ಸುದೀಪ್‌ ಸಹಾಯ ಕೋರಿದ ಅಭಿಮಾನಿ

ಅಭಿಮಾನಿಗಳು ತಾವು ಆರಾಧಿಸುವ ನಟ ಸುದೀಪ್‌ರತ್ತ ಸಹಾಯಕ್ಕಾಗಿ ಹಸ್ತ ಚಾಚಿದ್ದಾರೆ. ಗರ್ಭಿಣಿಯಾಗಿದ್ದಾಗ ಸಣ್ಣಕರುಳಿನ ಚಿಕಿತ್ಸೆಗೆ ಒಳಗಾದ ಮಹಿಳಾ ಅಭಿಮಾನಿ, ಈಗ ಮುಂದಿನ ಚಿಕಿತ್ಸೆಗಾಗಿ ಧನಸಹಾಯ ಮಾಡುವಂತೆ ಸುದೀಪ್‌ರಿಗೆ ಕೋರಿದ್ದಾರೆ.

ಚೈತ್ರ ಎಂಬ ಮಹಿಳೆ ಗರ್ಭಿಣಿಯಾಗಿದ್ದಾಗ ಅನಿವಾರ್ಯ ಕಾರಣದಿಂದ ಸಣ್ಣಕರುಳನ್ನು ವೈದ್ಯರು ಕತ್ತರಿಸಿ ತೆಗೆದಿದ್ದಾರೆ. ಇದರಿಂದಾಗಿ ಸರಿಯಾಗಿ ಊಟ ಮಾಡಲಾಗದೆ ಅವರು ಪರದಾಡುತ್ತಿದ್ದಾರೆ. ಇದು ಸರಿ ಹೋಗಲು ಇನ್ನೊಂದು ಆಪರೇಷನ್‌ ಮಾಡಬೇಕಿದ್ದು, ಇದಕ್ಕೆ ಸುಮಾರು 30 ಲಕ್ಷ ತಗುಲುತ್ತದಂತೆ. ಆದರೆ, ಹಣವಿಲ್ಲದೆ ಆಪರೇಷನ್‌ ಮಾಡಿಸಿಕೊಳ್ಳಲಾಗದೆ, ಪರದಾಡುತ್ತಿದ್ದಾರೆ. ಈಗ ಸುದೀಪ್‌ರಿಗೆ ಮೊರೆ ಹೋಗಿದ್ದಾರೆ. ನಿಮ್ಮ ತಂಗಿ ಎಂದು ಭಾವಿಸಿ ಸಹಾಯ ಮಾಡಿ ಎಂದಿದ್ದಾರೆ.

ಸ್ಟಾರ್ ನಟರು ತಮ್ಮ ಅಭಿಮಾನಿಗಳಿಗೆ ಸಹಾಯ ಮಾಡುವುದು ಸಾಮಾನ್ಯ ಸಂಗತಿ. ದರ್ಶನ್‌, ಶಿವರಾಜ್‌ಕುಮಾರ್‌, ಸುದೀಪ್‌, ಪುನೀತ್‌ ಎಲ್ಲರೂ ಒಂದಲ್ಲಾ ಒಂದು ರೀತಿಯಲ್ಲಿ ಅಗತ್ಯ ಇರುವವರಿಗೆ ಸಹಾಯ ಮಾಡುತ್ತಾ ಬಂದಿದ್ದಾರೆ.