ಸಂಭಾವನೆ ಹೆಚ್ಚು ಎಂದವರಿಗೆ ಖಡಕ್‌ ಉತ್ತರ ಕೊಟ್ಟ ರಶ್ಮಿಕಾ ಮಂದಣ್ಣ

* ಹರೀಶ್‌ ಬಸವರಾಜ್‌

Vijaya Karnataka Web

ಕನ್ನಡ ಸಿನಿಮಾ ಮೂಲಕ ತಮ್ಮ ಕರಿಯರ್‌ ಆರಂಭಿಸಿದ ರಶ್ಮಿಕಾ ಮಂದಣ್ಣ ಈಗ ತೆಲುಗಿನ ಬಹು ಬೇಡಿಕೆಯ ನಾಯಕ ನಟಿ. ತಮ್ಮ ಹೊಸ ಚಿತ್ರದ ಪ್ರಚಾರಕ್ಕಾಗಿ ಬೆಂಗಳೂರಿಗೆ ಬಂದಿದ್ದ ಅವರು ಸಾಕಷ್ಟು ವಿಷಯಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.

*ತುಂಬಾ ದಿನಗಳಾದ ಮೇಲೆ ಡಿಯರ್‌ ಕಾಮ್ರೆಡ್‌ ಮೂಲಕ ಕನ್ನಡ ಸಿನಿಮಾಗೆ ವಾಪಾಸ್ಸಾಗಿದ್ದೀರಿ..?

ಇಲ್ಲವಲ್ಲ. 'ಯಜಮಾನ' ಇತ್ತೀಚೆಗಷ್ಟೇ ಬಿಡುಗಡೆಯಾಯಿತು. ಅದಾದ ಮೇಲೆ 'ಪೊಗರು' ಮಾಡ್ತಾ ಇದ್ದೇನೆ. ಯಾಕೆ ಈ ರೀತಿಯ ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆ ಎಂಬುದೇ ಗೊತ್ತಾಗುತ್ತಿಲ್ಲ. ಸದ್ಯ 'ಪೊಗರು' ಒಪ್ಪಿಕೊಂಡು ಶೂಟಿಂಗ್‌ ಮಾಡುತ್ತಿದ್ದೇನೆ. ತೆಲುಗಿನಲ್ಲಿ ಮಹೇಶ್‌ ಬಾಬು ಸಿನಿಮಾ, ಈಗ 'ಡಿಯರ್‌ ಕಾಮ್ರೇಡ್‌' ಪ್ರಮೋಶನ್‌, 'ಭೀಷ್ಮ' ಚಿತ್ರ ಚಿತ್ರೀಕರಣ ಹೀಗೆ ಅಲ್ಲಿ , ಇಲ್ಲಿ ಓಡಾಡಿಕೊಂಡು ನಟಿಸುತ್ತಿದ್ದೇನೆ. ವಿಷಯ ಏನು ಅಂದರೆ 'ಡಿಯರ್‌ ಕಾಮ್ರೆಡ್‌' ಕೂಡ ನನ್ನ ಕನ್ನಡ ಸಿನಿಮಾವೇ. ಏಕೆಂದರೆ, ಇದರಲ್ಲಿ ನಾನೇ ಧ್ವನಿ ನೀಡಿದ್ದೇನೆ. ಹಾಡು-ಟ್ರೇಲರ್‌ ಎಲ್ಲವೂ ಕನ್ನಡದಲ್ಲಿ ಬಿಡುಗಡೆಯಾಗಿದೆ. ಆ ರೀತಿ ಬಿಡುಗಡೆ ಆಗುವುದಕ್ಕೂ ಮುನ್ನ ನಾನು ಕೇಳಿ, ಅದರಲ್ಲಿ ಏನಾದರೂ ಕರೆಕ್ಷನ್‌ ಇದ್ದರೆ ಹೇಳಿದ್ದೇನೆ. ಇದು ಯಜಮಾನ ನಂತರ ನನ್ನ ಕನ್ನಡ ಸಿನಿಮಾಗಿದೆ.

