ಆಕಾಶಕ್ಕೆ ನೆಗೆದ ಆಟೋ; ದುನಿಯಾ ವಿಜಯ್ ಸ್ಟಂಟ್ ನೋಡಿ!

ದುನಿಯಾ ವಿಜಯ್ ಅಭಿನಯದ 'ಕನಕ' ಚಿತ್ರದ ಶೂಟಿಂಗ್ ಭರದಿಂದ ಸಾಗುತ್ತಿದೆ. ಈ ಸಿನಿಮಾದ ಆಕ್ಷನ್ ಸೀನ್‌ಗಳನ್ನು ಸದ್ಯಕ್ಕೆ ಸೆರೆಹಿಡಿಯಲಾಗುತ್ತಿದೆ. 'ಮಾಸ್ತಿಗುಡಿ' ಸಿನಿಮಾದಲ್ಲಿ ಹೆಲಿಕಾಫ್ಟರ್ ಸ್ಟಂಟ್ ಎಷ್ಟೆಲ್ಲಾ ಸದ್ದು ಮಾಡಿತ್ತೋ ಇದೀಗ ಆಟೋ ಸ್ಟಂಟ್ ಸಹ ಅದೇ ರೇಂಜ್‌ನಲ್ಲಿದೆ.

ಈ ರೀತಿಯ ಸಾಹಸ ಸನ್ನಿವೇಶಗಳನ್ನು ಡ್ಯೂಪ್ ಇಲ್ಲದಂತೆ ಮಾಡುವುದು ದುನಿಯಾ ವಿಜಯ್ ಹೆಗ್ಗಳಿಕೆ. ಇದಕ್ಕಾಗಿ ಅವರು ಯಾವುದೇ ರಿಸ್ಕನ್ನೂ ಲೆಕ್ಕಕ್ಕೆ ತಗೊಳ್ಳಲ್ಲ. ಸಾಕಷ್ಟು ಅಪಾಯ ಎಂದು ಗೊತ್ತಿದ್ದರೂ ಅವರು ಕ್ಯಾರೆ ಎನ್ನದೆ ಅಭಿಮಾನಿಗಳನ್ನು ರಂಜಿಸುವುದೊಂದೇ ತನ್ನ ಗುರಿ ಎಂಬಂತೆ ಸ್ಟಂಟ್ ಮಾಡುತ್ತಲೇ ಬಂದಿದ್ದಾರೆ.


ಈ ಸಿನಿಮಾದಲ್ಲಿ ವಿಜಯ್ ಆಟೋ ಚಾಲಕನಾಗಿ ಕಾಣಿಸಿಕೊಂಡಿದ್ದು, ಲವ್, ಆಕ್ಷನ್, ಸೆಂಟಿಮೆಂಟ್, ಕಾಮಿಡಿ ಎಲ್ಲಾ ಆಯಾಮಗಳನ್ನೂ ನಿರೀಕ್ಷಿಸಬಹುದಾಗಿದೆ ಎನ್ನುತ್ತಾರೆ ಚಿತ್ರದ ನಿರ್ದೇಶಕ ಆರ್ ಚಂದ್ರು. ಇನ್ನೊಂದು ವಿಶೇಷ ಎಂದರೆ ನವೀನ್ ಸಜ್ಜು ಈ ಚಿತ್ರದ ಮೂಲಕ ಸಂಗೀತ ನಿರ್ದೇಶಕನಾಗಿ ಗುರುತಿಸಿಕೊಳ್ಳುತ್ತಿರುವುದು.

'ಲಕ್ಷ್ಮಣ' ಚಿತ್ರದ ಬಳಿಕ ಆರ್ ಚಂದ್ರು ಕೈಗೆತ್ತಿಕೊಂಡಿರುವ ಸಿನಿಮಾ ಇದಾಗಿದ್ದು ಸ್ಯಾಂಡಲ್‌ವುಡ್‌ನಲ್ಲಿ ಭಾರಿ ನಿರೀಕ್ಷೆಯನ್ನಂತೂ ಹುಟ್ಟುಹಾಕಿದೆ. ಪಕ್ಕಾ ಕಮರ್ಷಿಯಲ್ ಸಿನಿಮಾಗಳನ್ನು ತೆರೆಗೆ ತರುವಲ್ಲಿ ಚಂದ್ರು ಅವರದು ಮೇಲುಗೈ. ಸಿನಿಮಾದಲ್ಲಿ ಈ ಬಾರಿ ಏನೆಲ್ಲಾ ಇರುತ್ತದೆ ಎಂಬುದನ್ನು ಕಾದುನೋಡಬೇಕು.