ಯಕ್ಷಗಾನ ಕಲಾವಿದರ ಅಂತರಂಗದ 'ಚೌಕಿ'

ಯಕ್ಷಗಾನ ಕರಾವಳಿಗರಿಗೆ ಅತ್ಯಂತ ಪರಿಚಿತ. ಇದನ್ನು ಇಡೀ ಕನ್ನಡ ನಾಡಿಗೆ ಪರಿಚಯಿಸುವ ಪುಟ್ಟ ಯತ್ನಕ್ಕೆ ಕರಾವಳಿಯ ಕಲಾವಿದರು ಮುಂದಾಗಿದ್ದಾರೆ. ಯಕ್ಷಗಾನದ ವೇಷಧಾರಿಗಳು ಸಿದ್ಧರಾಗುವ ಸ್ಥಳಕ್ಕೆ ಚೌಕಿ ಎಂದು ಕರೆಯುತ್ತಾರೆ. ಚೌಕಿ ಹೆಸರಿನಲ್ಲಿ ಕನ್ನಡ ಸಿನಿಮಾವೊಂದು ಸದ್ದಿಲ್ಲದೆ ಸೆಟ್ಟೇರಿ ಡಬ್ಬಿಂಗ್‌ ಮುಗಿಸಿದೆ.

ಯಕ್ಷಗಾನ ಕಲಾವಿದರ ನಿತ್ಯ ಬದುಕಿನ ಅಂತರಂಗ ಮತ್ತು ಬಹಿರಂಗ ಮೇಲೆ ಬೆಳಕು ಚೆಲ್ಲುವ ಆರ್ಟ್‌ ಮೂವಿ ಮಾದರಿಯಲ್ಲಿ ನಿರ್ಮಾಣವಾಗಿರುವ ವಿಭಿನ್ನ ಚಿತ್ರವಿದು. ಕೆಲವು ಗೆಳೆಯರು ಒಟ್ಟು ಸೇರಿ ಡ್ರೀಮ್‌ ಸ್ಟುಡಿಯೋ ಬ್ಯಾನರ್‌ನಲ್ಲಿ ಚಿತ್ರ ನಿರ್ಮಾಣವಾಗುತ್ತಿದೆ. ಕಳೆದ ಮೂರು ವರ್ಷಗಳಿಂದ ನಿರ್ಮಾಣ ಕೆಲಸ ಸಾಗುತ್ತಿದೆ. ಅಂದ ಹಾಗೆ ಇದು ಸಂಪೂರ್ಣ ಆರ್ಟ್‌ ಚಿತ್ರವೂ ಅಲ್ಲ. ಸಾಮಾನ್ಯ ಪ್ರೇಕ್ಷಕರಿಗೆ ಮನೋರಂಜನೆ ನೀಡಬಲ್ಲ ಎಲ್ಲಾ ಅಂಶಗಳನ್ನು ಸೇರಿಸಿಕೊಂಡು ಚಿತ್ರಕಥೆ ಮಾಡಿ ಶೂಟಿಂಗ್‌ ಮುಗಿಸಲಾಗಿದೆ.

ಅಂದ ಹಾಗೆ ಚೌಕಿಯನ್ನು ನಿರ್ದೇಶಿಸುತ್ತಿರುವವರು ಹಲವು ಶಾರ್ಟ್‌ಫಿಲ್ಮ್‌ಗಳನ್ನು ಮಾಡಿರುವ ಜಯಪ್ರಕಾಶ್‌. ಚಿತ್ರಕಥೆ, ಸಂಕಲನವನ್ನು ಅವರೇ ನಿರ್ವಹಿಸಿದ್ದಾರೆ. ಕಥೆ, ಸಂಭಾಷಣೆ ಹಾಗೂ ಕ್ಯಾಮೆರಾವನ್ನು ದೇರಳಕಟ್ಟೆ ಸುರೇಶ್‌ ನಿರ್ವಹಿಸಿದ್ದಾರೆ. ಮೋಹನ್‌ದಾಸ್‌ ಕೊಟ್ಟಾರಿ, ಸಂದೀಪ್‌ ಪೂಜಾರಿ, ವಿನುತಾ ಡಿಸೋಜಾ ಲೀಡ್‌ ರೋಲ್‌ಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಯಕ್ಷಗಾನ ಕಲಾವಿದರಾದ ಸರಪಾಡಿ ಅಶೋಕ್‌ ಶೆಟ್ಟಿ, ತಾರಾನಾಥ ವರ್ಕಾಡಿ ಮುಂತಾದವರು ತಾರಾಗಣದಲ್ಲಿದ್ದಾರೆ.

ಚಿತ್ರದಲ್ಲಿ ವಿಭಿನ್ನ ರೀತಿಯ ಐದು ಹಾಡುಗಳಿವೆ. ವಿಜೇಶ್‌ ದೇವಾಡಿಗ ಮಂಗಳಾದೇವಿ ಅವರ ಸಾಹಿತ್ಯವಿರುವ ನಾಲ್ಕು ಹಾಡುಗಳು ಗಮನ ಸೆಳೆಯುವ ರೀತಿಯಲ್ಲಿ ಮೂಡಿಬಂದಿದೆ. ಮುಂದಿನ ತಿಂಗಳು ಹಾಡುಗಳ ಬಿಡುಗಡೆಗೆ ಚಿತ್ರತಂಡ ಸಿದ್ಧತೆ ಮಾಡಿಕೊಳ್ಳುತ್ತಿದೆ.

ಕನ್ನಡದ ಖ್ಯಾತ ಗಾಯಕರಾದ ರಾಜೇಶ್‌ ಕೃಷ್ಣನ್‌ ಮತ್ತು ಅನುರಾಧಾ ಭಟ್‌ ಚೌಕಿಯ ಹಾಡಿಗೆ ಕಂಠದಾನ ಮಾಡಿದ್ದಾರೆ. ಉದಯೋನ್ಮುಖ ಕಲಾವಿದರಾದ ಚೇತನ್‌ ರಾಮ್‌, ಪ್ರಿಯಾ ಯಾದವ್‌ ಕೂಡ ಹಿನ್ನೆಲೆ ಗಾಯಕರಾಗಿ ಅವಕಾಶ ಪಡೆದುಕೊಂಡಿದ್ದಾರೆ. ಶಕಿಲ್‌ ಅಹಮ್ಮದ್‌ ಅವರ ಸಂಗೀತವಿದೆ. ಬೆಂಗಳೂರಿನ ಕಂಠೀರವ ಸ್ಟುಡಿಯೋದಲ್ಲಿ ಹಾಡುಗಳ ರೆಕಾರ್ಡಿಂಗ್‌ ಕೆಲಸ ನಿರ್ವಹಿಸಲಾಗಿದೆ.