ಬೀರ್‌ಬಲ್‌ಗಾಗಿ ಲಾಯರ್‌ ಆದ ಕರ್ನಲ್‌ ಪುತ್ರಿ

ಕರ್ನಲ್‌ ವಸಂತ್‌ ವೇಣುಗೋಪಾಲ್‌ ಪುತ್ರಿ ರುಕ್ಮೀಣಿ 'ಬೀರ್‌ಬಲ್‌' ಸಿನಿಮಾದ ಮೂಲಕ ಸ್ಯಾಂಡಲ್‌ವುಡ್‌ ಪ್ರವೇಶ ಮಾಡಿದ್ದಾರೆ. ಈ ಸಿನಿಮಾದಲ್ಲಿ ಅವರು ಲಾಯರ್‌ ಪಾತ್ರ ನಿರ್ವಹಿಸಿದ್ದಾರೆ. ಬೀರ್‌ಬಲ್‌ ಚೊಚ್ಚಲು ಸಿನಿಮಾವಾಗಿದ್ದು, ಮೊದಲ ಚಿತ್ರದಲ್ಲಿಯೇ ಅವರಿಗೆ ಸವಾಲಿನ ಪಾತ್ರ ಸಿಕ್ಕಿದೆ.

'ಬೀರ್‌ಬಲ್‌ ಚಿತ್ರಕ್ಕಾಗಿ ನಿರ್ದೇಶಕ ಶ್ರೀನಿ ಅವರು ಆಡಿಷನ್‌ ಮಾಡಿದ್ದರು. ಅದರಲ್ಲಿ ನಾನು ಭಾಗವಹಿಸಿದ್ದೆ. ಅಲ್ಲಿಯೇ ನಾನು ಆಯ್ಕೆಯಾಗಿದ್ದು. ಒಂದೊಳ್ಳೆ ಪಾತ್ರದ ಮೂಲಕ ಸಿನಿಮಾ ರಂಗಕ್ಕೆ ಪ್ರವೇಶ ಮಾಡಿದ್ದು ಖುಷಿ ಆಗುತ್ತಿದೆ' ಎಂದರು ರುಕ್ಮೀಣಿ.

ಸಿನಿಮಾ ರಂಗಕ್ಕೆ ಇವರು ಹೊಸಬರಾದರೂ, ನಟನೆಯ ಅನುಭವವಿದೆ. ಯುಕೆಯಲ್ಲಿ ಇವರು ಥಿಯೇಟರ್‌ ಆರ್ಟಿಸ್ಟ್‌. ಹಾಗಾಗಿ ಬಣ್ಣದ ಪ್ರಪಂಚದಲ್ಲಿಯೇ ಮುಂದುವರೆಯುವ ನಿರ್ಧಾರ ಮಾಡಿದ್ದಾರೆ.

'ಬೀರ್‌ಬಲ್‌ ಚಿತ್ರಕ್ಕಾಗಿ ನಾವು ಎರಡು ಕಡೆ ಆಡಿಷನ್‌ ಮಾಡಿದ್ದೆವು. ನೂರಾರು ಹುಡುಗಿಯರು ಆಡಿಷನ್‌ಗೆ ಬಂದಿದ್ದರು. ಅದರಲ್ಲಿ ಆಯ್ಕೆಯಾಗಿದ್ದು ರುಕ್ಮೀಣಿ. ಪಾತ್ರದ ಬಗ್ಗೆ ತುಂಬಾ ಚೆನ್ನಾಗಿ ಅರ್ಥೈಸಿಕೊಂಡು ನಟಿಸಿದ್ದಾರೆ. ಅವರಿಗೆ ಈ ಸಿನಿಮಾ ಒಳ್ಳೆಯ ಹೆಸರು ತಂದು ಕೊಡುತ್ತದೆ' ಎನ್ನುವುದು ಶ್ರೀನಿ ಮಾತು.

ಇದೊಂದು ಕ್ರೈಮ್‌ ಮತ್ತು ಥ್ರಿಲ್ಲರ್‌ ಆಧರಿಸಿದ ಸಿನಿಮಾವಾಗಿದ್ದು, ಮೂರು ಭಾಗವಾಗಿ ಸಿನಿಮಾ ಮೂಡಿ ಬರಲಿದೆ. ನಿರ್ದೇಶನದ ಜತೆಗೆ ನಾಯಕರಾಗಿ ನಟಿಸಿದ್ದಾರೆ ಶ್ರೀನಿ. ಟಿ.ಆರ್‌.ಚಂದ್ರಶೇಖರ್‌ ನಿರ್ಮಾಣದಲ್ಲಿ ಸಿನಿಮಾ ತಯಾರಾಗಿದೆ.