ಶ್ರೀಮಂತ ಹುಡುಗಿಯಾದ ದಿಶಾ ಪೂವಯ್ಯ

ಎಲ್ಲರ ಬದುಕಿನಲ್ಲೂ ಒಂದೊಂದು ಟರ್ನಿಂಗ್‌ ಪಾಯಿಂಟ್‌ ಇರುತ್ತದೆ. ಕಥಾ ನಾಯಕಿಯ ಬದುಕಿನಲ್ಲೂ ಅಂಥದ್ದೊಂದು ಗಳಿಗೆ ಬರುತ್ತದೆ. ಅದು ಏನು ಎನ್ನುವುದನ್ನು ಸಿನಿಮಾದಲ್ಲಿಯೇ ನೋಡಿ ಅಂತಾರೆ ನಟಿ ದಿಶಾ ಪೂವಯ್ಯ. ಮಹೇಶ್‌ ರೈ ನಿರ್ದೇಶನದ ಟರ್ನಿಂಗ್‌ ಪಾಯಿಂಟ್‌ ಚಿತ್ರದಲ್ಲಿ ಅವರು ಶ್ರೀಮಂತ ಹುಡುಗಿಯಾಗಿ ನಟಿಸಿದ್ದಾರೆ.

'ಸಿನಿಮಾದ ಕಥೆಯೇ ವಿಭಿನ್ನವಾಗಿದೆ. ಸಿಕ್ಕಿಂನಿಂದ ಶುರುವಾಗುವ ಕಥೆಯು ಕರ್ನಾಟಕದಲ್ಲಿ ಕೊನೆಗೊಳ್ಳುತ್ತದೆ. ಎರಡು ಟ್ರ್ಯಾಕ್‌ನಲ್ಲಿ ಚಿತ್ರಕಥೆಯಿದ್ದು, ಪ್ರೀತಿ ಮತ್ತು ತಾಯಿ ಮಗನ ಬಾಂಧವ್ಯದ ಸ್ಟೋರಿಯೂ ಸಿನಿಮಾದಲ್ಲಿದೆ' ಎನ್ನುತ್ತಾರೆ ನಿರ್ದೇಶಕರು.

ಡೈರಿಯಿಂದ ಶುರುವಾಗುವ ಕಥೆಯಲ್ಲಿ ಅನೇಕ ತಿರುವುಗಳು ಇವೆ. ಕಳೆದು ಹೋಗಿದ್ದ ಅಣ್ಣ ತಂಗಿಯರ ಬದುಕಿನ ಸ್ಟೋರಿ ಕೂಡ ಚಿತ್ರದಲ್ಲಿದ್ದು, ಆತನಿಗೊಂದು ಅಪರೂಪದ ಹಿನ್ನೆಲೆ ನೀಡಿದ್ದಾರಂತೆ ನಿರ್ದೇಶಕರು.

ಆದಿ ಕೇಶವಲು ನಾಯಕನಾಗಿ ನಟಿಸಿದ್ದು, ಉಗ್ರಂ ಮಂಜು, ಟಾಲಿವುಡ್‌ನ ಅನಿಕಾ ರಾವ್‌, ಜೈ ಜಗದೀಶ್‌ ಹೀಗೆ ಹೆಸರಾಂತ ಕಲಾವಿದರೇ ತಾರಾಗಣದಲ್ಲಿ ಇದ್ದಾರೆ.

'ದೊಡ್ಡ ಮನೆತನದ ಮಕ್ಕಳ ಬದುಕೇ ಒಂದು ರೀತಿಯಲ್ಲಿ ಇರುತ್ತದೆ. ಅವರು ಹೇಗಿರುತ್ತಾರೆ, ಅವರ ಮನಸ್ಥಿತಿ ಎಂಥದ್ದು ಹೀಗೆ ಅನೇಕ ವಿಷಯಗಳನ್ನು ನನ್ನ ಪಾತ್ರದ ಮೂಲಕ ನಿರ್ದೇಶಕರು ಹೇಳಿದ್ದಾರೆ. ಸುಂದರವಾದ ಪಾತ್ರ ಅದಾಗಿದೆ' ಎನ್ನುವುದು ದಿಶಾ ಮಾತು. ಈವರೆಗೂ ತುಳು, ಕೊಡವ ಸಿನಿಮಾಗೆ ಆ್ಯಕ್ಷನ್‌ ಕಟ್‌ ಹೇಳಿದ್ದು ನಿರ್ದೇಶಕರು, ಮೊದಲ ಬಾರಿಗೆ ಕನ್ನಡ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ.