ಹೊಸಬರ 'ಲಂಡನ್‌ನಲ್ಲಿ ಲಂಬೋದರ'ಕ್ಕೆ ರಿಷಬ್ ಶೆಟ್ಟಿ ಸಾಥ್

ಕನ್ನಡದ ನಿರ್ದೇಶಕ, ನಟ ರಿಷಬ್ ಶೆಟ್ಟಿ ಅವರು ಹೊಸ ಚಿತ್ರತಂಡದ 'ಲಂಡನ್‌ನಲ್ಲಿ ಲಂಬೋದರ' ಸಿನಿಮಾದ ಟೀಸರ್‌ ನೋಡಿ ಮೆಚ್ಚಿಕೊಂಡು, ಟ್ರೇಲರ್‌ ಮತ್ತು ಆಡಿಯೋವನ್ನು ಬಿಡುಗಡೆ ಮಾಡಲು ಒಪ್ಪಿಕೊಂಡಿದ್ದಾರೆ. ಹೊಸಬರ ಚಿತ್ರವಾಗಿದ್ದರೂ ಸೆಟ್ ಏರಿದ ದಿನದಿಂದಲೂ 'ಲಂಡನ್‌ನಲ್ಲಿ ಲಂಬೋದರ' ಚಿತ್ರವು ಸಖತ್ ಸೌಂಡ್ ಮಾಡತೊಡಗಿತ್ತು. ಇದೀಗ, ಚಿತ್ರದ ಟೀಸರ್ ಬಿಡುಗಡೆಯಾಗಿದ್ದು ಸೌಂಡ್ ಮಾಡತೊಡಗಿದೆ.

ಹೊಸಬರ 'ಲಂಡನ್‌ನಲ್ಲಿ ಲಂಬೋದರ' ಸಿನಿಮಾದ ಟೀಸರ್‌ ನೋಡಿ ಮೆಚ್ಚಿಕೊಂಡ 'ಬೆಲ್ ಬಾಟಂ' ಖ್ಯಾತಿಯ ರಿಷಬ್ ಶೆಟ್ಟಿ ಅವರು ಈ ಚಿತ್ರದ ಟ್ರೇಲರ್‌ ಮತ್ತು ಆಡಿಯೋವನ್ನು ಬಿಡುಗಡೆ ಮಾಡಲು ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ. ಬಿಗ್‌ಬಾಸ್‌ ಖ್ಯಾತಿಯ ಶ್ರುತಿ ಪ್ರಕಾಶ್‌ ಮತ್ತು ನವ ನಟ ಸಂತೋಷ್‌ ನಟನೆಯ 'ಲಂಡನ್‌ನಲ್ಲಿ ಲಂಬೋದರ' ಸಿನಿಮಾ ಇದೇ ಮಾರ್ಚ್‌ 29ಕ್ಕೆ ಬಿಡುಗಡೆಯಾಗಲಿದೆ. ಈ ಸಿನಿಮಾದ ಟೀಸರ್‌ಅನ್ನು ಈಗಾಗಲೇ 5 ಲಕ್ಷಕ್ಕೂ ಹೆಚ್ಚು ಮಂದಿಯಿಂದ ವೀಕ್ಷಿಸಿದ್ದಾರೆ.

'ಲಂಡನ್‌ನಲ್ಲಿ ಲಂಬೋದರ' ಚಿತ್ರದ ಟೀಸರನ್ನು ನೋಡಿದ ರಿಷಭ್‌ಶೆಟ್ಟಿ ಅವರು ಹೊಸ ಹುಡುಗರ ಪ್ರಯತ್ನವನ್ನು ಬೆನ್ನು ತಟ್ಟುವ ಸಲುವಾಗಿ ಟ್ರೇಲರ್‌ ಮತ್ತು ಆಡಿಯೋವನ್ನು ಬಿಡುಗಡೆ ಮಾಡಿಕೊಡುವುದಾಗಿ ಹೇಳಿದ್ದಾರೆ. ಈ ಬಗ್ಗೆ ಮಾತನಾಡಿ ಖುಷಿ ಹಂಚಿಕೊಂಡಿರುವ 'ಲಂಡನ್‌ನಲ್ಲಿ ಲಂಬೋದರ' ಚಿತ್ರದ ನಿರ್ದೇಶಕರಾದ ರಾಜ್‌ ಸೂರ್ಯ 'ನನ್ನಂತಹ ಹೊಸಬನನ್ನು ಪ್ರೋತ್ಸಾಹಿಸಲು ರಿಷಭ್‌ ಶೆಟ್ಟಿಯವರು ಬರುತ್ತಿರುವುದು ನನಗೆ ತುಂಬಾ ಸಂತೋಷದ ವಿಷಯ. ಈ ಸಿನಿಮಾದ ಕಂಟೆಂಟ್‌ ಅವರಿಗೆ ಇಷ್ಟವಾಗಿದೆ. ಟೀಸರ್‌ ನೋಡಿ ಅವರು ಖುಷಿ ಪಟ್ಟು ಆಡಿಯೋ ಮತ್ತು ಟ್ರೇಲರನ್ನು ಬಿಡುಗಡೆ ಮಾಡಲು ಒಪ್ಪಿಕೊಂಡಿದ್ದಾರೆ" ಎಂದಿದ್ದಾರೆ .

ಅಂದಹಾಗೆ, ಹೊಸಬರ ತಂಡ ಮಾಡಿರುವ ಈ ಚಿತ್ರವು 'ಲಂಡನ್‌ಗೆ ಹೋಗಿ ಜೀವನ ಮಾಡಬೇಕು ಎಂಬ ಕನಸಿನ ಹುಡುಗನ ಕಥೆಯನ್ನು ಹೊಂದಿದೆಯಂತೆ'. ಈ ಚಿತ್ರದಲ್ಲಿ ನವ ನಟ ಸಂತೋಷ್‌ ಹಾಗೂ ಬಿಗ್‌ಬಾಸ್‌ ಖ್ಯಾತಿಯ ಶ್ರುತಿ ಪ್ರಕಾಶ್‌ ಜೋಡಿಯಾಗಿದ್ದಾರೆ. ಅಷ್ಟೇ ಅಲ್ಲ, ಬಹುಭಾಷಾ ನಟರಾದ ಸಂಪತ್‌ರಾಜ್‌ ಅವರು ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ.