3 ಗಂಟೆಯಲ್ಲಿ ತಮಿಳು ಕಲಿತ ಚಂದನ್‌!

ಬಿಗ್‌ಬಾಸ್‌ ಸೀಸನ್‌ 3 ರನ್ನರ್‌ ಅಪ್‌ ಚಂದನ್‌ ಕೇವಲ ಮೂರು ಗಂಟೆಯಲ್ಲಿ ತಮಿಳು ಭಾಷೆ ಬರೆಯಲು ಮತ್ತು ಓದಲು ಕಲಿತಿದ್ದಾರೆ ಅಂದ್ರೆ ನೀವು ನಂಬಲೇಬೇಕು.

ಸದ್ಯ ಚಂದನ್‌ ತಮಿಳು ಮತ್ತು ಕನ್ನಡ ಭಾಷೆಯಲ್ಲಿ ತಯಾರಾಗುತ್ತಿರುವ 'ಪ್ರೇಮ ಬರಹ' ಚಿತ್ರದ ಡಬ್ಬಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ. ಅರ್ಜುನ್‌ ಸರ್ಜಾ ಆ್ಯಕ್ಷನ್‌ ಕಟ್‌ ಹೇಳುತ್ತಿರುವ ಈ ಚಿತ್ರದ ಮೂಲಕ ಕನ್ನಡದ ಕಿರುತೆರೆ ಸ್ಟಾರ್‌ ಚಂದನ್‌, ತಮಿಳು ಚಿತ್ರರಂಗಕ್ಕೆ ಪರಿಚಿತವಾಗುತ್ತಿದ್ದಾರೆ. ಚಂದನ್‌ಗೆ ನಾಯಕಿಯಾಗಿ ಅರ್ಜುನ್‌ ಸರ್ಜಾ ಪುತ್ರಿ ಐಶ್ವರ್ಯ, ಸ್ಯಾಂಡಲ್‌ವುಡ್‌ ಅಂಗಳಕ್ಕೆ ಪಾದಾರ್ಪಣೆ ಮಾಡುತ್ತಿರುವುದು ನಿಮಗೆಲ್ಲ ಗೊತ್ತೇ ಇದೆ.

ಇದು ಎರಡು ಭಾಷೆಗಳಲ್ಲಿ ನಿರ್ಮಾಣವಾಗುತ್ತಿರುವುದರಿಂದ ತಮಿಳು ಭಾಷೆಯ ಕಲಿಕೆ ಚಂದನ್‌ಗೆ ಅನಿವಾರ್ಯವಾಗಿತ್ತಂತೆ. ಹಾಗಾಗಿ ಭಾಷೆಯ ಕಲಿಕೆಗೆ ಯುಟ್ಯೂಬ್‌ ಮೊರೆ ಹೋದರಂತೆ. ತಮಿಳಿಗೆ ಸಂಬಂಧಿಸಿದ ಒಂದಿಷ್ಟು ವೀಡಿಯೋಗಳನ್ನು ವೀಕ್ಷಿಸಿ, ಅಭ್ಯಾಸ ಮಾಡಿದರಂತೆ ಚಂದನ್‌. ವೀಡಿಯೋಗಳಲ್ಲಿ ಹೇಳಲಾದ ಸರಳ ಮಾರ್ಗಗಳನ್ನು ಅನುಸರಿಸಿ ತಮಿಳು ಭಾಷೆಯನ್ನು ಓದಲು ಮತ್ತು ಬರೆಯಲು ಕಲಿತರಂತೆ. ಹೀಗಂತ ಸ್ವತಃ ಚಂದನ್‌ ಅವರೇ ಹೇಳಿಕೊಂಡಿದ್ದಾರೆ.

ಈ ಮೊದಲು ಕಿರುತೆರೆಯಲ್ಲಿ ಮಿಂಚಿದ ಚಂದನ್‌, 'ಲವ್‌ ಯು ಅಲಿಯಾ' ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ನಂತರ ಬಿಗ್‌ಬಾಸ್‌ ಸೀಸನ್‌ 3 ರಿಯಾಲಿಟಿ ಶೋನಲ್ಲಿ ಗುರುತಿಸಿಕೊಂಡರು. 'ಪ್ರೇಮ ಬರಹ' ಚಿತ್ರದ ಹೊರತಾಗಿ ಮತ್ಯಾವುದೇ ಚಿತ್ರವನ್ನು ಚಂದನ್‌ ಸದ್ಯಕ್ಕೆ ಒಪ್ಪಿಕೊಂಡಿಲ್ಲ.