ಮಗಳ ಮದುವೆಗೆ ಕ್ರೇಜಿಸ್ಟಾರ್ ರವಿಚಂದ್ರನ್ ಬೊಂಬಾಟ್ ಉಡುಗೊರೆ

ರವಿಚಂದ್ರನ್‌ ಪುತ್ರಿ ಗೀತಾಂಜಲಿ ಮದುವೆ ಮೇ 28 ಮತ್ತು 29ರಂದು ಬೆಂಗಳೂರಿನಲ್ಲಿ ನಡೆಯಲಿದೆ. ಮಮತೆಯ ಮಗಳ ಮದುವೆಗಾಗಿ ಕ್ರೇಜಿಸ್ಟಾರ್‌ ವಿಶೇಷ ಉಡುಗೊರೆಯೊಂದನ್ನು ರೆಡಿ ಮಾಡಿದ್ದಾರೆ. ಸ್ವತಃ ತಾವೇ ಭಾವನಾತ್ಮಕ ಸಾಲುಗಳಿಂದ ತುಂಬಿರುವ ಹಾಡೊಂದನ್ನು ತಯಾರಿಸಿದ್ದು, ಅದನ್ನೇ ಮದುವೆಗೆ ಗಿಫ್ಟ್‌ ಆಗಿ ನೀಡಲಿದ್ದಾರೆ. ರವಿಚಂದ್ರನ್‌ ಸಾಹಿತ್ಯ ಬರೆದಿರುವುದು ಮಾತ್ರವಲ್ಲ, ಸ್ವತಃ ಅವರೇ ಈ ಗೀತೆಯನ್ನು ಹಾಡಿದ್ದಾರೆ.

'ಓ ನನ್ನ ಮಗಳೆ, ಬೆಳದ ಮೇಲೆ ನೀನು ನಾನು ಮಗುವಾದೆ..' ಹೀಗೆ ಭಾವನಾತ್ಮಕ ಸಾಲುಗಳಿಂದ ತುಂಬಿರುವ ಗೀತೆ ಇದಾಗಿದ್ದು, ಖಾಸಗಿ ವಾಹಿನಿಯ ಶೋನಲ್ಲಿ ಪ್ರಸಾರ ಕೂಡ ಆಗಿದೆ.

ಕಳೆದ ತಿಂಗಳಷ್ಟೇ ಉದ್ಯಮಿ ಅಜಯ್‌ ಅವರ ಜತೆ ಗೀತಾಂಜಲಿ ಅವರ ನಿಶ್ಚಿತಾರ್ಥ ನೆರವೇರಿದೆ. ನಿಶ್ಚಿತಾರ್ಥ ಕಾರ್ಯಕ್ರಮಕ್ಕೆ ಕೇವಲ ಕುಟುಂಬಕ್ಕಷ್ಟೇ ಆಹ್ವಾನ ನೀಡಲಾಗಿತ್ತು. ಹಾಗಾಗಿ ಮದುವೆಯನ್ನು ಎರಡು ದಿನಗಳ ಕಾಲ ಅದ್ಧೂರಿಯಾಗಿ ಮಾಡಲು ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ದಕ್ಷಿಣ ಭಾರತದ ಬಹುತೇಕ ತಾರೆಯರು ಮತ್ತು ಬಾಲಿವುಡ್‌ನ ನಟ ನಟಿಯರು ಈ ಮದ್ವೆಯಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ.