ಪ್ರೇಕ್ಷಕರ ಪ್ರತಿಕ್ರಿಯೆ ಕಂಡು ಖುಷಿಯಾಗಿದೆ ಎಂದ ರೋಹಿತ್‌

* ಹರೀಶ್‌ ಬಸವರಾಜ್‌

Vijaya Karnataka Web

ಫೇಸ್‌ 2 ಫೇಸ್‌ ಚಿತ್ರಕ್ಕೆ ಪ್ರೇಕ್ಷಕರಿಂದ ಅತ್ಯುತ್ತಮ ಪ್ರತಿಕ್ರಿಯೆ ಸಿಕ್ಕಿದೆ. ಇದರಿಂದ ನನಗೆ ಮತ್ತು ಚಿತ್ರತಂಡಕ್ಕೆ ತುಂಬಾ ಖುಷಿಯಾಗಿದೆ ಎಂದಿರುವ ಚಿತ್ರ ನಾಯಕ ನಟ ರೋಹಿತ್‌ ಭಾನುಪ್ರಕಾಶ್‌, ಪ್ರಾಮಾಣಿಕ ಪ್ರಯತ್ನ ಮಾಡಿದರೆ ಪ್ರೇಕ್ಷಕರು ಕೈ ಹಿಡಿಯುತ್ತಾರೆ ಎಂಬುದದಕ್ಕೆ ಇದೇ ಸಾಕ್ಷಿ ಎಂದು ಹೇಳಿದ್ದಾರೆ.

ನಾವು ಸಿನಿಮಾ ಮಾಡುವಾಗಲೇ ಇದೊಂದು ಬೇರೆ ರೀತಿಯ ಸಿನಿಮಾ ಆಗುತ್ತದೆ ಎಂದು ನಂಬಿದ್ದೆವು. ಸಿನಿಮಾ ನೋಡಿದ ಅನೇಕರು ನನ್ನ ನಟನೆ ನೋಡಿ ಖುಷಿಯಾಗಿದ್ದಾರೆ. ಒಳ್ಳೆ ಹುಡುಗನಾಗಿ ನಟಿಸಿದ್ದೀಯಾ ಎಂದು ಮೆಚ್ಚಿಕೊಂಡಿದ್ದಾರೆ. ಇನ್ನೂ ಬಹಳಷ್ಟು ಪ್ರೇಕ್ಷಕರು ನ್ಯಾಚುರಲ್‌ ಆ್ಯಕ್ಟರ್‌ ಎಂದು ಕಾಮೆಂಟ್‌ ಮಾಡಿದ್ದಾರೆ. ಈ ಎಲ್ಲ ಕ್ರೆಡಿಟ್‌ ನಿರ್ದೇಶಕ ಸಂದೀಪ್‌ ಅವರಿಗೆ ಸಲ್ಲಬೇಕು ಎಂದು ರೋಹಿತ್‌ ಸಂತಸ ವ್ಯಕ್ತಪಡಿಸಿದ್ದಾರೆ.

ವಿಮರ್ಶಕರು ಮತ್ತು ಈಗಾಗಲೇ ನೋಡಿರುವ ಪ್ರೇಕ್ಷಕರು ಸಿನಿಮಾ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಜಾಲತಾಣಗಳಲ್ಲಿ ಉತ್ತಮ ಕಾಮೆಂಟ್‌ಗಳನ್ನು ಹಾಕುತ್ತಿದ್ದಾರೆ. ಪ್ರೇಕ್ಷಕರು ಇಷ್ಟಪಡುವಂಥ ಸಿನಿಮಾ ಮಾಡಿದ್ದೇವೆ. ನೋಡಿರುವವರಲ್ಲಿ ಸಾಕಷ್ಟು ಪ್ರೇಕ್ಷಕರು ಸಿನಿಮಾ ನೋಡುವ ವೇಳೆ ಮೊಬೈಲ್‌ ತೆಗೆದು ನೋಡಬೇಕು ಎಂದು ಅನಿಸಲೇ ಇಲ್ಲ ಎಂದು ಹೇಳಿದ್ದಾರೆ. ಅಷ್ಟು ಚೆನ್ನಾಗಿದೆ ಚಿತ್ರಕಥೆ ಎಂದು ಕಾಂಪ್ಲಿಮೆಂಟ್‌ ನೀಡಿದ್ದಾರೆ. ಸಂದೀಪ್‌ ಮೊದಲ ಬಾರಿಗೆ ನಿರ್ದೇಶನ ಮಾಡಿದ್ದರೂ ಹೊಸ ರೀತಿಯಲ್ಲಿ ಸಿನಿಮಾ ಮಾಡಿದ್ದಾರೆ. ಇದು ನಮಗೆ ಪ್ಲಸ್‌ ಪಾಯಿಂಟ್‌ ಎಂದು ರೋಹಿತ್‌ ಹೇಳಿದ್ದಾರೆ.

ಬನಶಂಕರಿ ಕ್ರಿಯೇಶನ್ಸ್‌ ಬ್ಯಾನರ್‌ ಅಡಿಯಲ್ಲಿ ಸುಮಿತ್ರಾ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ರೋಹಿತ್‌ಗೆ ಪೂರ್ವಿ, ದಿವ್ಯಾ ಉರುಡುಗ ಜೋಡಿಯಾಗಿದ್ದಾರೆ.

-------

ಹೊಸ ಪ್ರಯತ್ನವನ್ನು ನೋಡಿದವರೆಲ್ಲರೂ ಮೆಚ್ಚಿಕೊಂಡಿದ್ದಾರೆ. ಸ್ಕ್ರೀನ್‌ ಪ್ಲೇ ಮತ್ತು ನಿರೂಪಣಾ ಶೈಲಿಯ ಬಗ್ಗೆ ಎಲ್ಲರೂ ಮಾತನಾಡುತ್ತಿದ್ದಾರೆ. ಉಪೇಂದ್ರ ಶೈಲಿಯ ಸಿನಿಮಾ ಇದು ಎಂದು ಹೇಳುತ್ತಿದ್ದಾರೆ.

-ಸಂದೀಪ್‌ ಜನಾರ್ದನ್‌, ನಿರ್ದೇಶಕ