*ಹರೀಶ್ ಬಸವರಾಜ್
ಎಂಬತ್ತು ತೊಂಭತ್ತರ ದಶಕದಲ್ಲಿ ತಯಾರಾಗುತ್ತಿದ್ದ ಎಲ್ಲ ಸಿನಿಮಾಗಳು ಸಂಪೂರ್ಣವಾಗಿ ಸೆಟ್ಗಳಲ್ಲಿಯೇ ಚಿತ್ರೀಕರಣವಾಗುತ್ತಿದ್ದವು. ಕೆಲ ದಿನಗಳ ನಂತರ ಸೆಟ್ ಸಂಸ್ಕೃತಿ ನಿಧಾನವಾಗಿ ಹೋಗಿ ರಿಯಲ್ ಲೊಕೇಶನ್ನಲ್ಲಿ ಚಿತ್ರೀಕರಣ ಮಾಡಲು ಆರಂಭಿಸಿದರು. ಆದರೆ ದುನಿಯಾ ವಿಜಯ್ ನಾಯಕರಾಗಿರುವ ಜಾನಿ ಜಾನಿ ಎಸ್ ಪಪ್ಪ ಸಿನಿಮಾವನ್ನು ಸಂಪೂರ್ಣವಾಗಿ ಸೆಟ್ನಲ್ಲಿಯೇ ಚಿತ್ರೀಕರಣ ನಡೆಸಲಾಗಿದೆ. ಇದಕ್ಕಾಗಿ ನೆಲಮಂಗಲ ಬಳಿ ಒಂದು ಎಕರೆ ಜಾಗದಲ್ಲಿ ದೊಡ್ಡ ಸೆಟ್ ಹಾಕಲಾಗಿದ್ದು, ಇಲ್ಲಿ ಒಂದು ಕಾಲೋನಿಯನ್ನೇ ಅದ್ಭುತವಾಗಿ ಸೃಷ್ಟಿ ಮಾಡಲಾಗಿದೆ.
ಜಾನಿ ಜಾನಿ ಎಸ್ ಪಪ್ಪಾ ಈ ಹಿಂದೆ ಬಿಡುಗಡೆಯಾಗಿ ಯಶಸ್ವಿಯಾಗಿದ್ದ ಜಾನಿ ಮೇರಾ ನಾಮ್ ಚಿತ್ರದ ಮುಂದುವರಿದ ಭಾಗವಾಗಿದೆ. ಜಾನಿ ಮೇರಾ ನಾಮ್ನಲ್ಲಿಯೂ ಒಂದು ಸ್ಟ್ರೀಟ್ ಸೆಟ್ ಹಾಕಿ ಶೂಟಿಂಗ್ ಮಾಡಲಾಗಿತ್ತು. ಅದರ ಮುಂದುವರಿದ ಭಾಗವನ್ನು ನಿರ್ದೇಶಕ ಪ್ರೀತಂ ಗುಬ್ಬಿ ಮತ್ತು ದುನಿಯಾ ವಿಜಯ್ ಕೈಗೆತ್ತಿಕೊಂಡಾಗ ಅವರು ಮತ್ತೊಮ್ಮೆ ಸೆಟ್ ಹಾಕಲು ಚಿಂತನೆ ನಡೆಸಿದರು. ಆದರೆ ಈ ಬಾರಿ ಕಳೆದ ಬಾರಿಗಿಂತಲೂ ದೊಡ್ಡ ಸೆಟ್ ಹಾಕಲು ಯೋಚಿಸಿದರು. ಆಗ ನಿರ್ಮಾಣವಾಗಿದ್ದೇ 'ರೈನ್ಬೋ ಕಾಲೋನಿ' ಸೆಟ್.
