KGF 50 Days Collections: ₹ 250 ಕೋಟಿಗೆ ಗುರಿಯಿಟ್ಟ ಕೆಜಿಎಫ್

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್: ಚಾಪ್ಟರ್ 1 ಸಿನಿಮಾ ಅರ್ಧ ಶತಕ ಬಾರಿಸಿದ್ದು ಬಾಕ್ಸ್ ಆಫೀಸ್ ಗಳಿಕೆಯನ್ನೂ ಹೊಸ ದಾಖಲೆ ಬರೆದಿದೆ. ಇದುವರೆಗೆ ವರ್ಲ್ಡ್ ವೈಡ್ ಕಲೆಕ್ಷನ್ ಅಂದಾಜು ₹ 243.10 ಕೋಟಿ ಎಂದಿವೆ ಮೂಲಗಳು. ಶೀಘ್ರದಲ್ಲೇ ಈ ಸಿನಿಮಾ ₹ 250 ಕೋಟಿ ಗಡಿ ದಾಟಲು ಹಾತೊರೆಯುತ್ತಿದೆ.

ಫೆಬ್ರವರಿ 8ಕ್ಕೆ ಕೆಜಿಎಫ್ ಮೊದಲ ಅಧ್ಯಾಯ ಐವತ್ತು ದಿನಗಳನ್ನು ಫೂರೈಸಿದೆ. ಬಿಡುಗಡೆಯಾದ ಎಲ್ಲ ಕೇಂದ್ರಗಳಲ್ಲೂ ಸದ್ದು ಮಾಡಿರುವ ಸಿನಿಮಾ. ಪಾಕಿಸ್ತಾನ, ಯುಎಸ್ ಬಾಕ್ಸ್ ಆಫೀಸಲ್ಲೂ ಭರ್ಜರಿ ಕಲೆಕ್ಷನ್ ಮಾಡಿದೆ ಕೆಜಿಎಫ್.

ಇದುವರೆಗೆ ₹ 243.10 ಕೋಟಿ ಕಲೆಕ್ಷನ್ ಮಾಡಿದ್ದು, ಇನ್ನೂ ಬಾಕ್ಸ್ ಆಫೀಸಲ್ಲಿ ಓಟ ಮುಂದುವರೆಯುತ್ತಾ ಎಂಬ ಲೆಕ್ಕಾಚಾರ ನಡೆದಿದೆ. ಆದರೆ ಈಗಾಗಲೆ ಅಮೆಜಾನ್ ಪ್ರೈಮ್‌ನಲ್ಲಿ ಬಿಡುಗಡೆಯಾಗಿದ್ದು ರೆಗ್ಯುಲರ್ ಪ್ರೇಕ್ಷಕರನ್ನು ಸಿನಿಮಾ ಸೆಳೆಯುತ್ತದೆಯೇ? ಎಂಬುದೇ ಈಗಿರುವ ಸವಾಲು.

ಕೆಜಿಎಫ್‌ ಕನ್ನಡದಲ್ಲಿ ಎಲ್ಲ ರೆಕಾರ್ಡ್‌ಗಳನ್ನು ಬ್ರೇಕ್‌ ಮಾಡಿದೆ. ರಾಜಕುಮಾರ ಸಿನಿಮಾದಲ್ಲಿ ನಾವು ಏನು ಗಳಿಸಿದ್ದೆವು ಅದನ್ನು ಒಂದೇ ವಾರದಲ್ಲಿ ಇದು ಗಳಿಸಿದೆ ಎಂದು ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ ಹೇಳಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಪ್ರಶಾಂತ್ ನೀಲ್ ನಿರ್ದೇಶನದಲ್ಲಿ ಮೂಡಿಬಂದಿರುವ ಕೆಜಿಎಫ್: ಚಾಪ್ಟರ್ 1 ಸಿನಿಮಾ ಡಿಸೆಂಬರ್ 21, 2018ರಂದು ತೆರೆಕಂಡಿದ್ದು ಗೊತ್ತೇ ಇದೆ. ಸುಮಾರು 2400 ಚಿತ್ರಮಂದಿರಗಳಲ್ಲಿ ತೆರೆಕಾಣುವ ಮೂಲಕ ಸ್ಯಾಂಡಲ್‍ವುಡ್‌ನಲ್ಲಿ ದಾಖಲೆ ಸೃಷ್ಟಿಸಿತು. ಶಾರುಖ್ ಖಾನ್ ಅವರ ಝೀರೋ ಚಿತ್ರದ ಜತೆಗೆ ಸ್ಪರ್ಧಿಸಿದ ಕೆಜಿಫ್ ಹಿಂದಿಯಲ್ಲೂ ಭರ್ಜರಿ ಕಲಕ್ಷನ್ ಮಾಡಿತು.