ತ್ರಿಕೋನ ಪ್ರೇಮಕಥೆಯ ಫೇಸ್‌ 2 ಫೇಸ್‌

ಫೇಸ್ 2 ಫೇಸ್‌ ಚಿತ್ರ ಲವ್‌ಸ್ಟೋರಿಯ ಜತೆಗೆ ಥ್ರಿಲ್ಲಿಂಗ್‌ ಕಥೆಯನ್ನೂ ಹೇಳಲಿದೆ. ಈ ಚಿತ್ರದಲ್ಲಿ ರೋಹಿತ್‌ ಭಾನುಪ್ರಕಾಶ್‌ ನಾಯಕನಾಗಿ ನಟಿಸುತ್ತಿದ್ದು, ದಿವ್ಯಾ ಉರುಡುಗ ಮತ್ತು ಪೂರ್ವಿ ಜೋಶಿ ನಾಯಕಿಯರಾಗಿ ನಟಿಸಿದ್ದಾರೆ. ಚಿತ್ರದಲ್ಲಿ ಎಂಬಿಎ ಓದುವ ಕಾಲೇಜು ಹುಡುಗಿಯಾಗಿ ನಟಿಸಿರುವ ಪೂರ್ವಿ ಜೋಶಿ ಈ ಮೊದಲು ಬಿಎಂಡಬ್ಲ್ಯುಮತ್ತು ರಾಜಹಂಸ ಚಿತ್ರಗಳಲ್ಲಿ ನಟಿಸಿದ್ದಾರೆ.

'ಬಹಳ ಸಹಜವಾಗಿ ನಟಿಸಿದ್ದಾರೆ ಪೂರ್ವಿ ಜೋಶಿ. ಹೆಚ್ಚು ಅಂತಾನೂ ಅನ್ನಿಸುವುದಿಲ್ಲ, ಕಡಿಮೆ ಎಂದೂ ಎನ್ನಿಸುವುದಿಲ್ಲ. ರಿಯಲ್‌ ಲೈಫ್‌ನಲ್ಲಿ ಒಬ್ಬ ಹುಡುಗಿ ಹೇಗೆ ಕಾಣಿಸುತ್ತಾಳೋ ಹಾಗೇ ತೆರೆಯ ಮೇಲೂ ನಟಿಸಿದ್ದಾರೆ. ಸ್ವಾಭಿಮಾನಿ ಹುಡುಗಿಯ ಪಾತ್ರ. ಇದರ ಜತೆ ಹುಡುಗನೊಬ್ಬನನ್ನು ಪ್ರೇಮಿಸಿ ನಿರಾಶಳಾಗುವ ಪಾತ್ರ. ಈ ಪಾತ್ರಕ್ಕೆ ಇವರೇ ಸೂಕ್ತ ಎನ್ನಿಸಿತು. ಅವರ ಮುಖ ಭಾವ ಹಾಗಿದೆ' ಎಂದಿದ್ದಾರೆ ನಿರ್ದೇಶಕ ಸಂದೀಪ್‌.

ಪ್ರೀತಿ ಕಿತಾಬು ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟಿದ್ದರು. ಈ ಚಿತ್ರದಲ್ಲೂ ಇಬ್ಬರು ನಾಯಕಿಯರು. ಚಿತ್ರದಲ್ಲಿ ನಾಯಕನನ್ನು ಪ್ರೀತಿಸುವ ನಾಯಕಿಯರಾಗಿ ದಿವ್ಯಾ ಉರುಡುಗ ಮತ್ತು ಪೂರ್ವಿ ಜೋಶಿ ಮುಖಾಮುಖಿಯಾಗುವುದರ ಜತೆ ಬೇರೆ ರೀತಿಯ ಸಮಸ್ಯೆಗಳಲ್ಲಿ ಸಿಕ್ಕಿಕೊಳ್ಳುವ ಕಥೆ ಚಿತ್ರದಲ್ಲಿದೆ. 'ಇಬ್ಬರು ನಾಯಕಿಯರಿದ್ದರೆ ಸಮಸ್ಯೆ ಏನಿಲ್ಲ. ಇಬ್ಬರ ಪಾತ್ರಗಳೂ ಡಿಫರೆಂಟ್‌ ಆಗಿರುತ್ತೆ. ನಮ್ಮ ಪಾತ್ರಕ್ಕೆ ತಕ್ಕಂತೆ ನಾವು ನಟಿಸಿದರೆ ಆಯ್ತು. ಅದಕ್ಕಿಂತ ಹೆಚ್ಚು ಏನೂ ಮಾಡೋಕೆ ಸಾಧ್ಯ ಇಲ್ಲ. ಹಾಗಾಗಿ ಕಾಂಪಿಟೇಷನ್‌ ಸಮಸ್ಯೆ ಇಲ್ಲ' ಎಂದಿದ್ದಾರೆ ಪೂರ್ವಿ.

ಚಿತ್ರದ ಟ್ರೇಲರ್‌ ಈಗಾಗಲೇ ಕುತೂಹಲ ಕೇರಳಿಸಿದೆ. ಆರಂಭದಿಂದಲೂ ಗಮನ ಸೆಳೆಯುತ್ತಾ ಬಂದಿರುವ ಚಿತ್ರದ ಹೊಸ ರೀತಿಯ ಸಿನಿಮಾ ಎನ್ನುವುದನ್ನು ಟ್ರೇಲರ್‌ ಹೇಳುತ್ತಿದೆ. 'ಹೆಜ್ಜೆ ಹೆಜ್ಜೆಗೆ ಕುತೂಹಲ ಕೆರಳಿಸಲಿದೆ. ಇದು ಪ್ರಯೋಗಾತ್ಮಕ ಚಿತ್ರ' ಎಂದಿದ್ದಾರೆ ನಿರ್ದೇಶಕ ಸಂದೀಪ್‌. ರೋಹಿತ್‌ಗೆ ಇದು ಮೊದಲ ಚಿತ್ರ.

ಈ ಚಿತ್ರದಲ್ಲಿ ಲವ್‌ ಸ್ಟೋರಿ ಜತೆ ಬಹಳ ಇಂಟರೆಸ್ಟಿಂಗ್‌ ಕಂಟೆಂಟ್‌ಗಳಿವೆ. ಪ್ರತಿಯೊಂದು ಪಾತ್ರವೂ ಒಂದಕ್ಕೊಂದು ಕನೆಕ್ಟ್ ಆಗುತ್ತವೆ. ಹೆಜ್ಜೆ ಹೆಜ್ಜೆಗೆ ಗುಟ್ಟು ರಿವೀಲ್‌ ಆಗುತ್ತಾ ಹೋಗುತ್ತದೆ-ಸಂದೀಪ್‌ ಜನಾರ್ದನ್‌, ನಿರ್ದೇಶಕ