ಈ ರೈನ್ಬೋ ಕಾಲೋನಿಯಲ್ಲಿ ಕ್ರಿಶ್ಚಿಯನ್ ಸ್ಟ್ರೀಟ್, ಹಿಂದೂ ಸ್ಟ್ರೀಟ್, ಮುಸ್ಲಿಮ್ ಸ್ಟ್ರೀಟ್ಗಳಿವೆ. ಎಲ್ಲ ಧರ್ಮಗಳವರು ಇಲ್ಲಿ ವಾಸಿಸುತ್ತಾರೆ ಎಂಬುದರ ಸಾರಾಂಶವಿದು. ಈ ಹಿಂದೆ ಕಲರ್ಫುಲ್ ಸೆಟ್ನಲ್ಲಿ ಶೂಟಿಂಗ್ ಮಾಡಿದ್ದ ಚಿತ್ರತಂಡ, ಈ ಬಾರಿ ಒಂದು ಕಾಲೋನಿ ನಿಜವಾಗಿಯೂ ಹೇಗಿರುತ್ತದೋ ಹಾಗೆ ರಿಯಲಿಸ್ಟಿಕ್ ರೂಪಿಸಿದೆ. ಈ ಸೆಟ್ ಇಷ್ಟು ನೈಜವಾಗಿ ಮೂಡಿ ಬರಲು ಮುಖ್ಯ ಕಾರಣ ಮೋಹನ್ ಬಿ. ಕೆರೆ ಮತ್ತವರ ತಂಡದ ಶ್ರಮ.
ಸುಮಾರು ಎರಡು ತಿಂಗಳು ಮೋಹನ್ ಬಿ. ಕೆರೆ ಮತ್ತವರ ತಂಡ ಈ ಸೆಟ್ಗಾಗಿ ಕೆಲಸ ಮಾಡಿದೆ. 50ಕ್ಕೂ ಹೆಚ್ಚು ಮಂದಿ ಬಡಗಿಗಳು, 20 ಮಂದಿ ಆರ್ಟಿಸ್ಟ್ಗಳು, ಕಾರ್ಮಿಕರು ಸೇರಿ ಒಟ್ಟು 120 ರಿಂದ 150 ಮಂದಿ ಈ ಕಾಲೋನಿಯ ಸೃಷ್ಟಿಗಾಗಿ ದುಡಿದಿದ್ದಾರೆ.
'ವಿಜಯ್ ಮತ್ತು ಪ್ರೀತಂ ಅವರು ಈ ರೀತಿ ಕಥೆಯ ಮಾಡಿದ್ದೇವೆ ಎಂದು ನನ್ನ ಬಳಿ ಹೇಳಿದಾಗ ನಾನು ಕಳೆದ ಬಾರಿಗಿಂತಲೂ ಹೊಸ ಮಾದರಿಯ ಸೆಟ್ ಹಾಕೋಣ ಎಂದು ಹೇಳಿದೆ. ಅದರಂತೆ ಒಂದು ಪಾಂಡ್ ಸೆಟಪ್, ನಾಯಕಿಗಾಗಿ ಬಾಂಬೆ ಮಾದರಿಯಲ್ಲಿ ಒಂದು ಸ್ಟ್ರೀಟ್, ರಸಲ್ ಮಾರ್ಕೆಟ್ ಮಾದರಿಯಲ್ಲಿ ಮುಸ್ಲೀಮರ ಅಂಗಡಿಗಳು, ಹಳೇ ಮೈಸೂರು ಭಾಗದಲ್ಲಿರುವ ವಠಾರದ ಮನೆಗಳ ರೀತಿ ಒಂದು, ಟೆಂಪಲ್ ಸ್ಟ್ರೀಟ್, ಶೃಂಗೇರಿ ಬೀದಿ ತರಹದ್ದು ಒಂದು ಸ್ಟ್ರೀಟ್, ಜತೆಗೆ ಜಾನಿ.ಕಾಮ್ ಎಂಬ ಹೀರೋ ಅಡ್ಡಾ ಹೀಗೆ ಥರಾವರಿ ಸೆಟ್ಗಳನ್ನು ಹಾಕಿದ್ದೇವೆ. ಹಳೇ ಬೋರ್ವೇಲ್, ಶೆಟ್ಟರ ಅಂಗಡಿ ಹೀಗೆ ಎಲ್ಲವೂ ಹಳೆಯ ರೀತಿ ಸೆಟ್ ಹಾಕಿದ್ದೇವೆ' ಎನ್ನುತ್ತಾರೆ ಕಲಾ ನಿರ್ದೇಶಕ ಮೋಹನ್ ಬಿ.ಕೆರೆ.
