ಅನುಷ್ಕಾ ಶೆಟ್ಟಿ ನಟಿಸಿದ್ದ ಈ ಸೂಪರ್ ಹಿಟ್ ಚಿತ್ರದ ರಿಮೇಕ್‌ಗೆ ದೀಪಿಕಾ ಪಡುಕೋಣೆ ನಾಯಕಿ!

ಬೆಂಗಳೂರು ಬೆಡಗಿ ದೀಪಿಕಾ ಪಡುಕೋಣೆ ಮೊದಲು ಬಣ್ಣ ಹಚ್ಚಿದ್ದು ಕನ್ನಡದ 'ಐಶ್ವರ್ಯ' ಚಿತ್ರದಲ್ಲಿ. ಅದರಲ್ಲಿ ಅವರಿಗೆ 'ರಿಯಲ್ ಸ್ಟಾರ್‌' ಉಪೇಂದ್ರ ಹೀರೋ ಆಗಿದ್ದರು. ಸ್ಯಾಂಡಲ್‌ವುಡ್‌ನಲ್ಲಿ ಅವರು ನಟಿಸಿದ್ದು ಒಂದೇ ಒಂದು ಚಿತ್ರ. ಆನಂತರ ಅವರು ಬಾಲಿವುಡ್‌ನಲ್ಲಿ ಫೇಮಸ್‌ ಆದರು. ಸಾಲು ಸಾಲು ಹಿಟ್ ಸಿನಿಮಾಗಳಲ್ಲಿ ನಟಿಸಿದರು. ಇದೀಗ ಅವರು ದಕ್ಷಿಣ ಭಾರತದ ಹಿಟ್ ಸಿನಿಮಾವೊಂದರ ರಿಮೇಕ್‌ನಲ್ಲಿ ನಾಯಕಿಯಾಗುವ ಸಾಧ್ಯತೆ ಇದೆಯಂತೆ! ಅಷ್ಟಕ್ಕೂ ಆ ಸಿನಿಮಾ ಯಾವುದು? 'ಅರುಂಧತಿ'!

ಅನುಷ್ಕಾಗೆ ಬ್ರೇಕ್ ನೀಡಿದ ಸಿನಿಮಾವಿದು
ಕನ್ನಡತಿ ಅನುಷ್ಕಾ ಶೆಟ್ಟಿ ಪ್ರಧಾನ ಪಾತ್ರದಲ್ಲಿದ್ದ 'ಅರುಂಧತಿ' ಚಿತ್ರವು 2009ರಲ್ಲಿ ತೆರೆಕಂಡಿತ್ತು. ಕೋಡಿ ರಾಮಕೃಷ್ಣ ನಿರ್ದೇಶನ ಮಾಡಿದ್ದ ಈ ಹಾರರ್‌ ಸಿನಿಮಾವು ಆ ಕಾಲಕ್ಕೆ ಬಾಕ್ಸ್ ಆಫೀಸ್‌ ಧೂಳೀಪಟ ಮಾಡಿತ್ತು. ಮಹಿಳಾ ಪ್ರಧಾನ ಸಿನಿಮಾವೊಂದು ಆ ಪರಿ ಕಲೆಕ್ಷನ್ ಮಾಡಿದ್ದು ಟಾಲಿವುಡ್‌ನಲ್ಲಿ ಹೊಸ ದಾಖಲೆ ಆಗಿತ್ತು. ಅದುವರೆಗೂ ಬರೀ ಗ್ಲಾಮರಸ್‌ ಪಾತ್ರಗಳಿಂದ ಗುರುತಿಸಿಕೊಂಡಿದ್ದ ಅನುಷ್ಕಾಗೂ ಹೊಸ ಇಮೇಜ್ ನೀಡಿತ್ತು 'ಅರುಂಧತಿ' ಚಿತ್ರ.

