DeepVeer Wedding: ಇಟಲಿಯಲ್ಲಿ ನಡೆಯುತ್ತಿರುವ ವೈಭವಯುತ ವಿವಾಹಕ್ಕೆ ವಿಮೆ ಮಾಡಿಸಿದ ದೀಪಿಕಾ- ರಣವೀರ್

ಬಾಲಿವುಡ್‌ನ ಸ್ಟಾರ್‌ ನಟರಾದ ಕನ್ನಡತಿ ದೀಪಿಕಾ ಮತ್ತು ರಣವೀರ್‌ ಮದುವೆಯ ಕ್ಷಣಕ್ಕಾಗಿ ಅವರ ಅಭಿಮಾನಿಗಳು ತದೇಕ ಚಿತ್ತದಿಂದ ಕಾಯುತ್ತಿದ್ದಾರೆ. ಆ ಜೋಡಿ ಹಾರ ಬದಲಾಯಿಸಿಕೊಳ್ಳುತ್ತಿರುವ ಇಟಲಿಯಲ್ಲಿರುವ ಲೇಕ್‌ ಕೊಮೊ ಭಾರತ ಮಾತ್ರವಲ್ಲದೆ, ಇಡೀ ಜಗತ್ತಿನ ಗಮನ ಸೆಳೆದಿದೆ. ಉತ್ತರ ಇಟಲಿಯ ನಯನ ಮಹೋಹರ ಪ್ರದೇಶದಲ್ಲಿರುವ ವಿಲ್ಲಾ ಡೆಲ್‌ ಬಲ್ಬಿಯಾನೆಲ್ಲೊದಲ್ಲಿ ಈ ಜೋಡಿ ಮದುವೆಯಾಗಲಿದೆ.

ಪ್ರಸ್ತುತ ಜೋಡಿಗಳಿಬ್ಬರು ಲೇಕ್ ಕೊಮೊದಲ್ಲಿದ್ದು ಕಳೆದೆರಡು ದಿನಗಳಿಂದ ವಿವಾಹಕ್ಕೆ ಸಂಬಂಧಿಸಿದ ಉತ್ಸವಗಳು ಭರ್ಜರಿಯಾಗಿ ನಡೆಯುತ್ತಿವೆ. ಸಂಗೀತ, ಮೆಹಂದಿ ಕಾರ್ಯಕ್ರಮಗಳೆಲ್ಲ ವೈಭವದಿಂದ ಸಂಪನ್ನವಾಗಿದ್ದು ಬುಧವಾರ ಕೊಂಕಣಿ ಸಂಪ್ರದಾಯದಂತೆ ಮತ್ತು ಗುರುವಾರ ಸಿಂಧಿ ಸಂಪ್ರದಾಯದಂತೆ ವಿವಾಹ ನೆರವೇರಲಿದೆ.

ಈ ವೈಭವಯುತ ವಿವಾಹ ಹಿಂದಿನ ಕಾಲದ ಕಥೆಗಳಲ್ಲಿ ಕಂಡು ಬರುವ ರಾಜ-ರಾಣಿಯರ ಮದುವೆಗೆನೂ ಕಮ್ಮಿ ಇಲ್ಲ. ಆದರೆ ವಿಶೇಷವೆಂದರೆ ದೀಪಿಕಾ ಮತ್ತು ರಣವೀರ್ ತಮ್ಮ ವಿವಾಹದ ವಿಮೆ ಮಾಡಿಸಿದ್ದಾರಂತೆ!

ಹೌದು, ವರದಿಗಳ ಪ್ರಕಾರ, ದೀಪ್‌ವೀರ್ ತಮ್ಮ ಬಿಗ್ ಡೇಯನ್ನು ವಿಮೆ ಮಾಡಿಸಿದ್ದಾರಂತೆ. ನವೆಂಬರ್ 12, 2018 ರಿಂದ ನವೆಂಬರ್ 16ರವರೆಗೆ ನಾಲ್ಕು ದಿನಗಳು ವಿಮೆಗೆ ಒಳಪಟ್ಟಿವೆ. ಓರಿಯಂಟಲ್ ವಿಮೆ ಅಡಿಯಲ್ಲಿ ವಿಮೆಯನ್ನು ಮಾಡಲಾಗಿದೆ ಎಂದು ತಿಳಿದುಬಂದಿದೆ. ಕಂಪನಿಯನ್ನು ಸಂಪರ್ಕಿಸಿದಾಗ, ಅವರು ವಿಮೆ ಮಾಡಿರುವುದನ್ನು ಖಚಿತ ಪಡಿಸಿದರು. ಆದರೆ ಎಷ್ಟು ಮೊತ್ತದ ವಿಮೆ ಮಾಡಿಸಲಾಗಿದೆ ಎಂಬುದನ್ನು ಬಹಿರಂಗ ಪಡಿಸಲು ಒಪ್ಪಿಲ್ಲ.

