ಬೆಂಗಳೂರಿನಲ್ಲೇ ದಿಗಂತ್, ಐಂದ್ರಿತಾ ರೇ ಮದುವೆ?

*ಶರಣು ಹುಲ್ಲೂರು

Vijaya Karnataka Web

ದೂದ್‌ ಪೇಡಾ ದಿಗಂತ್‌ ಮತ್ತು ಐಂದ್ರಿತಾ ರೇ ಮದುವೆಯ ವಿಚಾರ ಎರಡು ವರ್ಷಗಳಿಂದ ಸ್ಯಾಂಡಲ್‌ವುಡ್‌ನಲ್ಲಿ ಹರಿದಾಡುತ್ತಿತ್ತು. ತಾವಿಬ್ಬರೂ ಪ್ರೀತಿಸುತ್ತಿರುವ ವಿಷಯವನ್ನು ಅವರು ಬಹಿರಂಗ ಪಡಿಸದೇ ಇದ್ದರೂ, ಈ ಪ್ರಣಯ ಪಕ್ಷಿಗಳ ವಿಚಾರ ಬಹುತೇಕರಿಗೆ ಗೊತ್ತಿತ್ತು. ಈ ಪ್ರೇಮ ಈಗ ಮದುವೆಗೆ ಬಂದು ನಿಂತಿದೆ. ಐಂದ್ರಿತಾ ಮತ್ತು ದಿಗಂತ್‌ ಇದೇ ವರ್ಷ ಡಿಸೆಂಬರ್‌ನಲ್ಲಿ ಹಸೆಮಣೆ ಏರಲಿದ್ದಾರೆ. ಸಪ್ತಪದಿ ತುಳಿಯಲು ಸದ್ದಿಲ್ಲದೇ ಸಿದ್ಧತೆ ಕೂಡ ಮಾಡಿಕೊಳ್ಳುತ್ತಿದ್ದಾರೆ.

'ಡಿಸೆಂಬರ್‌ನಲ್ಲಿ ಮದುವೆಯ ಆಗುತ್ತಿದ್ದೇವೆ. ದಿನಾಂಕ ಇನ್ನೂ ನಿಗದಿಯಾಗಿಲ್ಲ. ಬಹುತೇಕ ಬೆಂಗಳೂರಿನಲ್ಲೇ ಮದುವೆ ನಡೆಯಲಿದೆ. ಕುಟುಂಬದ ಸದಸ್ಯರ ಜತೆ ಚರ್ಚಿಸಿ ದಿನಾಂಕವನ್ನು ಅಂತಿಮಗೊಳಿಸುತ್ತೇವೆ. ' ಎಂದು ಹೇಳುವ ಮೂಲಕ ತಮ್ಮ ಮದುವೆ ವಿಚಾರವನ್ನು ಅಧಿಕೃತಗೊಳಿಸಿದ್ದಾರೆ ದಿಗಂತ್‌.

ಹಲವು ವರ್ಷಗಳಿಂದ ಪ್ರೇಮಗೀತೆಯನ್ನು ಹಾಡಿಕೊಂಡಿದ್ದ ಜೋಡಿಯು, ಒಟ್ಟೊಟ್ಟಿಗೆ ಕೆಲ ಚಿತ್ರಗಳಲ್ಲಿ ನಟಿಸಿದ್ದಾರೆ. ನಾನಾ ಕಾರ‍್ಯಕ್ರಮಗಳಿಗೆ ಜತೆಯಾಗಿ ಹೋಗಿದ್ದಾರೆ. ಅಲ್ಲದೇ, ತಮ್ಮ ಪ್ರೇಮಕ್ಕೆ ಸಾಕ್ಷಿ ಎನ್ನುವಂತೆ ಹಲವು ನೆನಪುಗಳನ್ನೂ ಸಂದರ್ಶನಗಳಲ್ಲಿ ಹಂಚಿಕೊಂಡಿದ್ದಾರೆ. ಒಬ್ಬರಿಗೊಬ್ಬರು ಸಾಥ್‌ ಕೊಟ್ಟುಕೊಂಡು ನಟಿಸಿದ್ದಾರೆ. ಈಗ ಸಪ್ತಪದಿ ತುಳಿಯುವ ಮೂಲಕ ಪ್ರೇಮಕ್ಕೊಂದು ಸಿಹಿಮುದ್ರೆ ಒತ್ತಿದ್ದಾರೆ.'