ದಳಪತಿ ಅತ್ಯುತ್ತಮ ಲವ್‌ ಚಿತ್ರ ಎಂದ ಚಿತ್ರತಂಡ

*ಶರಣು ಹುಲ್ಲೂರು

Vijaya Karnataka Web

ಲವ್‌ಸ್ಟೋರಿ ಸಿನಿಮಾಗಳಿಗೆ ದಳಪತಿ ಚಿತ್ರ ಒಂದು ಬೆಸ್ಟ್‌ ಉದಾಹರಣೆ ಆಗಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದೆ ಚಿತ್ರತಂಡ. ಲವಲವಿಕೆ ಕಚೇರಿಗೆ ಆಗಮಿಸಿದ್ದ ಈ ಚಿತ್ರದ ನಾಯಕ ಲವ್ಲಿಸ್ಟಾರ್‌ ಪ್ರೇಮ್‌, ನಾಯಕಿ ಕೃತಿ ಕರಬಂಧ ಮತ್ತು ನಿರ್ದೇಶಕ ಪ್ರಶಾಂತ್‌ ರಾಜ್‌ ತಮ್ಮ ಚಿತ್ರದ ಹಲವು ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.

'ಎಕ್ಸ್‌ಕ್ಲೂಸಿವ್‌ ಪ್ರೇಮಕಥೆಯನ್ನು ಈ ಚಿತ್ರದಲ್ಲಿ ಹೇಳಲು ಹೊರಟಿದ್ದೇನೆ. ನನ್ನ ಮೊದಲ ಸಿನಿಮಾ ಲವ್‌ಗುರುನಿಂದ ಶುರುವಾದ ಸಿನಿ ಜರ್ನಿಯಲ್ಲಿ ನಾನು ಎಲ್ಲರ ಮೆಚ್ಚುವಂಥ ಕಥೆಗಳನ್ನೇ ಆಯ್ಕೆ ಮಾಡಿಕೊಂಡಿದ್ದೇನೆ. ದಳಪತಿಯಲ್ಲೂ ಅಂತಹ ವಿಭಿನ್ನ ಪ್ರೇಮ್‌ ಕಹಾನಿಯಿದೆ. ಅದನ್ನು ಕಲರ್‌ಫುಲ್‌ ಆಗಿ ಹೇಳುವ ಪ್ರಯತ್ನ ಮಾಡಿದ್ದೇನೆ' ಎಂದಿದ್ದಾರೆ ಪ್ರಶಾಂತ್‌ ರಾಜ್‌.

ಚಿತ್ರದ ಶೀರ್ಷಿಕೆಯೇ ಗಮನಸೆಳೆಯುವಂತಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ ಪ್ರೇಮ್‌. 'ನಿರ್ದೇಶಕರು ಚಿತ್ರದ ಕಥೆ ಹೇಳುತ್ತಿದ್ದಂತೆಯೇ ನಿರಾಕರಿಸಲು ಸಾಧ್ಯವಾಗಲೇ ಇಲ್ಲ. ಹಾಗೇ ಕಥೆಯನ್ನು ಬರೆದಿದ್ದಾರೆ. ಅಲ್ಲದೇ, ಪ್ರತಿ ಪಾತ್ರಕ್ಕೂ ಅವರು ಮಹತ್ವ ನೀಡಿದ್ದಾರೆ. ಡಬಲ್‌ ಶೇಡ್‌ ಇರುವಂಥ ಪಾತ್ರ ನನ್ನದು. ನಾಲ್ಕು ಆ್ಯಕ್ಷನ್‌ ದೃಶ್ಯಗಳಿವೆ. ಮೊದಲ ಬಾರಿಗೆ ಇಂಥ ಪಾತ್ರವನ್ನು ನಾನು ಮಾಡಿದ್ದೇನೆ' ಅನ್ನುವುದು ಪ್ರೇಮ್‌ ಮಾತು.

ಪಕ್ಕದ್ಮನೆ ಹುಡುಗಿ ಥರದ ಪಾತ್ರಗಳಲ್ಲಿ ನಟಿಸುತ್ತಾ ಏಕತಾನತೆ ಪಾತ್ರಗಳಿಂದ ಬೇಸತ್ತಿದ್ದ ನನಗೆ ದಳಪತಿಯಲ್ಲಿ ವಿಭಿನ್ನ ಗೆಟಪ್‌ ಕೊಡಲಾಗಿದೆಯಂತೆ. ಅಲ್ಲದೇ ಅದೊಂದು ರೌಡಿ ರೀತಿಯ ಪಾತ್ರ. ಜೋರಾಗಿ ಡೈಲಾಗ್‌ ಹೊಡೆಯುವುದು, ನಾಯಕನಿಗೆ ಕ್ವಾಟ್ಲೆ ಕೊಡೋದು ಹೀಗೆ ಪಾತ್ರ ವಿಭಿನ್ನತೆಯಿಂದ ಕೂಡಿದೆ' ಎನ್ನುವುದು ಕೃತಿ ಮಾತು.

ದಳಪತಿ ಸಿನಿಮಾದ ಹಾಡು ಮತ್ತು ಟೀಸರ್‌ ಈಗಾಗಲೇ ವೈರಲ್‌ ಆಗಿವೆ. ಕಲರ್‌ಫುಲ್‌ ಹಾಡು, ಹೊಸ ರೀತಿಯ ಮೇಕಿಂಗ್‌, ಈವರೆಗೂ ಯಾರೂ ನೋಡದೇ ಇರುವಂಥ ಲೋಕೇಶನ್‌, ಹೀಗೆ ಮನರಂಜನೆಗೆ ಬೇಕಿರುವಂತಹ ಎಲ್ಲ ಅಂಶಗಳೊಂದಿಗೆ ದಳಪತಿ ತಯಾರಾಗಿದೆ.

ಏ.13ಕ್ಕೆ ರಾಜ್ಯಾದ್ಯಂತ ರಿಲೀಸ್‌ ಆಗುತ್ತಿರುವ ಈ ಸಿನಿಮಾದಲ್ಲಿ ಇನ್ನೂ ಅನೇಕ ವಿಶೇಷಗಳಿದ್ದು, ಅವುಗಳನ್ನು ಥಿಯೇಟರ್‌ನಲ್ಲಿಯೇ ನೋಡಿ ಎನ್ನುವುದು ಚಿತ್ರತಂಡದ ಮಾತು.