ಕಿರುತೆರೆ ನಟಿ ಮನೆಗೆ ನುಗ್ಗಿ ಮದುವೆಯಾಗುವಂತೆ ಬೆದರಿಕೆ!

ತಮಿಳಿನ ಜನಪ್ರಿಯ ಧಾರಾವಾಹಿ 'ರಾಜಾರಾಣಿ'ಯಲ್ಲಿ ನಟಿಸುತ್ತಿರುವ ನಟಿ ರಿತಿಕಾಗೆ ಕಹಿ ಅನುಭವ ಎದುರಾಗಿದೆ. ಧಾರಾವಾಹಿಯಲ್ಲಿ ರಿತಿಕಾರನ್ನು ನೋಡಿ ಆಕರ್ಷಿತನಾಗಿದ್ದ ಓರ್ವ ಎಂಜಿನಿಯರಿಂಗ್ ವಿದ್ಯಾರ್ಥಿ ಅವರ ಮನೆಗೆ ನುಗ್ಗಿ ಮದುವೆಯಾಗುವಂತೆ ಒತ್ತಾಯಿಸಿರುವ ಘಟನೆ ಚೆನ್ನೈನ ವಡಪಳನಿಯಲ್ಲಿ ಗುರುವಾರ ನಡೆದಿದೆ.

ರಿತಿಕಾರನ್ನು ತನಗೆ ಕೊಟ್ಟು ಮದುವೆ ಮಾಡಿ ಎಂದು ಅವರ ತಂದೆಗೆ ಬೆದರಿಕೆ ಒಡ್ಡಿದ್ದಾನೆ. ರಿತಿಕಾ ತಂದೆಯೊಂದಿಗೆ ವಾಗ್ವಾದ ನಡೆದು ಜಗಳ ತಾರಕ್ಕೇರಿದ ಕಾರಣ ನೆರೆಹೊರೆಯವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಯುವಕನನ್ನು ಬಂಧಿಸಿದ್ದಾರೆ.

ತಮಿಳಿನಲ್ಲಿ ಜನಪ್ರಿಯ ಕಿರುತೆರೆ ನಟಿಯಾಗಿ ಹೆಸರು ಮಾಡಿದ್ದಾರೆ ರಿತಿಕಾ. ಖಾಸಗಿ ವಾಹಿನಿಯೊಂದರಲ್ಲಿ ಪ್ರಸಾರವಾಗುತ್ತಿರುವ ರಾಜಾರಾಣಿ ಸೀರಿಯಲ್ ಜತೆಗೆ ಅನೇಕ ಧಾರಾವಾಹಿಗಳಲ್ಲಿ ಇವರು ನಟಿಸುತ್ತಿದ್ದಾರೆ. ಅಷ್ಟೇ ಅಲ್ಲದೆ ಡಬ್‌ಸ್ಮಾಶ್, ಟಿಕ್‌ಟಾಕ್‍ನಂತಹ ಆ್ಯಪ್‌ಗಳಲ್ಲೂ ಆಗಾಗ ವೀಡಿಯೋಗಳನ್ನು ಪೋಸ್ಟ್ ಮಾಡುತ್ತಾ ಇನ್ನಷ್ಟು ಪಾಪ್ಯುಲರ್ ಆಗಿದ್ದರು.

ರಿತಿಕಾ ಸದ್ಯಕ್ಕೆ ಚೆನ್ನೈನ ವಡಪಳನಿಯಲ್ಲಿ 100 ಫೀಟ್ ರಸ್ತೆ ಬಳಿಯ ಅಪಾರ್ಟ್‌ಮೆಂಟ್‌ನಲ್ಲಿ ತಂದೆಯೊಂದಿಗೆ ವಾಸವಾಗಿದ್ದಾರೆ. ಗುರುವಾರ ಬೆಳಗ್ಗೆ ಓರ್ವ ಯುವಕ ಅಪಾರ್ಟ್‌ಮೆಂಟ್‌ನ ರಿತಿಕಾ ಮನೆಯ ಬಾಗಿಲು ತಟ್ಟಿದ್ದಾನೆ. ರಿತಿಕಾರ ತಂದೆ ಸುಬ್ರಹ್ಮಣಿ ಬಾಗಿಲು ತೆರೆದಾಗ ಒಳ ನುಗ್ಗಿದ್ದಾನೆ.

ಮನೆಯ ಒಳಗೆ ಬಂದ ಆ ಯುವಕ ರಿತಿಕಾರನ್ನು ತನಗೆ ಕೊಟ್ಟು ಮದುವೆ ಮಾಡಬೇಕು ಎಂದು ಅವರ ತಂದೆಯನ್ನು ವಿನಂತಿಸಿಕೊಂಡಿದ್ದಾನೆ. ಇದನ್ನು ಕೇಳಿ ಶಾಕ್ ಆದ ಸುಬ್ರಹ್ಮಣಿ ಯುವಕನ ಜತೆಗೆ ವಾಗ್ದಾದಕ್ಕಿ ಇಳಿದಿದ್ದಾರೆ. ಆ ಯುವಕ ಬೆದರಿಕೆ ಒಡ್ಡಿದ್ದು ಜಗಳ ತಾರಕ್ಕೇರಿದೆ. ನೆರೆಹೊರೆಯವರು ಪೊಲೀಸರಿಗೆ ಮಾಹಿತಿ ನೀಡಿದ ಬಳಿಕ ಯುವಕನನ್ನು ಅರೆಸ್ಟ್ ಮಾಡಲಾಗಿದೆ.

ಬಂಧಿತ ಆರೋಪಿಯನ್ನು ಗೋಬಿಚೆಟ್ಟಿ ಪಾಳ್ಯದ ಭರತ್ ಎಂದು ಗುರುತಿಸಲಾಗಿದೆ. ಇಂಜಿನಿಯರಿಂಗ್ ಪದವಿ ಪಡೆದಿರುವ ಭರತ್ ಉದ್ಯೋಗ ಹುಡುಕಿಕೊಂಡು ಚೆನ್ನೈಗೆ ಆಗಮಿಸಿದ್ದಾನೆ. ಗುರುವಾರ ತನ್ನ ಊರಿಗೆ ಹೋಗಲು ಸಿದ್ಧವಾಗಿದ್ದ ಈತ ರಿತಿಕಾ ಮನೆಗೆ ನುಗ್ಗಿ ಗಲಾಟೆ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ತನಗೆ ರಿತಿಕಾ ಎಂದರೆ ತುಂಬಾ ಇಷ್ಟವೆಂದು, ಆಕೆಯನ್ನು ಮದುವೆಯಾಗುತ್ತೇನೆ ಎಂದು ಭರತ್ ವಿಚಾರಣೆಯಲ್ಲಿ ಪೊಲೀಸರಿಗೆ ತಿಳಿಸಿದ್ದಾನೆ.