ಕನ್ನಡ ಸಿನಿಮಾ ಕಂಟೆಂಟ್‌ಗೆ ನೆಟ್‌ಫ್ಲಿಕ್ಸ್‌ ಮತ್ತು ಪ್ರೈಮ್‌ ವಿಡಿಯೋದಲ್ಲಿ ಡಿಮಾಂಡ್‌

ಕನ್ನಡ ಸಿನಿಮಾಗಳ ಕಂಟೆಂಟ್‌ ಬಗ್ಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚರ್ಚೆ ಆಗುತ್ತಿದೆ. ಹಾಗಾಗಿಯೇ ನೆಟ್‌ಫ್ಲಿಕ್ಸ್‌ ಮತ್ತು ಪ್ರೈಮ್‌ ವಿಡಿಯೋ ಸಂಸ್ಥೆಗಳು ಕನ್ನಡ ಸಿನಿಮಾಗಳನ್ನು ಹೆಚ್ಚೆಚ್ಚು ಖರೀದಿಸಲು ಮುಂದಾಗಿವೆ. ಇದರಿಂದಾಗಿ ಕನ್ನಡ ಚಿತ್ರಗಳಿಗೆ ಡಿಮಾಂಡ್‌ ಕ್ರಿಯೇಟ್‌ ಆಗಿದೆ.

ಈಗಾಗಲೇ ಹಲವು ಚಿತ್ರಗಳನ್ನು ಆಯಾ ಸಂಸ್ಥೆಗಳು ಖರೀದಿಸಿವೆ. ಕಥೆಯೊಂದು ಶುರುವಾಗಿದೆ, ಹಂಬಲ್‌ ಪೊಲಿಟಿಶಿಯನ್‌ ನೊಗರಾಜ್‌ ಸೇರಿದಂತೆ ಕೆಲ ಕನ್ನಡ ಚಿತ್ರಗಳು ಈಗಾಗಲೇ ಲಭ್ಯ ಇವೆ. ನೀನಾಸಂ ಸತೀಶ್‌ ನಟನೆಯ ಚಂಬಲ್‌ ಚಿತ್ರಕ್ಕೂ ಸಖತ್‌ ಆಫರ್‌ ಸಿಕ್ಕಿದೆ.

ಈ ಸಿನಿಮಾಗೆ ನೆಟ್‌ಫ್ಲಿಕ್ಸ್‌ ಬರೋಬ್ಬರಿ ಹತ್ತು ಕೋಟಿ ರೂಪಾಯಿಗೆ ಖರೀದಿಸುವ ಆಫರ್‌ ನೀಡಿದೆ. ದೊಡ್ಡ ಮೊತ್ತದ ಆಫರ್‌ ಇದಾಗಿದ್ದರೂ, ಸಿನಿಮಾ ತಂಡ ಮಾತ್ರ ಅದನ್ನು ನಿರಾಕರಿಸಿದೆ. ಕಾರಣ ಆ ಸಂಸ್ಥೆ ನೀಡಿದ ಷರತ್ತು. 'ಹೌದು, ಹತ್ತು ಕೋಟಿ ರೂಪಾಯಿ ದೊಡ್ಡ ಮೊತ್ತವೇ. ಆದರೆ, ಈ ಸಿನಿಮಾವನ್ನು ಯಾವುದೇ ಚಿತ್ರಮಂದಿರದಲ್ಲಿ ರಿಲೀಸ್‌ ಮಾಡಬಾರದು ಎಂಬ ಷರತ್ತು ಸಂಸ್ಥೆ ವಿಧಿಸಿದೆ. ಅದನ್ನು ನಾವು ಒಪ್ಪಿಕೊಳ್ಳಲು ತಯಾರಿಲ್ಲ. ಸಿನಿಮಾ ಮಾಡುವುದೇ ಹೆಚ್ಚೆಚ್ಚು ಪ್ರೇಕ್ಷಕರಿಗೆ ತಲುಪಬೇಕು ಎಂಬ ಉದ್ದೇಶದಿಂದ. ಅದೇ ಆಗದಿದ್ದರೆ ಸಿನಿಮಾ ಮಾಡುವುದು ವ್ಯರ್ಥ. ಥಿಯೇಟರ್‌ನಲ್ಲಿ ರಿಲೀಸ್‌ ಮಾಡಲು ಅವರು ಅನುಮತಿ ಕೊಟ್ಟರೆ, ಕಂಡಿತಾ ನೆಟ್‌ಫ್ಲಿಕ್ಸ್‌ಗೆ ಸಿನಿಮಾ ಕೊಡುತ್ತೇವೆ' ಅಂತಾರೆ ಚಂಬಲ್‌ ಸಿನಿಮಾದ ನಾಯಕ ಸತೀಶ್‌ ನೀನಾಸಂ.

'ದೊಡ್ಡ ಪರದೆಯ ಮೇಲೆ ಸಿನಿಮಾ ನೋಡುವುದೇ ಖುಷಿ. ಅಭಿಮಾನಿಗಳು ಕೂಡ ಅದನ್ನೇ ಬಯಸುತ್ತಾರೆ. ಹಾಗಂತ ನೆಟ್‌ಫ್ಲಿಕ್ಸ್‌ ಸಂಸ್ಥೆಯ ಜತೆ ಇನ್ನೂ ಮಾತುಕತೆ ನಡೆಸಿದ್ದೇವೆ. ಥಿಯೇಟರ್‌ಗೆ ರಿಲೀಸ್‌ ಮಾಡಲು ಅನುಮತಿ ಕೊಟ್ಟರೆ, ಈಗಲೂ ಅವರಿಗೆ ಸಿನಿಮಾ ಕೊಡಲು ಸಿದ್ಧರಿದ್ದೇವೆ' ಎನ್ನುವುದು ಸತೀಶ್‌ ಮಾತು.