ಆನ್‌ಲೈನ್‌ನಲ್ಲಿ ಶ್ರೀದೇವಿ ಸೀರೆಗೆ ಡಿಮಾಂಡ್‌

ಬಾಲಿವುಡ್‌ ದಂತಕತೆ ಶ್ರೀದೇವಿ ನೆನಪಿನಲ್ಲಿ ಅವರ ನೆಚ್ಚಿನ ಕೋಟಾ ಸೀರೆಯನ್ನು ಆನ್‌ಲೈನ್‌ನಲ್ಲಿ ಮಾರಾಟಕ್ಕಿಡಲಾಗಿದ್ದು, ಅಭಿಮಾನಿಗಳಿಂದ ಬೇಡಿಕೆಯೂ ಹೆಚ್ಚಾಗಿದೆ.

ಪದ್ಮಾ ಶಿವಮೊಗ್ಗ

ಬಾಲಿವುಡ್‌ನ ಖ್ಯಾತ ನಟಿ, ಸೌಂದರ್ಯದ ರಾಣಿ ಶ್ರೀದೇವಿ ಅಗಲಿ ಫೆ.24ಕ್ಕೆ ಒಂದು ವರ್ಷ. ಅವರ ನೆನಪಿನಲ್ಲಿ ಶ್ರೀದೇವಿ ಪತಿ, ನಿರ್ಮಾಪಕ ಬೋನಿ ಕಪೋರ್‌, ಪತ್ನಿಯ ಕೋಟಾ ಕಾಟನ್‌ ಸೀರೆಯನ್ನು ಆನ್‌ಲೈನ್‌ನಲ್ಲಿ ಹರಾಜು ಹಾಕಿದ್ದಾರೆ. ಈ ಹರಾಜಿನಿಂದ ಬಂದ ಹಣವನ್ನು ಅವರು ಕನ್ಸರ್ನ್‌ ಫೌಂಡೇಷನ್‌ಗೆ ನೀಡಲು ನಿರ್ಧರಿಸಿದ್ದಾರೆ. ಆ ಸೀರೆಯು ಶ್ರೀದೇವಿ ಅವರ ಮೆಚ್ಚಿನದ್ದಾಗಿದ್ದರಿಂದ ಹರಾಜಿನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಅಭಿಮಾನಿಗಳು ಭಾಗವಹಿಸಿದ್ದಾರೆ.

ಶ್ರೀದೇವಿ ಸದಾ ತಮ್ಮ ಉಡುಪಿನ ಬಗ್ಗೆ ಅತೀವ ಕಾಳಜಿ ವಹಿಸುತ್ತಿದ್ದರು. ಕೋಟಾ ಕಾಟನ್‌ ಸೀರೆಗಳೆಂದರೆ ಅವರಿಗೆ ಅಚ್ಚುಮೆಚ್ಚು. ಹಾಗಾಗಿ ಸೀರೆಗಳಿಗೆ ಹೆಸರಾದ ವೆಬ್‌ಸೈಟ್‌ ಒಂದರ ಮೂಲಕ ಹರಾಜು ಹಾಕಲಾಗಿದೆ. ಕಲರ್‌ಫುಲ್‌ ಆಗಿರುವ ಈ ಸೀರೆಗೆ 40 ಸಾವಿರದಿಂದ ಪ್ರಾರಂಭವಾದ ಹರಾಜು ಪ್ರಕ್ರಿಯೆ ಒಂದೂವರೆ ಲಕ್ಷದವರೆಗೂ ಏರಿಕೆಯಾಗಿದೆ. ನೀಲಿ ಬಣ್ಣದ ಈ ಸೀರೆಯು ಕೈಮಗ್ಗದಿಂದ ತಯಾರಿಸಲಾಗಿದೆ. ಶ್ರೀದೇವಿಗೆ ಬಹಳ ಪ್ರಿಯ. ಹೆಚ್ಚಾಗಿ ಅವರು ಇಂತಹ ಸೀರೆಯನ್ನೇ ಉಡುತ್ತಿದ್ದರು.

ತಮ್ಮ ಸೀರೆಗಳ ಬಗ್ಗೆ ಸಂದರ್ಶನವೊಂದರಲ್ಲಿ ಶ್ರೀದೇವಿ ಹೀಗೆ ಹೇಳಿದ್ದರು, 'ಸೀರೆಯಲ್ಲಿ ನಾನು ಬಹಳ ಕಂಫರ್ಟಬಲ್‌ ಆಗಿರುತ್ತೇನೆ. ದಕ್ಷಿಣ ಭಾರತದವರು ಹೆಚ್ಚಾಗಿ ಸೀರೆ ಉಡುತ್ತಾರೆ. ರೇಷ್ಮೆಯಾಗಿರಬಹುದು, ಕಾಟನ್‌ನದ್ದೇ ಇರಬಹುದು, ಸೀರೆ ಉಡುವುದು ನನಗೆ ಬಹಳ ಸುಲಭ' ಎಂದಿದ್ದರು. ಮಹಾರಾಣಿ ಗಾಯತ್ರಿದೇವಿ ಇವರ ಐಕಾನ್‌ ಆಗಿದ್ದರು.