ಕ್ಷಣ ಕ್ಷಣಕ್ಕೂ ಕುತೂಹಲ ಕೆರಳಿಸುತ್ತದಂತೆ 'ಫೇಸ್ 2 ಫೇಸ್'

ಸ್ಯಾಂಡಲ್‍ವುಡ್‌ನಲ್ಲಿ ಸಾಕಷ್ಟು ಸಸ್ಪೆನ್ಸ್ ಸಿನಿಮಾಗಳು ಬಂದಿವೆ. ಕ್ರೈಂ ಥ್ರಿಲ್ಲರ್‌ಗಳೂ ಸದ್ದು ಮಾಡಿವೆ. ಇದೀಗ ಅಂತಹದ್ದೇ ಮತ್ತೊಂದು ಸಿನಿಮಾ ತೆರೆಗೆ ಬರಲು ಸಿದ್ಧವಾಗುತ್ತಿದೆ. ಸಿನಿಮಾದ ಹೆಸರು ಫೇಸ್ 2 ಫೇಸ್. ಹೊಸಬರ ತಂಡದ ಪ್ರಯತ್ನ ಇದು. ಹುಲಿರಾಯ ಸಿನಿಮಾದ ಮೂಲಕ ಭರವಸೆ ಮೂಡಿಸಿದ್ದ ದಿವ್ಯಾ ಉರುಡುಗ ಈಗ ಫೇಸ್‌ 2 ಫೇಸ್‌ ಚಿತ್ರದ ನಾಯಕಿ. ಇದೊಂದು ಕ್ರೈಂ ಥ್ರಿಲ್ಲರ್‌ ಆಧರಿಸಿದ ಸಿನಿಮಾ.

ಈಗಾಗಲೆ ಈ ಸಿನಿಮಾದ ಟ್ರೇಲರ್ ರಿಲೀಸ್ ಆಗಿದ್ದು ಇನ್ನಷ್ಟು ಕುತೂಹಲ ಕೆರಳಿಸಿದೆ. 'ಟ್ರೇಲರ್‌ಗೆ ತುಂಬಾ ಒಳ್ಳೆಯ ರೆಸ್ಪಾನ್ಸ್‌ ಸಿಕ್ಕಿದೆ. ಟ್ರೇಲರ್‌ ನೋಡಿದಾಗ ಅಫೇರ್‌ ಸುತ್ತ ಇರುವ ಕತೆ ಅಂತ ಅನ್ನಿಸಬಹುದು. ನಿಜ ಹೇಳಬೇಕೆಂದರೆ, ಟ್ರೇಲರ್‌ನಲ್ಲಿ ನಾವು ತೋರಿಸೋದು ಸ್ವಲ್ಪ ಸ್ವಲ್ಪ. ಇದಕ್ಕಿಂತ ಹೆಚ್ಚು ಕುತೂಹಲಕಾರಿಯಾದ ಅಂಶಗಳು ಚಿತ್ರದಲ್ಲಿವೆ. ದಿನನಿತ್ಯದ ಜೀವನದಲ್ಲಿ ನಡೆಯುವ ವಿಚಾರಗಳನ್ನು ಇಟ್ಟುಕೊಂಡು ಸಸ್ಪೆನ್ಸ್‌ ಕ್ರಿಯೇಟ್‌ ಮಾಡಿದ್ದೇವೆ. ಚಿತ್ರದ ಮೊದಲಿನಿಂದ ಕೊನೆಯವರೆಗೂ ಸಸ್ಪೆನ್ಸ್‌ ಇದೆ. ಕ್ಲೂ ಕೊಟ್ಟರೂ ನೋಡುವವರಿಗೆ ಗೊತ್ತಾಗಲ್ಲ. ಕೊನೆಯಲ್ಲೇ ಸಸ್ಪೆನ್ಸ್‌ ರಿವೀಲ್‌ ಆಗೋದು' ಎಂದಿದ್ದಾರೆ ನಿರ್ದೇಶಕರು.