ನಮ್ಮ ಕಥೆಗೆ ಈ ರೀತಿಯ ಒಂದು ಕಾಲೋನಿ ಬೇಕಿತ್ತು. ಹಾಗಾಗಿ ಇದನ್ನು ಸೃಷ್ಟಿ ಮಾಡಿದ್ದೇವೆ. ಹೊರಗಡೆ ರಸ್ತೆಯಲ್ಲಿ ಮತ್ತು ಹಳ್ಳಿಗಳಲ್ಲಿ ಇದನ್ನು ಚಿತ್ರೀಕರಣ ಮಾಡುವುದು ಸ್ವಲ್ಪ ಕಷ್ಟವಾಗುತ್ತಿತ್ತು. ಹಾಗಾಗಿ ಮೋಹನ್ ಅವರಿಗೆ ಹೇಳಿ ಈ ಸೆಟ್ ಹಾಕಲಾಗಿದೆ. ವಿಶೇಷ ಎಂದರೆ ಮೂರು ಸ್ಟ್ರೀಟ್ಗಳಲ್ಲಿ ರೂಪ್ ಹಾಕಿ ಮಳೆ ಬಂದರೂ ಸೋರದ ರೀತಿಯಲ್ಲಿ ಸೆಟ್ ಹಾಕಲಾಗಿದೆ' ಎನ್ನುವುದು ನಿರ್ದೇಶಕ ಪ್ರೀತಂ ಮಾತು.
---------
'ಈ ಸೆಟ್ನಲ್ಲಿ ಯಾವುದೇ ಕಣ್ಣಿಗೆ ಹೊಡೆಯುವಂತಹ ಕಲರ್ಗಳಿಲ್ಲ, ಎಲ್ಲವೂ ರಿಯಲಿಸ್ಟಿಕ್ ಆಗಿದೆ. ದೃಶ್ಯಗಳಲ್ಲಿ ಇದು ಬಹಳ ಸುಂದರವಾಗಿ ಕಾಣುತ್ತದೆ. ಸುಮಾರು ಒಂದೂವರೆ ಕೋಟಿ ವೆಚ್ಚದಲ್ಲಿ ಈ ಸೆಟ್ ಹಾಕಲಾಗಿದೆ.'
-ಮೋಹನ್ ಬಿ. ಕೆರೆ, ಕಲಾ ನಿರ್ದೇಶಕ
---------
'ದುನಿಯಾ ವಿಜಯ್ ನಾಯಕರಾಗಿ ನಟಿಸುತ್ತಿರುವ ಜಾನಿ ಜಾನಿ ಎಸ್ ಪಪ್ಪಾ ಸಿನಿಮಾಗಾಗಿ ಬೆಂಗಳೂರು ಹೊರ ವಲಯದ ಮೋಹನ್ ಬಿ.ಕೆರೆ ಸ್ಟುಡಿಯೋದಲ್ಲಿ ದೊಡ್ಡ ಕಾಲೋನಿಯೇ ಸೃಷ್ಟಿಯಾಗಿದೆ. ಈ ಕಾಲೋನಿಯ ವಿಶೇಷತೆ ಮತ್ತು ಅದನ್ನು ಹಾಕಲು ತೆಗೆದುಕೊಂಡ ಸಮಯ ಎಲ್ಲದರ ಬಗೆಗಿನ ಮಾಹಿತಿ ಇಲ್ಲಿದೆ.ಜಾನಿ ಜಾನಿ ಎಸ್ ಪಪ್ಪಾ ಸಿನಿಮಾದ ಕತೆ ಒಂದು ಕಾಲೋನಿಯಲ್ಲಿ ನಡೆಯುತ್ತದೆ. ಈ ಕಾಲೋನಿಯಲ್ಲಿ ಎಲ್ಲ ವರ್ಗದ ಜನ ಇರುತ್ತಾರೆ. ಎಲ್ಲರೂ ಜಾನಿಯನ್ನು ಇಷ್ಟಪಡುತ್ತಿರುತ್ತಾರೆ. ಹಾಗಾಗಿ ಇದನ್ನು ಸೆಟ್ ಹಾಕಿ ಚಿತ್ರೀಕರಣ ಮಾಡಿದ್ದೇವೆ. ನಾಯಕ ದುನಿಯಾ ವಿಜಯ್, ಸಿನಿಮಾಟೋಗ್ರಫರ್ ಕರಣಾಕರ್ , ಮೋಹನ್ , ನಾನು ಎಲ್ಲರೂ ಡಿಸ್ಕಸ್ ಮಾಡಿ ಈ ಸೆಟ್ ಹಾಕಲಾಗಿದೆ.'
-ಪ್ರೀತಂ ಗುಬ್ಬಿ, ನಿರ್ದೇಶಕ