌ ಮಾಡಿದೆ. ಪರಿಸರ ಜಾಗೃತಿ ಮೂಡಿಸುವ ಜವಾಬ್ದಾರಿಯನ್ನು ದರ್ಶನ್‌ ಹೆಗಲಿಗೆ ಹಾಕಿದೆ. ಈಗ ಸ್ವತಃ ದರ್ಶನ್‌ ತಮ್ಮ ತೋಟದಲ್ಲೇ ಅಪರೂಪದ ತಳಿಗಳನ್ನು ಬೆಳೆಸಿ ಇತರರಿಗೆ ಮಾದರಿಯಾಗಲು ಹೊರಟಿದ್ದಾರೆ. ಇದನ್ನು ನಟಿ ಸುಮಲತಾ ಹೊಗಳಿದ್ದಾರೆ.

ಸುಮಲತಾ ದರ್ಶನ್‌ರನ್ನು ಹೊಗಳಿ ಟ್ವೀಟ್‌ ಮಾಡಿದ್ದಾರೆ. 'ದರ್ಶನ್‌ ತಮ್ಮ ಸಾವಿರಾರು ಅಭಿಮಾನಿಗಳಿಗೆ ಬಾಸ್‌ ಆಗಲು ಈ ಒಂದು ಉದಾಹರಣೆ ಸಾಕು' ಎಂದಿದ್ದಾರೆ.

ಕಳೆದ 13 ವರ್ಷಗಳಿಂದ ತೋಟದಲ್ಲಿ ಪ್ರಾಣಿಗಳನ್ನು ಸಾಕುತ್ತಿದ್ದಾರೆ. ಅಲ್ಲದೆ, ಮೈಸೂರು ಝೂನಲ್ಲೂ ಒಂದು ಆನೆ ಮತ್ತು ಹುಲಿಯನ್ನು ದತ್ತು ಪಡೆದು, ವರ್ಷದ ಖರ್ಚನ್ನು ಭರಿಸುತ್ತಿದ್ದಾರೆ ದರ್ಶನ್‌. ಈಗ ಅವರು ಪರಿಸರವನ್ನು ಹಸಿರು ಮಾಡಲು ನಿರ್ಧರಿಸಿದ್ದಾರೆ.