ಯೂರೋಪ್‌ನಲ್ಲಿರುವ ಲೇಕ್‌ ಕೊಮೊ ಪ್ರಕೃತಿಯಲ್ಲಿ ಸೌಂದರ್ಯವೆಲ್ಲಾ ಒಂದೇ ಕಡೆ ಮಡುಗಟ್ಟಿದಂತೆ ಸುಂದರವಾಗಿದೆ. ಈಗಾಗಲೇ ಹಾಲಿವುಡ್‌ನ ಖ್ಯಾತ ಸಿಲೆಬ್ರಿಟಿಗಳ ಮದುವೆಯೂ ಇಲ್ಲಿ ನಡೆದಿದೆ. ಡೇವಿಡ್‌ ಬೋವೆ, ಜಾರ್ಜ್‌ ಕ್ಲೂನಿ ಮತ್ತು ಕಿಮ್‌ ಕರ್ದಾಶಿಯನ್‌ ಮುಂತಾದವರು ಕೂಡಾ ಇದೇ ತಾಣದಲ್ಲಿ ಮದುವೆಯಾಗಿದ್ದಾರೆ.

ನೀಲ ಸರೋವರ ಮತ್ತು ಹಸಿರು ಪರ್ವತಗಳ ಮಧ್ಯದಲ್ಲಿರುವ ರೋಮನ್‌ ಶೈಲಿಯ ಪ್ರಾಚೀನ ವಿಲ್ಲಾ ಡೆಲ್‌ ಬಲ್ಬಿಯಾನೆಲ್ಲೊ ತನ್ನ ಅದ್ಭುತ ಇಟಾಲಿಯನ್‌ ವಾಸ್ತುಶಿಲ್ಪದಿಂದಲೂ ಗಮನ ಸೆಳೆಯುತ್ತದೆ. ಸುಮಾರು ಏಳು ಶತಮಾನಗಳಷ್ಟು ಪ್ರಾಚೀನವಾಗಿರುವ ಈ ವಿಲ್ಲಾದಲ್ಲೇ ಲೇಕ್‌ ಕೊಮೊವಿನ ಅದ್ಭುತ ಸೌಂದರ್ಯ ಹೊರಹೊಮ್ಮುತ್ತದೆ.

ಸ್ಟಾರ್‌ ಮದುವೆಯ ಹಿನ್ನೆಲೆಯಲ್ಲಿ ಈಗಾಗಲೇ ಈ ವಿಲ್ಲಾಗೆ ಸಾರ್ವಜನಿಕರ ಪ್ರವೇಶವನ್ನು ನಿರಾಕರಿಸಲಾಗಿದೆ. ವಿಲ್ಲಾ ಸುತ್ತ ಬಿಗಿ ಭದ್ರತೆ ಹಾಕಲಾಗಿದ್ದು, ಕೇವಲ ಒಂದೇ ದ್ವಾರದಲ್ಲಿ ಅತಿಥಿಗಳಿಗೆ ಪ್ರವೇಶ ಕಲ್ಪಿಸಲಾಗಿದೆ. ವಿಲ್ಲಾ ಒಳಗಡೆ ವಿಶಾಲವಾದ ಲ್ಯಾಂಡ್‌ಸ್ಕೇಪ್‌ ಗಾರ್ಡನ್‌, ರೋಮನ್‌ ಶೈಲಿಯ ಪ್ರತಿಮೆಗಳು ಮತ್ತು ಕಲಾಕೃತಿಗಳು ಗಮನ ಸೆಳೆಯುತ್ತವೆ.