ಅಪ್ಪ ಮಗಳ ಬಾಂಧವ್ಯ ಹೇಳುವ ರೆಕ್ಕೆಯಾ

ಯುಗಾದಿಗೆ ಬಿಡುಗಡೆಯಾಗುತ್ತಿರುವ ಕವಚ ಸಿನಿಮಾದ ರೆಕ್ಕೆಯಾ ಎಂಬ ವಿಡಿಯೋ ಹಾಡನ್ನು ಇಂದು ಸುದೀಪ್‌ ಬಿಡುಗಡೆ ಮಾಡಲಿದ್ದಾರೆ.

ಜಿವಿಆರ್‌ ವಾಸು ಆ್ಯಕ್ಷನ್‌ ಕಟ್‌ ಹೇಳಿರುವ ಕವಚ ಸಿನಿಮಾದಲ್ಲಿ ಶಿವರಾಜ್‌ಕುಮಾರ್‌ ದೃಷ್ಟಿ ವಿಕಲಚೇತನನಾಗಿ ಕಾಣಿಸಿಕೊಂಡಿದ್ದಾರೆ. ಅಪ್ಪ ಮಗಳ ಬಾಂಧವ್ಯದ ಕಥೆ ಈ ಸಿನಿಮಾದಲ್ಲಿದ್ದು ಇಂದು ಬಿಡುಗಡೆಯಾಗುತ್ತಿರುವ ಹಾಡಿನಲ್ಲಿ ಅಪ್ಪನ ಪ್ರೀತಿಯ ಬಗ್ಗೆ ಹೇಳಲಾಗಿದೆಯಂತೆ. ನಾಗೇಂದ್ರ ಪ್ರಸಾದ್‌ ಬರೆದಿರುವ ಈ ಹಾಡು ಸಂಪೂರ್ಣ ಊಟಿಯಲ್ಲಿ ಚಿತ್ರೀಕರಣವಾಗಿದೆ.

'ನಮ್ಮ ಸಿನಿಮಾದಲ್ಲಿ ಅಪ್ಪ ಮಗಳ ಪ್ರೀತಿಯನ್ನು ತೋರಿಸುತ್ತೇವೆ. ಆ ವಿಚಾರದಲ್ಲಿ ಈ ಹಾಡು ತುಂಬಾ ಹೈಲೈಟ್‌. ಸುದೀಪ್‌ ಅವರು ತಮ್ಮ ಟ್ವೀಟರ್‌ ಅಕೌಂಟ್‌ ಮೂಲಕ ಈ ಹಾಡನ್ನು ರಿಲೀಸ್‌ ಮಾಡುತ್ತಿದ್ದಾರೆ. ಶಿವರಾಜ್‌ಕುಮಾರ್‌ ಅವರು ಹಾಡನ್ನು ನೋಡಿ ಬಹಳ ಖುಷಿ ಪಟ್ಟಿದ್ದರು.ಅಲ್ಲದೆ 15 ವರ್ಷಗಳ ನಂತರ ಊಟಿಯಲ್ಲಿ ಚಿತ್ರೀಕರಣ ಮಾಡಿದ್ದರಂತೆ. ಅದಕ್ಕೆ ಅವರು ಬಹಳ ಸಂತಸ ವ್ಯಕ್ತಪಡಿಸಿದರು'ಎನ್ನುತ್ತಾರೆ ನಿರ್ದೇಶಕ ಜಿ ವಿ ಆರ್‌ ವಾಸು.

ಈ ಚಿತ್ರದಲ್ಲಿ ಶಿವರಾಜ್‌ಕುಮಾರ್‌ ಪುತ್ರಿಯಾಗಿ ಬೇಬಿ ಮೀನಾಕ್ಷಿ ನಟಿಸಿದ್ದಾರೆ. ಅರ್ಜುನ್‌ ಜನ್ಯಸಂಗೀತ ನೀಡಿದ್ದಾರೆ. ಇಷಾ ಕೊಪ್ಪಿಕರ್‌ ಟಫ್‌ ಪೊಲೀಸ್‌ ಆಫಿಸರ್‌ ರೋಲ್‌ನಲ್ಲಿ ಮಿಂಚಿದ್ದಾರೆ.

ಕವಚ ಸಿನಿಮಾ ಏಪ್ರಿಲ್‌ 5ಕ್ಕೆ ಬಿಡುಗಡೆಯಾಗಲಿದೆ. ಅದಕ್ಕೂ ಮುನ್ನ ಬಿಡುಗಡೆಯಾಗುತ್ತಿರುವ ಈ ಭಾವನಾತ್ಮಕ ಹಾಡು ಪ್ರೇಕ್ಷಕರಿಗೆ ಇಷ್ಟವಾಗಲಿದೆ-ಜಿ ವಿ ಆರ್‌ ವಾಸು, ನಿರ್ದೇಶಕ