ಎರ್ಮಾಯಿ ಫಾಲ್ಸ್‌ಗೆ ಬಿದ್ದು ಚಿತ್ರ ‍ನಿರ್ದೇಶಕ ಸಂತೋಷ್ ಶೆಟ್ಟಿ ಮೃತ್ಯುಪಾಲು

ಬೆಳ್ತಂಗಡಿ ತಾಲೂಕಿನ ಮಲವಂತಿಗೆ ಗ್ರಾಮದ ದಿಡುಪೆ ಎರ್ಮಾಯಿ ಫಾಲ್ಸ್ ಫಾಲ್ಸ್‌ನಲ್ಲಿ ಪೋಟೋ ಶೂಟ್‌ಗೆ ಬಂದಿದ್ದ ಕಟೀಲು ಪೆಟ್ರೋಲ್ ಪಂಪ್ ಸಮೀಪದ ನಿವಾಸಿ, ’ಈ ಕನಸು’ ಸಿನೆಮಾದ ನಿರ್ದೇಶಕ ಕಟೀಲು ಸಂತೋಷ್ ಶೆಟ್ಟಿ (35) ಆಕಸ್ಮಿಕವಾಗಿ ಕಾಲು ಜಾರಿ ನೀರಿಗೆ ಬಿದ್ದು ಮೃತ ಪಟ್ಟಿದ್ದಾರೆ.

ಬುಧವಾರ ಬೆಳಗ್ಗೆ ಪೋಟೋ ಶೂಟ್ ತಂಡದೊಂದಿಗೆ ಬಂದಿದ್ದ ಸಂತೋಷ್ ಕಾಲಿಗೆ ಚಿತ್ರೀಕರಣದ ಸಲಕರಣೆ ಕಟ್ಟಿಕೊಂಡು ಶೂಟಿಂಗ್ ಮಾಡುತ್ತಿದ್ದರು. ಒಂದು ಪೋಟೋ ತೆಗೆದು ಎರಡನೇ ಪೋಟೋ ತೆಗೆಯಲು ತಿರುಗಿದಾಗ ಕಾಲು ಜಾರಿ ಫಾಲ್ಸ್ ನ ಗುಂಡಿಗೆ ಬಿದ್ದಿದ್ದಾರೆ.

ಯಾವ ಸಿನೆಮಾಕ್ಕೆ ಪೋಟೋ ತೆಗೆಯಲು ಬಂದಿದ್ದರು ಎಂದು ತಿಳಿದು ಬಂದಿಲ್ಲ. ಫಾಲ್ಸ್ ನ ಕೆಳಗೆ ಸುರಕ್ಷಿತವಾದ ಸ್ಥಳದಲ್ಲೇ ಶೂಟಿಂಗ್ ಮಾಡಲು ತಯಾರಾಗಿದ್ದರು. ಅದರೆ ಒಂದು ಪೋಟೋ ತೆಗೆದು ಎರಡನೇ ಪೋಟೋ ತೆಗೆಯಲು ನೀರಿನಲ್ಲಿ ಹಿಂದೆ ಹೆಜ್ಜೆ ಇಟ್ಟಿದ್ದಾರೆ. ಆಯ ತಪ್ಪಿ ಆಳವಾದ ಗುಂಡಿಗೆ ಬಿದ್ದಿದ್ದಾರೆ. ಕಾಲುಗಳಿಗೆ ಕಬ್ಬಿಣದಂತಹ ವಸ್ತುಗಳನ್ನು ಕಟ್ಟಿ ಕೊಂಡಿದ್ದರಿಂದ ನೀರಿನಿಂದ ಮೇಲೆ ಬರಲು ಸಾಧ್ಯವಾಗಿಲ್ಲ.