ಬಾಲಿವುಡ್‌ಗೆ ರಿಮೇಕ್‌ ಆಗಲಿದೆ ಅರುಂಧತಿ
ನಟ ಅಲ್ಲು ಅರ್ಜುನ್ ತಂದೆ, ನಿರ್ಮಾಪಕ ಅಲ್ಲು ಅರವಿಂದ್‌ಗೆ 'ಅರುಂಧತಿ' ಸಿನಿಮಾವನ್ನು ಹಿಂದಿಗೆ ರಿಮೇಕ್ ಮಾಡಬೇಕೆಂಬ ಕನಸು. ಇದೀಗ ದೀಪಿಕಾ ಅವರನ್ನು ನಾಯಕಿಯನ್ನಾಗಿಸಿ ರಿಮೇಕ್ ಮಾಡಬೇಕೆಂದು ಅರವಿಂದ್ ನಿರ್ಧಾರ ಮಾಡಿದ್ದಾರೆ ಎನ್ನಲಾಗಿದೆ. 'ಅರುಂಧತಿ' ಚಿತ್ರದಲ್ಲಿ ಕಥಾನಾಯಕಿಗೆ ಎರಡು ಶೇಡ್ ಇದೆ. ದೀಪಿಕಾ ಆ ಎರಡು ಶೇಡ್‌ನಲ್ಲಿಯೂ ಅದ್ಭುತವಾಗಿ ನಟಿಸಲಿದ್ದಾರೆ ಎಂಬ ನಂಬಿಕೆ ಅಲ್ಲು ಅರವಿಂದ್‌ಗೆ ಇದೆಯಂತೆ. ಸದ್ಯ ಈ ಬಗ್ಗೆ ಈ ಯಾವುದೇ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲವಾದರೂ, ಹೀಗೊಂದು ಚರ್ಚೆ ಜಾರಿಯಲ್ಲಿದೆ.

ದಕ್ಷಿಣ ಭಾರತಕ್ಕೆ ಮರಳಿದ 'ಕನ್ನಡತಿ' ದೀಪಿಕಾ ಪಡುಕೋಣೆ! ಘೋಷಣೆ ಆಯ್ತು ಹೊಸ ಸಿನಿಮಾ

ತೆಲುಗಿಗೆ ಕಾಲಿಟ್ಟಿರುವ ದೀಪಿಕಾ
ಇನ್ನು, ಪ್ರಭಾಸ್ ನಟನೆಯ ಮುಂದಿನ ಸಿನಿಮಾಕ್ಕೆ ನಾಯಕಿಯಾಗುವ ಮೂಲಕ ದೀಪಿಕಾ ಟಾಲಿವುಡ್‌ಗೆ ಕಾಲಿಟ್ಟಿದ್ದಾರೆ. ಈ ಚಿತ್ರಕ್ಕಾಗಿ ಅವರು ದಾಖಲೆಯ ಸಂಭಾವನೆಯನ್ನು ಪಡೆದಿದ್ದಾರಂತೆ. ಇದೀಗ 'ಅರುಂಧತಿ' ರಿಮೇಕ್ ಕುರಿತ ಚರ್ಚೆ ಶುರುವಾಗಿದೆ. ಅದಕ್ಕೆ ಅವರು ಎಷ್ಟು ಪ್ರಮಾಣದ ಸಂಭಾವನೆ ಪಡೆಯಲಿದ್ದಾರೆ ಎಂಬುದು ಸದ್ಯದ ಕುತೂಹಲ. ಇನ್ನು, ಈ ರಿಮೇಕ್‌ಗೆ ನಿರ್ದೇಶಕರು ಯಾರು ಅನ್ನೋದು ಖಚಿತಗೊಂಡಿಲ್ಲ. ಬಾಲಿವುಡ್‌ನ ದೊಡ್ಡ ಪ್ರೊಡಕ್ಷನ್ ಹೌಸ್‌ನೊಂದಿಗೆ ಜಂಟಿಯಾಗಿ ಸಿನಿಮಾವನ್ನು ನಿರ್ಮಾಣ ಮಾಡಬೇಕು ಎಂಬುದು ಅಲ್ಲು ಅರವಿಂದ್ ಲೆಕ್ಕಾಚಾರ.

ನಟಿ ದೀಪಿಕಾ ಪಡುಕೋಣೆ, ರಿಯಲ್ ಸ್ಟಾರ್ ಉಪೇಂದ್ರ ನಟನೆಯ 'ಐಶ್ವರ್ಯಾ' ಸಿನಿಮಾ ಫೋಟೋ ವೈರಲ್!