* ಕನ್ನಡದಲ್ಲಿ ರಶ್ಮಿಕಾ ಸಿನಿಮಾ ಮಾಡದೇ ಇರಲು ನಿಮ್ಮ ಸಂಭಾವನೆ ಜಾಸ್ತಿ ಆಗಿರುವುದೇ ಕಾರಣವಂತೆ, ನಿಮ್ಮ ಸಂಭಾವನೆ ಜಾಸ್ತಿ ಆಗಿದೆಯಾ?

ಸಿನಿಮಾದಿಂದ ಸಿನಿಮಾಗೆ ಸಂಭಾವನೆ ಜಾಸ್ತಿಯಾಗಲೇ ಬೇಕು ಅಲ್ವಾ. ಯಾರೇ ಆದರೂ ಒಂದು ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರೆ, ಅವರಿಗೆ ಪ್ರಮೋಷನ್‌ ಬೇಕೇಬೇಕು ಅಲ್ಲವೆ? ಸಂಬಳ ಜಾಸ್ತಿ ಆಗುತ್ತದೆ ಅಲ್ವ. ಹಾಗೆಯೇ ನನ್ನ ಸಂಭಾವನೆ ಕೂಡ ಕೆಲಸಕ್ಕೆ ತಕ್ಕಂತೆ ಜಾಸ್ತಿಯಾಗಿದೆ. ಕಷ್ಟಪಟ್ಟು ಕೆಲಸ ಮಾಡ್ತಾ ಇದ್ದೇನೆ. ಎಷ್ಟೋ ಸಲ ನಿದ್ರೆ ಇಲ್ಲದೆ ಕೆಲಸ ಮಾಡಿರುತ್ತೇನೆ. ಜಿಮ್‌ಗೆ ಹೋಗಿ ಬೆವರು ಹರಿಸುತ್ತೇನೆ. ನನ್ನ ಕಷ್ಟಕ್ಕೆ ತಕ್ಕ ಸಂಭಾವನೆ ಪಡೆಯುತ್ತಿದ್ದೇನೆ.

*ಹಾಗಾದರೆ ಕನ್ನಡದ ನಿರ್ಮಾಪಕರು ಬೇರೆ ಭಾಷೆಯ ನಿರ್ಮಾಪಕರಷ್ಟು ಪೇಮೆಂಟ್‌ ಕೊಡುತ್ತಿಲ್ಲವಾ?

ಹಾಗೆನಿಲ್ಲ. ಧ್ರುವ ಸರ್ಜಾ ನಟನೆಯ 'ಪೊಗರು' ಸಿನಿಮಾದಲ್ಲಿ ನಾನೇ ನಾಯಕಿ. ಅಲ್ಲಿ ನನ್ನ ಸಂಭಾವನೆ ಎಷ್ಟೋ ಅಷ್ಟನ್ನೇ ಕೊಡುತ್ತಿದ್ದಾರೆ.

*ಗೀತ ಗೋವಿಂದ ಸಿನಿಮಾದ ಹಿಟ್‌ ಜೋಡಿ ಎಂಬ ಕಾರಣಕ್ಕೆ ವಿಜಯ ದೇವರಕೊಂಡ ಮತ್ತು ನೀವು ಮತ್ತೆ ಒಟ್ಟಿಗೆ ನಟಿಸಿದ್ರಾ?

ನಾನು ಯಾವತ್ತೂ ನನ್ನ ಪರ್ಸನಲ್‌ ಲೈಫ್‌ ಮತ್ತು ಪ್ರೊಫೇಶನ್‌ ಎರಡನ್ನೂ ಮಿಕ್ಸ್‌ ಮಾಡುವುದಿಲ್ಲ. ವೈಯಕ್ತಿಕ ವಿಚಾರಗಳು ಏನೇ ಬಂದರೂ ಸ್ಕ್ರಿಪ್ಟ್‌ ಚೆನ್ನಾಗಿದ್ದರೆ ಮಾತ್ರ ಪಾತ್ರ ಒಪ್ಪಿಕೊಳ್ಳುತ್ತೇನೆ. ಒಂದು ವೇಳೆ ಆತ್ಮೀಯ ಸ್ನೇಹಿತರು ಸಿನಿಮಾ ಮಾಡ್ತಾ ಇದ್ದರೂ ನಾನು ಕಥೆ ಮತ್ತು ನನ್ನ ಪಾತ್ರಕ್ಕೆ ಮಾತ್ರ ಆದ್ಯತೆ ಕೊಡುತ್ತೇನೆ. ಈ ಸಿನಿಮಾ ಕೂಡ ಅದೇ ಕಾರಣಕ್ಕೆ ಒಪ್ಪಿಕೊಂಡಿದ್ದೇ ಹೊರತು ದೇವರಕೊಂಡ ನನ್ನ ಸ್ನೇಹಿತ, ನಮ್ಮದು ಹಿಟ್‌ ಜೋಡಿ ಎಂಬ ಕಾರಣಕ್ಕಲ್ಲ.

