#MeToo: ಅರ್ಜುನ್‌ ಸರ್ಜಾ-ಶ್ರುತಿ ಕೇಸ್‌; ಸಂಧಾನದಿಂದ ಫಿಲಂ ಚೇಂಬರ್‌ ದೂರ

ಬೆಂಗಳೂರು:
ಮೀ ಟೂ ಸಂಧಾನ ಪ್ರಕ್ರಿಯೆಯಿಂದ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಹಿಂದೆ ಸರಿದಿದೆ. ಈ ನಡುವೆ, ನಿರ್ಮಾಪಕರ ಹಿತ ಕಾಯಲು ಪ್ರೊಡ್ಯೂಸರ್‌ ಪ್ರೊಟೆಕ್ಷನ್‌ ಕಮಿಟಿ ರಚಿಸಲು ಮಂಡಳಿ ಮುಂದಾಗಿದೆ.

ಅಂಬರೀಶ್‌ ನೇತೃತ್ವದಲ್ಲಿ ಗುರುವಾರ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿನಡೆದ ಸಂಧಾನ ಸಭೆ ವಿಫಲಗೊಂಡಿತ್ತು. ಅರ್ಜುನ್‌ ಸರ್ಜಾ ಮತ್ತು ಶ್ರುತಿ ಹರಿಹರನ್‌ ರಾಜಿಗೆ ಒಪ್ಪಿರಲಿಲ್ಲ. ಈ ಹಿನ್ನೆಲೆಯಲ್ಲಿ ವಾಣಿಜ್ಯ ಮಂಡಳಿಯು, ಇನ್ನು ಮುಂದೆ ಈ ಕುರಿತ ಸಂಧಾನ ಯತ್ನದಲ್ಲಿ ಕೈ ಹಾಕದಿರಲು ನಿರ್ಧರಿಸಿದೆ. ಆದರೆ, ಕಲಾವಿದರ ನಡುವಿನ ತಿಕ್ಕಾಟ ಏನೇ ಇದ್ದರೂ ಇವರಿಂದಾಗಿ ನಿರ್ಮಾಪಕರಿಗೆ ತೊಂದರೆ ಆಗದಿರಲೆಂದು ಪ್ರೊಡ್ಯೂಸರ್‌ ಪ್ರೊಟೆಕ್ಷನ್‌ ಕಮಿಟಿ ರಚನೆ ಮಾಡಲು ತೀರ್ಮಾನಿಸಿದೆ.

ಈ ಸಮಿತಿಯ ರೂಪುರೇಷೆಗಳನ್ನು ಸಿದ್ಧ ಮಾಡಲಾಗುತ್ತಿದೆ ಎಂದು ನಿರ್ಮಾಪಕರ ಸಂಘದ ಕಾರ್ಯದರ್ಶಿ ಭಾ.ಮಾ.ಹರೀಶ್‌ ತಿಳಿಸಿದ್ದಾರೆ.

ನಟಿ ಶ್ರುತಿಗೆ ನೋಟಿಸ್‌: ವಿಚಾರಣೆ 29ಕ್ಕೆ
ಶ್ರುತಿ ಹರಿಹರನ್‌ ತಮ್ಮ ವಿರುದ್ಧ ಹೇಳಿಕೆ ನೀಡದಂತೆ ಆದೇಶ ನೀಡುವಂತೆ ನಟ ಅರ್ಜುನ್‌ ಸರ್ಜಾ ನ್ಯಾಯಾಲಯದಲ್ಲಿ ಸಲ್ಲಿಸಿದ್ದ ಅರ್ಜಿಗೆ ಏಕಮುಖವಾಗಿ ತೀರ್ಪು ನೀಡಲು ಸಾಧ್ಯವಿಲ್ಲ ಎಂದಿರುವ ಕೋರ್ಟ್, ನಟಿ ಶ್ರುತಿ ಹರಿಹರನ್‌ಗೆ ನೋಟಿಸ್‌ ಜಾರಿ ಮಾಡಿದೆ. ವಿಚಾರಣೆಯನ್ನು ಅ.29ಕ್ಕೆ ಮುಂದೂಡಿದೆ.