ದಯವಿಟ್ಟು ನನ್ನ ಫಾಲೋ ಮಾಡಬೇಡಿ: ವಿನಂತಿಸಿಕೊಂಡ ನಟ ವಿಜಯ್

"ಹೊರಟು ಹೋಗಿ. ದಯವಿಟ್ಟು ನನ್ನನ್ನು ಫಾಲೋ ಮಾಡಬೇಡಿ" ಎಂದು ಅಭಿಮಾನಿಗಳನ್ನು ಕೈಮುಗಿದು ಬೇಡಿಕೊಂಡಿದ್ದಾರೆ ತಮಿಳು ಸೂಪರ್ ಸ್ಟಾರ್ ವಿಜಯ್. ಈ ಘಟನೆ ಚೆನ್ನೈನಲ್ಲಿ ನಡೆದಿದೆ. ಸ್ಟಾರ್ ನಟ ಕಂಡರೆ ಸಾಕು ಅಭಿಮಾನಿಗಳು ಅವರನ್ನು ಸುತ್ತುವರಿಯುತ್ತಾರೆ. ಕೆಲವೊಮ್ಮೆ ಅವರ ಕಾರನ್ನು ಚೇಸ್ ಮಾಡುತ್ತಾರೆ. ಇತ್ತೀಚೆಗೆ ಇದೇ ಅನುಭವ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರಿಗೂ ಎದುರಾಯಿತು. ಆದರೆ ಅವರು ಕಾರನ್ನು ನಿಲ್ಲಿಸಿ ಅಭಿಮಾನಿಗಳಿಗೆ ಕೈಕುಲುಕಿ ಇನ್ನೊಮ್ಮೆ ಈ ರೀತಿ ಮಾಡಬೇಡಿ ಎಂದು ಬುದ್ಧಿವಾದವನ್ನೂ ಹೇಳಿ ಕಳುಹಿಸಿದ್ದು ಗೊತ್ತೇ ಇದೆ.

ಇದೀಗ ಇಂತಹದ್ದೇ ಸನ್ನಿವೇಶ ತಮಿಳು ಸ್ಟಾರ್ ವಿಜಯ್ ಅವರಿಗೂ ಎದುರಾಗಿದೆ. ಚೆನ್ನೈನ ಕಾಲೇಜೊಂದರಲ್ಲಿ ಅವರ ನಾಯಕತ್ವದ ಸಿನಿಮಾ ಚಿತ್ರೀಕರಣ ನಡೆಯುತ್ತಿದೆ. ಇಲ್ಲಿಗೆ ವಿಜಯ್ ಬರುತ್ತಾರೆಂದು ತಿಳಿದುಕೊಂಡ ಅಭಿಮಾನಿಗಳು ಅಲ್ಲಿಗೆ ಧಾವಿಸಿದರು. ಅವರ ಕಡೆ ಕೈಬೀಸಿ ವಿಜಯ್ ಹೊರಟು ಹೋದರು. ಆದರೆ ವಿಜಯ್ ಕಾರನ್ನು ಅಭಿಮಾನಿಯೊಬ್ಬ ಬೈಕ್‌ನಲ್ಲಿ ಫಾಲೋ ಮಾಡುತ್ತಾ ತಲೈವಾ ತಲೈವಾ ಎಂದು ಕೂಗಿ ಕೊಳ್ಳುತ್ತಾ ಸಾಗುತ್ತಿದ್ದ.

ಇದನ್ನು ಗಮನಿಸಿದ ವಿಜಯ್ ಕಾರಿನ ವಿಂಡೋ ತೆರೆದು ಎಚ್ಚರಿಸಿದರು. "ನನ್ನನ್ನು ಶೂಟಿಂಗ್ ಸೆಟ್ಸ್ ವರೆಗೂ ಯಾರೂ ಫಾಲೋ ಮಾಡಬೇಡಿ. ಹೊರಟು ಹೋಗಿ" ಎಂದು ಹೇಳಿದರು. ಆದರೆ ಅಭಿಮಾನಿಗಳು ಕೇಳಬೇಕಲ್ಲವೇ? ಈ ವೀಡಿಯೋವನ್ನು ಟಿಕ್‌ಟಾಕ್ ವೀಡಿಯೋ ಆಗಿ ಬದಲಾಯಿಸಿ ಈಗ ಟ್ವಿಟರ್‌ನಲ್ಲಿ ಪೋಸ್ಟ್ ಮಾಡಲಾಗಿದೆ.

ಅಟ್ಲಿ ನಿರ್ದೇಶನದ ಈ ಸಿನಿಮಾದಲ್ಲಿ ನಯನತಾರಾ ಹೀರೋಯಿನ್. ಎ ಆರ್ ರೆಹಮಾನ್ ಸಂಗೀತ ಈ ಸಿನಿಮಾಗಿದೆ. ಕ್ರೀಡೆ ಹಿನ್ನೆಲೆಯಲ್ಲಿ ಈ ಸಿನಿಮಾವನ್ನು ತೆರೆಗೆ ತರಲಾಗುತ್ತಿದೆ. ತಮಿಳುನಾಡಿನಲ್ಲಿ ಹೀರೋಗಳನ್ನು ಈ ರೀತಿ ಫಾಲೋ ಮಾಡುವ ಘಟನೆಗಳು ಆಗಾಗ ನಡೆಯುತ್ತಲೇ ಇವೆ. ಈ ಹಿಂದೆ ನಟರಾದ ಅಜಿತ್, ಸೂರ್ಯ ಅವರಿಗೂ
ಇದೇ ರೀತಿಯ ಅನುಭವ ಎದುರಾಗಿತ್ತು.