ಸಾಮಾನ್ಯವಾಗಿ ಸಿನಿಮಾಗಳಲ್ಲಿ ಕಲಾವಿದರೇ ನಾಯಕ ನಾಯಕಿಯರಾಗಿ ಕಾಣಿಸಿಕೊಳ್ಳುವುದು ವಾಡಿಕೆ. ಆದರೆ, ಈ ಸಿನಿಮಾದಲ್ಲಿ ಹಾಗಿಲ್ಲ. ಗೊಂಬೆಗಳಿಗೆ ಹೀರೋ ಮತ್ತು ಹಿರೋಯಿನ್‌ ಪಟ್ಟ ಕಟ್ಟಿದ್ದಾರೆ ನಿರ್ದೇಶಕ ವಿನೋದ್‌ ಕುಮಾರ್‌. 'ಅಯ್ಯೋ ರಾಮ' ಹೆಸರಿನಲ್ಲಿ ಮೂಡಿ ಬರುತ್ತಿರುವ ಚಿತ್ರದಲ್ಲಿ ಎರಡು ಗೊಂಬೆಗಳು ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿವೆ.
ಇದೊಂದು ಜರ್ನಿ ಬೇಸ್‌ ಕತೆಯಿರುವ ಚಿತ್ರ ಎನ್ನುವುದು ವಿಶೇಷ. ಬಹುತೇಕ ಹೊಸ ಕಲಾವಿದರೇ ನಟಿಸಿರುವ ಈ ಸಿನಿಮಾವನ್ನು ಸಹ ನಿರ್ದೇಶಕರಾಗಿ ಕೆಲಸ ಮಾಡಿರುವವರು ಸೇರಿಕೊಂಡು ನಿರ್ಮಾಣ ಮಾಡಿದ್ದಾರೆ. ತ್ರಿವಿಕ್ರಮ್‌ ರಘು ಮುಖ್ಯ ನಿರ್ಮಾಪಕರಾಗಿ ಸಾಥ್‌ ನೀಡಿದ್ದಾರೆ. ಇವರು ಅನೇಕ ಸಿನಿಮಾಗಳಿಗೆ ಸೆಟ್‌ಬಾಯ್‌ ಆಗಿ ಮತ್ತು ಸಹ ನಿರ್ದೇಶಕರಾಗಿ ಕೆಲಸ ಮಾಡಿದ ಅನುಭವವಿದೆ.
'ನಿರ್ದೇಶಕರು ನನ್ನ ಬಳಿ ಸಿನಿಮಾದ ಕತೆ ಹೇಳಿದರು. ಕಡಿಮೆ ಬಜೆಟ್‌ನಲ್ಲಿ ಒಂದೊಳ್ಳೆ ಸಿನಿಮಾ ಆಗುವ ಲಕ್ಷಣ ಅದಕ್ಕಿತ್ತು. ಹಾಗಾಗಿ ಎಲ್ಲರೂ ಸೇರಿಕೊಂಡು ಅಯ್ಯೋ ರಾಮ ಸಿನಿಮಾ ಮಾಡುತ್ತಿದ್ದೇವೆ. ಪ್ರದೀಪ್‌, ರಾಕ್‌ಲೈನ್‌ ಸುಧಾಕರ್‌, ಕರಿಸುಬ್ಬು , ಪ್ರಸಾದ್‌ ವಶಿಷ್ಠ ಸೇರಿದಂತೆ ಅನುಭವಿ ಕಲಾವಿದರು ಮತ್ತು ಹೊಸ ಕಲಾವಿದರು ಸಿನಿಮಾದಲ್ಲಿದ್ದಾರೆ' ಅಂತಾರೆ ರಘು.