*ಈ ಸಿನಿಮಾದಲ್ಲಿ ನೀವು ಮೇಕಪ್‌ ಮಾಡಿಲ್ವಂತೆ?

ಹೌದು. ಈ ಸಿನಿಮಾದಲ್ಲಿ ನನಗೆ ಮೇಕಪ್‌ಮ್ಯಾನ್‌ ಇರಲೇ ಇಲ್ಲ. ಒಂಚೂರು ಮೇಕಪ್‌ ಇಲ್ಲದೆ ಕಾಣಿಸಿಕೊಂಡಿದ್ದೇನೆ. ಒಂದೆರೆಡು ಕಡೆ ಲಿಪ್‌ಸ್ಟಿಕ್‌ ಸ್ವಲ್ಪ ಹಾಕಿಕೊಂಡಿದ್ದು, ಅದನ್ನು ನಾನೇ ಹಾಕಿಕೊಂಡಿದ್ದು.

*ಟಾಲಿವುಡ್‌ನಲ್ಲಿ ಈಗ ಕನ್ನಡದ ಹುಡುಗಿಯರೇ ಹೆಚ್ಚಾಗಿದ್ದಾರೆ..

ಹೌದು. ಒಂದು ರೀತಿಯಲ್ಲಿ ಇದು ನನಗೆ ಹೆಮ್ಮೆಯ ವಿಷಯ. ಕನ್ನಡದ ಹುಡುಗಿಯರು ಪ್ರತಿಭಾವಂತರು ಎಂಬುದು ಮತ್ತೊಮ್ಮೆ ಪ್ರೂವ್‌ ಆಗಿದೆ. ತೆಲುಗು ಮಾತ್ರವಲ್ಲದೆ ತಮಿಳು, ಮಲೆಯಾಳಂನಲ್ಲಿಯೂ ನಮ್ಮವರಿದ್ದಾರೆ.

*ಪೊಗರು ನಂತರ ಯಾವುದಾದರೂ ಕಥೆ ಕೇಳಿದ್ದೀರಾ?

ಹೌದು. ನಾಲ್ಕೈದು ಸಿನಿಮಾಗಳ ಸ್ಕ್ರಿಪ್ಟ್‌ ಕೇಳಿದ್ದೇನೆ. ನನ್ನ ಕ್ಯಾರೆಕ್ಟರ್‌ ಡಿಸೈನ್‌ ಇನ್ನಷ್ಟು ಚೆನ್ನಾಗಿರುವ ಕಥೆಗಳನ್ನು ನಿರೀಕ್ಷೆ ಮಾಡುತ್ತಿದ್ದೇನೆ.

--

ನನ್ನ ಕೆಲಸಕ್ಕೆ ತಕ್ಕ ಸಂಭಾವನೆ ನನಗೆ ಎಲ್ಲ ಚಿತ್ರರಂಗಗಳಲ್ಲೂ ಸಿಗುತ್ತಿದೆ. ಕನ್ನಡದಲ್ಲಿಯೂ ಅಷ್ಟೇ. ಇಷ್ಟಕ್ಕೂ ನಾನು ಕನ್ನಡ ಚಿತ್ರಗಳಲ್ಲಿ ಬ್ಯಾಕ್‌ ಟೂ ಬ್ಯಾಕ್‌ ನಟಿಸುತ್ತಲೇ ಇದ್ದೇನೆ.

-ರಶ್ಮಿಕಾ ಮಂದಣ್ಣ, ನಟಿ