ಹೊಸ ತಂಡದ ಪ್ರಯತ್ನ 'ಫೇಸ್‌ 2 ಫೇಸ್‌' ಟ್ರೇಲರ್‌ ಈಗಾಗಲೇ ಸ್ಯಾಂಡಲ್‌ವುಡ್‌ನಲ್ಲಿ ಸದ್ದು ಮಾಡಿದೆ. ಸಂದೀಪ್‌ ಜನಾರ್ದನ್‌ ನಿರ್ದೇಶನದಲ್ಲಿ ತಯಾರಾದ ಚಿತ್ರದಲ್ಲಿ ದಿವ್ಯಾ ಉರುಡುಗ ನಾಯಕಿಯಾಗಿ ನಟಿಸಿದ್ದಾರೆ. ಹುಲಿರಾಯ ಚಿತ್ರದ ನಂತರ ಇವರು ಮತ್ತೊಂದು ಹೊಸ ಬಗೆಯ ಪಾತ್ರ ಮಾಡಿದ್ದು ವಿಶೇಷ. ಅಲ್ಲದೇ, ಇವರ ಜತೆ ಪೂರ್ವಿ ಜೋಶಿ ಕೂಡ ಮತ್ತೊಂದು ಪಾತ್ರ ನಿರ್ವಹಿಸಿದ್ದಾರೆ.

ಇದೊಂದು ಕ್ರೈಂ ಮತ್ತು ಥ್ರಿಲ್ಲರ್‌ ಕಥೆಯನ್ನು ಆಧರಿಸಿದ ಸಿನಿಮಾವಾಗಿದ್ದು, ತ್ರಿಕೋನ ಪ್ರೇಮಕಥೆ ಇದೆ. ಉಪೇಂದ್ರ ಜತೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿರುವ ಸಂದೀಪ್‌, ಚೊಚ್ಚಲು ಸಿನಿಮಾದಲ್ಲಿಯೇ ನಿರೀಕ್ಷೆ ಮೂಡಿಸಿದ್ದಾರೆ.

ಚಿತ್ರದಲ್ಲಿ ಬರುವ ಕ್ಯಾರೆಕ್ಟರ್‌ಗಳಲ್ಲಿ ಒಂದು ಪಾತ್ರಕ್ಕೆ 2 ಫೇಸ್‌ ಇರುವುದರಿಂದ ಚಿತ್ರಕ್ಕೆ ಆ ಹೆಸರು ಇಡಲು ಕಾರಣವಂತೆ. 'ಒಂದು ಪಾತ್ರಕ್ಕೆ 2 ಫೇಸ್‌ ಇರುತ್ತೆ. ಯಾವ ಪಾತ್ರಕ್ಕೆ 2 ಫೇಸ್‌ ಅನ್ನುವುದನ್ನು ಪ್ರೇಕ್ಷಕರು ಊಹಿಸಲು ಸಾಧ್ಯವಾಗುವುದಿಲ್ಲ. ಕೊನೆಯಲ್ಲಿ ಗೊತ್ತಾಗುತ್ತದೆ' ಎಂದಿದ್ದಾರೆ ಸಂದೀಪ್‌.

ಅಂದಹಾಗೆ ಈ ಚಿತ್ರಕ್ಕೆ ಮುಂಬೈನ ಏಕ್‌ ಖ್ವಾಬ್‌ ಬ್ಯಾಂಡ್‌ ಟೀಮ್‌ ಸಂಗೀತ ಸಂಯೋಜನೆ ಮಾಡಿದ್ದು, ರೋಹಿತ್‌ ಬಾನು ಪ್ರಸಾದ್‌ ನಾಯಕ. ಮಾ.15ರಂದು ಸಿನಿಮಾ ರಿಲೀಸ್‌ ಆಗಲಿದೆ.